ޚަބަރު

5 މިލިޔަން ގަސް ޕްރޮގުރާމް: ރާއްޖޭގެ ކޮންމެ ރަށެއްގައި 2 ހައިވަކަރު ގަސް


  • އަމާޒަކީ، މިއަހަރުގެ ތެރޭގައި 1 މިލިޔަން ގަސް އިންދުން

  • ވިލިމާލޭގައި 500 ގަސް އިންދުމަށް ވަނީ ހަމަޖެހިފައި

ސަރުކާރުން ކުރިއަށް ގެންދަވާ 5 މިލިޔަން ގަސް އިންދުމުގެ ޕްރޮގުރާމުގެ ދަށުން ރާއްޖޭގެ ކޮންމެ ރަށެއްގައި 2 ހައިވަކަރު ގަސް މިހާރު އިންދާފައިވާ ކަމަށް ފަތުރުވެރިކަމާއި ތިމާވެށްޓާއި ބެހޭ ވަޒީރު ޠާރިޤު އިބްރާހިމް ވިދާޅުވެއްޖެއެވެ.

ވަޒީރު މިހެން ވިދާޅުވީ، 5 މިލިޔަން ގަސް އިންދުމުގެ ޕްރޮގުރާމުގެ ދަށުން ކ. ވިލިނގިލީގައި ގަސް އިންދުމުގެ މަސައްކަތް ފެށުމުގެ ގޮތުން ދެއްކެވި ވާހަކަފުޅުގައެވެ.

ފަތުރުވެރިކަމާއި ތިމާވެށްޓާ ބެހޭ ވަޒީރު ޠާރިޤު އިބްރާހިމް ވިދާޅުވީ، ވިލިމާލޭގައި 500 ގަސް އިންދުމަށް ހަމަޖެހިފައިވާ ކަމަށެވެ. އަދި އޭގެ ތެރެއިން 150 ގަހަކީ، ހައިވަކަރު ގަސްކަން ފާހަގަކުރައްވަމުން ވަޒީރު ވިދާޅުވީ، މި ޕްރޮގުރާމްގެ ތެރެއިން ކޮންމެ ރަށެއްގައިވެސް ރާއްޖޭގައި ނެތެމުންދާ ގަސް ގަސް އިންދުމަށް ޚާއްސަ އިސްކަމެއް ދޭނެ ކަމަށެވެ. އެގޮތުން ކޮންމެ ރަށެއްގައި 2 ހައިވަކަރު ގަސް އިންދާފައިވާކަން ވަޒީރު ހާމަކުރެއްވިއެވެ.

އެމަނިކުފާނު ވިދާޅުވީ، އަމާޒަކީ މިއަހަރުގެ ތެރޭގައި 1 މިލިޔަން ގަސް އިންދުން ކަމަށެވެ. އަދި ހުޅުމާލޭގައި ނާސަރީ ހެެދުމުގެ މަސައްކަތްވެސް ކުރަމުންދާ ކަމަށާއި، މި ދައުރު ނިމޭއިރު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދާއި އެއްގޮތަށް 5 މިލިޔަން ގަސް އިންދާ ނިމޭނެ ކަމުގެ ޔަޤީންކަން އެބައޮތް ކަމަށްވެސް ތިމާވެށްޓާއި ބެހޭ ވަޒީރު ވިދާޅުވިއެވެ.

"މީހުން ދިރިއުޅޭ ކޮންމެ ރަށެއްގައި ހައިވަކަރު ގަސް ވަނީ އިންދިފައި. އަދި ރިސޯޓުތަކުގައިވެސް ހައިވަކަރު ގަސް އިންދުމުގެ މަސައްކަތް ކުރަމުން އެބަދޭ. އަދި ހުޅުމާލޭގައި ނަރސަރީއެއް ހެދުމުގެ މަސައްކަތް ކުރަމުންދާއިރު، އެތަނުން އެހެން ތަންތަނަށްވެސް ގަސް ފޯރުކޮށްދެވިގެންދާނެ." ވަޒީރު ވިދާޅުވިއެވެ.

5 މިލިޔަން ގަސް އިންދުމުގެ ޕްރޮގްރާމް ފެށީ، ރާއްޖެއިން ނެތެމުންދާ ގަސްތައް އަލުން އާލާކޮށް، ޤައުމުގެ ފެހިކަން އިތުރުކޮށް މާޙައުލީ ނިޒާމު ދެމެހެއްޓުމުގެ މަޤުޞަދުގައެވެ. މި ޕްރޮގުރާމް ރަސްމީކޮށް ފެށީ، 2024 ވަނަ އަހަރުގެ ދުނިޔޭގެ ތިމާވެށީގެ ދުވަހުއެވެ. އެއީ، ޖޫން މަހުގެ 5 ވަނަ ދުވަހެވެ. މި ޕްރޮގުރާމްގެ ދަށުން މިހާތަނަށް 819000 ގަސް ވަނީ އިންދާފައެވެ.