ގުޅިފަޅުގައި ޤާއިމްކުރާ "ލޭބަރ ޕާރކް" ތަރައްޤީކުރުމަށް ޝައުގުވެރިވާ ފަރާތްތަކަށް އެ ފުރުޞަތު ހުޅުއްވާލައިފިއެވެ.
ލޭބަރ ކްއާޓަރަކާއި، ކައްކާ ތަނަކާއި، މެސް ރޫމަކާއި މުނިފޫހިފިލުވުމަށް ޚާއްޞަ ތަންތަނާއެކު ތަރައްޤީކުރާ މި ލޭބަރ ޕާރކަކީ ރާއްޖޭގައި މަސައްކަތްކުރާ ބިދޭސީ މުވައްޒަފުން ދިރިއުޅޭނެ ރަނގަޅު މާޙައުލެއް ޤާއިމުކުރުމަށްޓަކައި ދިވެހި ސަރުކާރުގެ އިސްނެންގެވުމަށް ޤާއިމުކުރައްވާ ތަނެކެވެ.
ގުޅިފަޅުގައި ލޭބަރ ޕާރކެއް ޤާއިމުކުރުމަށް ޝައުޤުވެރިވާ ފަރާތްތަކަށް ގުޅިފަޅު އިންވެސްޓްމެންޓް ލިމިޓެޑުން ވަނީ އެކްސްޕްރެޝަން އޮފް އިންޓްރެސްޓް ހުށަހެޅުމުގެ ފުރުޞަތު އާންމުކޮށް ހުޅުވާލައްވާފައެވެ. އަދި މިކަމަށް ޝައުޤުވެރިވެލައްވާ ފަރާތްތަކުން ސެޕްޓެމްބަރުމަހުގެ 22 ވަނަ ދުވަހުގެ ކުރިން ކުންފުނީގެ ޕްރޮފައިލާއެކު އީ.އޯ.އައި ހުށަހަޅަންވާނެކަމަށް ގުޅިފަޅު އިންވެސްޓްމެންޓް ލިމިޓެޑުން ވިދާޅުވެއެވެ.
"ލޭބަރ ޕާރކް" ޤާއިމުކުރުމަށް އަންދާސީ ހިސާބު ހުށަހެޅުއްވުމަށް ހުޅުވާލެވޭނީ ހަމައެކަނި އީ.އޯ.އައި ހުށަހަޅާ ފަރާތްތަކަށް ކަމަށްވެސް ގުޅިފަޅު އިންވެސްޓްމެންޓް ލިމިޓެޑުން ބުނެއެވެ.