ފަރުދުންގެ ކަރާމާތް ރައްކާތެރިކުރުމަށް ހަމަހަމަކަމާއެކު ޞިއްޙީ އެހީ ލިބޭކަން ކަށަވަރުކުރަން ޖެހޭ: ރައީސް
-
އެއިޑްސް ބަލި ނައްތާލުމަކީ ބައިނަލްއަޤްވާމީ މުޖްތަމަޢުގެ ޒިންމާއެއްކަން ފާހަގަކުރެއްވި
-
މިއަހަރުގެ މިދުވަހުގެ ޝިޢާރަކީ "އުނދަގޫތަކުން އަރައިގަނެ، އެއިޑްސްއާ މެދު ދެކޭގޮތް ބަދަލުކުރުން"
ފަރުދުންގެ ކަރާމާތް ރައްކާކޮށް ހަމަހަމަކަމާއެކު ޞިއްޙީ އެހީތެރިކަން ލިބިގަތުމަށް ބައިނަލްއަޤްވާމީ ގުޅުންތައް އިތުރަށް ވަރުގަދަކުރަން މަސައްކަތް ކުރަންޖެހޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ، ދުނިޔޭގެ އެއިޑްސް ދުވަހާއި ގުޅިގެން މީސްމީޑިއާގައި ހިއްސާ ކުރެއްވި ޕޯސްޓެއްގައެވެ.
ދުނިޔޭގެ އެއިޑްސް ދުވަހާއި ގުޅިގެން މީސްމީޑިއާގައި ހިއްސާކުރެއްވި ޕޯސްޓުގައި ރައީސުލްޖުމްހޫރިއްޔާ ވަނީ މިއަހަރުގެ މިދުވަހުގެ ޝިޢާރު ކަމަށްވާ "އުނދަގޫތަކުން އަރައިގަނެ، އެއިޑްސްއާއި މެދު ދެކޭގޮތް ބަދަލުކުރުން" މިޝިޢާރުގެ މައްޗަށް އަލިއަޅުއްވާލައްވާފައެވެ. ރައީސުލްޖުމްހޫރިއްޔާ ވިދާޅުވީ އެއިޑްސް ބަލި ނައްތާލުމަކީ ވަކި ޤައުމަކަށް އެކަނި ކުރެވޭނެ މަސައްކަތެއް ނޫން ކަމަށާއި އެއީ ބައިނަލްއަޤްވާމީ މުޖްތަމަޢުގެ ޒިންމާއެއް ކަމަށެވެ.
ރައީސުލްޖުމްހޫރިއްޔާގެ ޕޯސްޓްގައިވަނީ ޞިއްޙީ ދާއިރާއިން މިއަހަރު ރާއްޖެ ހޯދާފައިވާ އެއް ކާމިޔާބީ ކަމަށްވާ މައިންގެ ފުށުން ދަރިފުޅަށް އެޗްއައިވީ، ސިފިލިސް އަދި ހެޕެޓައިޓިސް ބީ ޖެހުން އެއްކޮށް ނައްތާލެވުނު ފުރަތަމަ ޤައުމަކަށް ރާއްޖެވެގެން ދިއުން ފާހަގަކުރައްވާފައެވެ. މިކަމަކީ ހުރިހާ އެންމެންނަށް ހަމަހަމަކާއެކު ޞިއްޙީ ފަރުވާ ކަށަވަރުކުރުމަށް ސަރުކާރުން ގެންގުޅޭ ސިޔާސަތު ދައްކުވައިދޭ ކާމިޔާބީއެއް ކަމަށް އެމަނިކުފާނު ވިދާޅުވިއެވެ. އަދި ރާއްޖެއިން ހޯދާފައިވާ މިފަދަ ކާމިޔާބީތަކަކީ ބައިނަލްއަޤްވާމީ ގުޅުންތަކާއި އެއްބައިވަންތަކަމާއެކު ޢިލްމު ބަދަލު ކުރުމުގެ ތެރެއިން އެކުގައި އިޖާދީ ގޮތުން ކުރެވުނު މަސައްކަތުން ހާސިލްވި ކާމިޔާބީއެއް ކަމަށް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ، ބައިނަލްއަޤްވާމީ ގުޅުންތަކުގެ ތެރެއިން ހަމަހަމަކާއެކު ކޮންމެ ރައްޔިތަކަށްވެސް ޞިއްޙީ ފަރުވާ ކަށަވަރުކުރަން ޖެހޭ ކަމަށެވެ. އަދި މުޖްތަމަޢުގެ ނަޒަރިއްޔާ ބަދަލުކޮށް ކޮންމެ ފަރުދެއްގެވެސް ކަރާމަތް ރައްކާތެރިކުރުމަށް މިމަސައްކަތުގެ ތެރެއިން ބާރު އަޅަންޖެހޭ ކަމަށް ރައީސުލްޖުމްހޫރިއްޔާ ވިދާޅުވިއެވެ.
ދުނިޔޭގެ އެއިޑްސް ދުވަސް ފާހަގަކުރަން ފަށާފައިވަނީ މީގެ 37 އަހަރު ކުރިން 1988 ވަނަ އަހަރުއެވެ. މި ދުވަހަކީ މި ބައްޔާއި މެދު ހޭލުންތެރިކަން އިތުރުކޮށް ބަލި ފެތުރުން ކޮންޓްރޯލްކުރުމަށް، މަސައްކަތް ކުރުމުގެ މަޤްޞަދުގައި ފާހަގަކުރާ ދުވަހެކެވެ.