ބަންގްލަދޭޝްއިން ޤަވާއިދާ ޚިލާފަށް ރާއްޖެ އަންނަ ބިދޭސީންގެ ޢަދަދު މަދުކުރައްވައި، އެޤައުމުން ރާއްޖެ އަންނަ ބިދޭސީން އިތުރަށް މޮނިޓަރ ކުރެއްވުމަށް ކަނޑައަޅުއްވައި، އެކަން ބަންގްލަދޭޝްގެ އޭޖެންސީއަކާ ޙަވާލުކުރެއްވުމުގެ މަސައްކަތް ކުރައްވަމުން ގެންދަވާކަމަށް މޯލްޑިވްސް އިމިގްރޭޝަނުން ހާމަކުރައްވައިފިއެވެ.
ޕަބްލިކް ސަރވިސް މީޑިއާއަށް ދެއްވި ޚާއްޞަ އިންޓަރވިއުއެއްގައި އިމިގްރޭޝަންގެ ތަރުޖަމާނު ޙަސަން ޚަލީލް ވިދާޅުވީ ރާއްޖެއަށް މަސައްކަތް ކުރަން އަންނަ ބިދޭސީންގެ ބޮޑު އިންސައްތައެއް ޙިއްޞާ ކުރަނީ ބަންގްލަދޭޝްގެ ރައްޔިތުން ކަމަށާއި، މީގެ ތެރެއިން ޤަވާއިދާ ޚިލާފަށް އުޅޭކަމަށް ފާހަގަކުރެވިފައިވަނީވެސް ބަންގްލަދޭޝް ރައްޔިތުން ކަމަށެވެ. އެހެންކަމުން އެޤައުމުގެ ފަރާތަކާ ޙަވާލުކޮށްގެން ބަންގްލަދޭޝްއިން ރާއްޖެއަންނަ މީހުންގެ މައުލޫމާތު ހޯދައި، އެމީހުން އަންނަނީ ޤާނޫނާ ޤަވާއިދާ އެއްގޮތަށް ހޯދަންޖެހޭ ހުއްދަތައް ހޯދައިގެންކަން ކަށަވަރު ކުރުމުން ރާއްޖޭގައި ޤަވާއިދާ ޚިލާފަށް މަސައްކަތް ކުރާ ބިދޭސީންގެ ޢަދަދު މަދުވެގެންދާނެ ކަމަށް ޤަބޫލުކުރައްވާ ކަމަށް ޚަލީލް ވިދާޅުވިއެވެ. މިއީ އެފަދަ ފަރާތްތައް ރާއްޖެ އައުމަށްފަހު އެމީހުންގެ މަޢުލޫމާތު ކަށަވަރު ކުރުމަށް އިމިގްރޭޝަނުން ކުރާ މަސައްކަތަށް ލިބިގެންދާނެ ކުރިއެރުމެއް ކަމުގައި ޚަލީލް ވިދާޅުވިއެވެ.
2014 ވަނަ އަހަރުގެ ބޯހިމެނުމުގެ ތަފާސް ހިސާބުތަކުން ދައްކާ ގޮތުގައި ރާއްޖޭގައި 63،637 ބިދޭސީން ދިރިއުޅޭ ކަމަށް ރަޖިސްޓްރީ ކޮށްފައިވެއެވެ. ނަމަވެސް މިއަށްވުރެ މާގިނައިން ބިދޭސީން ރާއްޖޭގައި އުޅޭކަމަށް ޤަބޫލުކުރަންޖެހެއެވެ. އޭގެ ތެރޭގައި ގަވާއިދާ ޚިލާފަށް ރާއްޖޭގެ އެކި ސަރަޙައްދުތަކުގައި އުޅޭ ފަރާތްތައްވެސް މަދެއް ނޫނެވެ.
މިހާރު ރާއްޖޭގައި ތިބި ބިދޭސީންގެ ތެރެއިން ޤަވާއިދާ ޚިލާފަށް ރާއްޖޭގައި މަސައްކަތް ކުރަމުންދާ ބިދޭސީން ހޯދައި، އެމީހުން ރާއްޖެއިން ފޮނުވާލުމަށް ކުރަމުންދާ މަސައްކަތުގެ ދަށުން ރަށްރަށުގެ ރަށު ކައުންސިލްތަކާއި ގުޅިގެން އެފަދަ ފަރާތްތަކުގެ ދަފްތަރެއް އެކުލަވާލަމުންދާ ކަމަށް ޚަލީލް ވިދާޅުވިއެވެ. އަދި އިމިގްރޭޝަންގެ މުއައްޒަފުން އަތޮޅުތަކަށް ޒިޔާރަތްކޮށް އެފަދަ ފަރާތްތައް ހޯދައި ރާއްޖެއިން ފޮނުވާލުމުގެ މަސައްކަތްވެސް ކުރަމުންދާކަމުގައި ވިދާޅުވިއެވެ. މިފަދަ މަސައްކަތްތަކުގެ ތެރެއިން ރާއްޖޭގައި މަސައްކަތް ކުރުމަށް ޤަވާއިދާ ޚިލާފަށް ބިދޭސިން ރާއްޖެ ގެންނަ ފަރާތްތައް ފާހަގަކޮށް އެފަދަ ފަރާތްތަކާމެދު ޤާނޫނީ ފިޔަވަޅު އަޅަމުންދާކަމުގައި ވިދާޅުވިއެވެ. މޯލްޑިވްސް އިމިގްރޭޝަނުން ކުރައްވާ މިފަދަ މަސައްކަތްތަކަށް ކައުންސިލްތަކުގެ އެހީތެރިކަން ބޭނުންވާ ކަމަށާއި، ފުލުހުންގެ ފުރިހަމަ އެހީތެރިކަން ލިބެމުންދާ ކަމަށް އިމިގްރޭޝަނުން ވިދާޅުވެއެވެ.
މޯލްޑިވްސް އިމިގްރޭޝަނުން މުއައްޒަފުންތަކެއް ވަކިކުރިކަމަށް ބުނާ ވާހަކަތަކާއި ގުޅިގެން އިމިގްރޭޝަންގެ ތަރުޖަމާނު ވިދާޅުވީ އެޑިޕާޓްމެންޓަކީ ޔުނިފޯމް ބޮޑީއެއްކަމުގައި ވުމާއެކު އިމިގްރޭޝަނުން ޢަމަލުކުރާ އުސޫލުތަކާއި ޤަވާއިދުތަކެއް ހުންނަ ކަމަށާއި، އިމިގްރޭޝަންގެ ޤަވާއިދުތަކާ އުސޫލުތަކާ ޚިލާފުވާ މުއައްޒަފުންނާމެދު ފިޔަވަޅު އެޅުމުގެ މަސައްކަތް ޢާންމު އުސޫލުން ކުރައްވަމުންދާ ކަމަށެވެ. އަދި ޔުނީފޯމް ޤަވާއިދާ ޚިލާފުވެ، އެކަން އިސްލާޙް ކުރުމުގެ ފުރުޞަތު ދިނުމުންވެސް އިސްލާޙް ނުވި މުއައްޒަފުންތަކަކާމެދު ޢާންމު އުސޫލުން ފިޔަވަޅު އަޅާފައިވާނެ ކަމަށް ޚަލީލް ވިދާޅުވިއެވެ.