ދިވެހި ތެރަޕިސްޓުން ތަމްރީންކުރުމުގެ ޤައުމީ މަޝްރޫޢެއް ފަށަނީ

ދިވެހި ތެރަޕިސްޓުން ތަމްރީންކުރުމުގެ ޤައުމީ މަޝްރޫޢެއް ފެށްޓެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.

މަތީ ތަޢުލީމާއި މަސައްކަތްތެރިކަމާ ހުނަރުތައް ތަރައްޤީކުރުމާ ބެހޭ ވުޒާރާއިން ވިދާޅުވީ މި މަޝްރޫޢު ދަށުން 250 ދިވެހި ތެރަޕިސްޓުން ތަމްރީން ކުރުމަށް ނިންމާފައިވާކަމަށެވެ. އަދި މި މަޝްރޫޢު މިފެށޭ ޖެނުއަރީ މަހު ފެށުމަށް ހަމަޖެހިފައިވާކަމަށް އެ ވުޒާރާއިން ވިދާޅުވިއެވެ. މަތީ ތަޢުލީމާ ބެހޭ ވުޒާރާއިން ވިދާޅުވީ އެ މަޝްރޫޢުގެ ދަށުން ސްޕީޗް ތެރަޕިސްޓުންނާއި އޮކިއުޕޭޝަނަލް ތެރަޕިސްޓުންނާއި ބިހޭވިއަ ތެރަޕިސްޓުންގެ އިތުރުން ސައިކޯ ތެރަޕިސްޓުން ތަމްރީން ކުރުމަށް ހަމަޖެހިފައިވާކަމަށެވެ.

ތަފާތު ނުކުޅެދުންތެރިކަން ހުންނަ ފަރާތްތަކަށް މިފަދަ ތެރަޕީއަކީ މުހިއްމު އެއްޗަކަށްވެފައި ރަށްރަށުން ޚާއްސަކޮށް މި ޚިދުމަތް ލިބެން ނުހުރެއެވެ. ސްޕީޗް ތެރަޕީއާއި އޮކިއުޕޭޝަނަލް ތެރަޕީއަކީ ހެދިބޮޑުވުމުގައި މިފަދަ މައްސަލަތައް ހުންނަ ކުދިންނަށް ވަރަށް މުހިންމު ފަރުވާގެ ނިޒާމެކެވެ. ނަމަވެސް އިންސާނީ ވަސީލަތުގެ ދަތިކަމުގެ ސަބަބުން މިހާތަނަށްވެސް މި ޚިދުމަތްތައް ފޯރުކޮށްދިނުމުގައި ރާއްޖޭގައި ބޮޑެތި ގޮންޖެހުންތައް އެބަހުއްޓެވެ. އެހެންކަމުން ދަރުކާރުން ގެންދަވަނީ މި ޚިދުމަތްތައް އަތޮޅުތެރެއަށްވެސް ފުޅާކުރުމުގެ މަސައްކަތް ކުރަމުންނެވެ. މިގޮތުން މިވީ 2 އަހަރުގެ ތެރޭގައި މިފަދަ ޚިދުމަތްތައް އެކި އަތޮޅުތަކުގައި ފަށާފައިވާކަން ފާހަގަކޮށްލެވެއެވެ.

އެންސްޕާގެ ތަފާހިސާބުތަކުން ދައްކާ ގޮތުގައި މިދިޔަ މަހު ނުކުޅެދުންތެރިކަން ހުންނަ މީހުންގެ ތެރަޕީއަށް 12.4 މިލިޔަން ރުފިޔާ ޚަރދުކޮށްފައިވެއެވެ. އެންސްޕާގެ ތަފާސްހިސާބުތަކުން ދައްކާގޮތުގައި އުމުރުން 18 އަހަރުން ދަށުގެ 342 ކުއްޖަކަށް ތެރަޕިއުޓިކް ފާރުވާ ދިނުމަށް އެހީދީފައިވެއެވެ. މީގެ އިތުރުން އުމުރުން 18 އަހަރާއި 64 އަހަރާ ދެމެދުގެ 17 މީހުންނަށް އެހީތެރިކަން ފޯރުކޮށްދީފައިވެއެވެ. ތެރަޕީގެ ބާވަތުން ކުރި ޚަރަދަށް ބަލާއިރު އެންމެ ބޮޑު ޚަރަދެއްކޮށްފައިވަނީ ބިހޭވިއާ ތެރަޕީ ދިނުމަށެވެ. އެއީ 3.5 މިލިޔަން ރުފިޔާގެ އެހީއެވެ.