އެހީއަށް އެދުމުން އެންމެ އަވަހަށް އިޖާބަދިނީ ރާއްޖެއިން: ސްރީލަންކާ ސަފީރު

ސްރީލަންކާއިން އެހީއަށް އެދުމުން އެންމެ ފުރަތަމަ އިޖާބަދިން ޤައުމަކީ ދިވެހިރާއްޖެ ކަމަށާއި މިވަގުތު އިސްކަމެއް ދެނީ ރައްޔިތުން ސަލާމަތްކޮށް ޒަރޫރީ ބޭނުންތައް ފުއްދައިދިނުމަށް ކަމަށް ސްރީލަންކާއިން ދިވެހިރާއްޖެއަށް ކަނޑައަޅާފައި ހުންނަވާ ސަފީރު މުހައްމަދު ރިޒްވީ ހަސަން ވިދާޅުވެއްޖެއެވެ.

ސަފީރު މިހެން ވިދާޅުވީ، ޕީއެސްއެމް އިސްނަގައިގެން ރާޢްޖޭގެ މީޑިއާތަކާއި ގުޅިގެން ކުރިއަށްގެންދާ "ސިލޯނާއެކު ދިވެހީން" ޓެލެތޯންގައި ވާހަކަ ދައްކަވަމުންނެވެ.

ސްރީލަންކާގައި ހާލުގައި ޖެހިފައިވާ ފަރާތްތަކަށް އެހީވުމަށް ޕީއެސްއެމްއިން ކުރިއަށްގެންދާ ޓެލެތޯނުގައި ވާހަކަ ދައްވަކަމުން އެ ޤައުމުން ރާއްޖެއަށް ކަނޑައަޅާފައި ހުންނަވާ ސަފީރު ވިދާޅުވީ ތޫފާން ދިތުވާގެ ސަބަބުން ލަންކާއަށް ބޮޑެތި ގެއްލުންތަކެއް ލިބިފައިވާކަމަށާއި، ގެއްލުންތައް ވަޒަންކޮށް ހާލުގައި ޖެހިފައިވާ ފަރާތްތައް ރައްކާތެރި ހިސާބުތަކަށް ބަދަލުކުރުމުގެ މަސައްކަތް ކުރަމުންދާކަމަށެވެ.

މިހާލަތުގައި ދިވެހިން ލަންކާއަށް ދެމުންދާ އެހީތެރިކަމާއި އެއްބާރުލުމަށް ސަފީރު މުހައްމަދު ރިޒްވީ ހަސަން ޝުކުރު އަދާކުރެއްވިއެވެ. ރިޒްވީ ވިދާޅުވީ ދިވެހި ސަރުކާރުން މިކަމުގައި އިސްނަންގަވައި ދެއްވި އެހީތެރިކަން ބަލައިގަންނަކަމަށެވެ.

" އަޅުގަނޑުމެންނަށް ތި ބަހައްޓަވާ ގާތްތަކަމާއި ދެއްވާ އެއްބާރުލުމަށް ޝުކުރު އަދާކުރަން. ޚާއްސަކޮށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމަށާއި މިކަން ކުރިއަށް ގެންދިއުމަށް ދެއްވާ އިރުޝާދަށް ޝުކުރު އަދާކުރަން. އަޅުގަނޑުމެން ވަރަށް ޝުކުރުވެރިވޭ ދިވެހިން ދެމުންދާ އެހީއަށާއި، އަދި ދިވެހިރާއްޖެގެ ރައީސްގެ މަސައްކަތަށް " ސަފީރު ވިދާޅުވިއެވެ.

ސަފީރުގެ ވާހަކަފުޅުގައި ދެ ޤައުމުގެ ގުޅުމަށްވެސް ވަނީ އަލިއަޅުއްވާފައެވެ. އެގޮތުން ދެ ޤައުމު ދެމެދު ޒަމާނުއްސުރެ އޮތީ އަޚުވަންތަ ގުޅުމެއް ކަމަށް ވިދާޅުވިއެވެ. އަދި ދިވެހިރާއްޖެއަކީ ލަންކާއަށް ދަތި އުނދަގޫތައް ކުރިމަތިލާންޖެހޭ ވަގުތުތަކުގައި އެންމެ އަވަހަށް ލަންކާއެކު އެއްބައިވަންތަކަން ހާމަކުރާ ޤައުމު ކަމަށް ވިދާޅުވިއެވެ. އަދި މިފަހަރުވެސް އެންމެ އަވަހަށް އެހީގެ އަތް ދިއްކޮށްލި އެއްބަޔަކީ ދިވެހިން ކަމަށް ސަފީރު ވިދާޅުވިއެވެ.

" އެންމެ ފުރަތަމަ އިސްކަމެއް ދެނީ ރައްޔިތުންގެ ރައްކާތެރިކަމަށް. ހާލުގައި ޖެހިފައިވާ ފަރާތްތަކުގެ އަސާސީ ބޭނުންތައް ފުއްދުމަށް. އަޅުގަނޑުމެންނަށް އެހީ ލިބެމުން އެބަދޭ. ރާއްޖެއިން އެންމެ ފުރަތަމަ އެހީ ފޯރުކޮށްދޭން ނިންމީ. ރައީސްގެ އިރުޝާދުގެ ދަށުން ޚާރިޖީ ވުޒާރާއިން ވަނީ އިއުލާންކޮށްފައި މާލީ ގޮތުން އަދި ވަސީލަތްތައް ފޯރުކޮށްދޭން. އަޅުގަނޑުމެން ވަރަށް ބޮޑަށް ބަލައިގަންނަން މިކަން " ސަފީރު ރިޒްވީ ހަސަން ވިދާޅުވިއެވެ.

ސަފީރު ވަނީ ދެ ޤައުމުގެ އަޚުވަންތަ ގުޅުމަކީ ދުވަހަކުވެސް ބަދަލެއް ނާންނާނެ އެކުވެރި ގުޅުމެއްކަން ފާހަގަކުރައްވާފައެވެ. އަދި ކުރިމަގުގައި ދެ ޤައުމު އެއް އެޖެންޑާއެއްގެ ދަށުން ބައިނަލްއަޤްވާމީ މައިދާނުގައި މޫސުމީ ބަދަލުތަކާއި ދެކޮޅަށް މަސައްކަތްކޮށް ތަރައްޤީވެފައިވާ ޤައުމުތަކަށް މިކަމުގެ ނުރައްކާ އަންގައި ދިނުމަށް މަސައްކަތް ކުރަންޖެހޭ ކަމަށް ވިދާޅުވިއެވެ. ސަފީރު ވިދާޅުވީ ލަންކާ އަދި ރާއްޖެއަކީވެސް ތިމާވެށީގެ މިފަދަ ކާރިސާތަކަށް ނާޒުކު ޤައުމުތަކަށް ވާއިރު މިފަދަ ކަންކަމުގައި ގުޅިގެން މަސައްކަތް ކުރަން ޖެހޭ ކަމަށެވެ.

ސަފީރު އިންޓަރވިއު ނިންމަވާލެއްވީ، ދިވެހިރާއްޖޭގެ ރައްޔިތުން ދެމުން ގެންދާ އެހީތެރިކަމަށް ޝުކުރު އަދާކުރައްވަމުންނެވެ.