އަފްޣާނިސްތާނުގެ ވެރިރަށް ކާބުލްގައި ބާރުގަދަ ގޮވުމެއް ގޮވުމުގެ ސަބަބުން ގިނަ ޢަދަދެއްގެ މީހުން މަރުވެ އެތައް ބަޔަކަށް ޒަޚަމްވެއްޖެއެވެ.
އެ ގޮވުން ހިނގާފައި ވަނީ ޝަހްރުއްނައު ކިޔާ ސަރަޙައްދެއްގައެވެ. އެއީ ކާބުލްގެ އެންމެ ސަލާމަތީ ކަންކަން ވަރުގަދަ ކަމަށް ބެލެވޭ އެއް އަވަށެވެ. އެ އަވަށުގައި ގިނަ ޢަދަދެއްގެ ބޭރު މީހުން ދިރިއުޅެއެވެ. އެނގިފައިވާ ގޮތުގައި އެ ގޮވުން ގޮވާފައި ވަނީ އެ އަވަށުގައި ހުރި ހޮޓަލެއްގައެވެ.
އަފްޣާނިސްތާނުގެ ދާޚިލީ ވުޒާރާގެ ތަރުޖަމާނު، ޢަބްދުލް މަތީން ޣަނީ ވިދާޅުވީ ހާދިޘާގައި ގިނަ ޢަދަދެއްގެ މީހުން މަރުވެފައިވާ ކަމަށެވެ. ތަފްޞީލީ މަޢުލޫމާތު ފަހުން ޙިއްޞާކުރައްވާނެ ކަމަށް އޭނާ ވިދާޅުވިއެވެ. ކަމާބެހޭ އިދާރާތަކުން ދަނީ ހާދިޘާ ހިނގި ސަބަބު ތަހުޤީޤުކުރަމުންނެވެ.
އަފްޣާނިސްތާނަކީ ހަތިޔާރުއެޅި ޖަމާޢަތްތަކުން ބޮމުގެ ޙަމަލާތައް ދޭތެރެދޭތެރެއިން ދޭ ޤައުމެކެވެ. ނަމަވެސް މި ހާދިޘާއަކީ އެ ފަދަ ޙަމަލާއެއް ކަމަށް ސާފެއް ނުވެއެވެ. އެ ހާދިޘާގެ ޒިންމާ މިހާތަނަށް އެއްވެސް ޖަމާޢަތަކުން އުފުލާފައެއް ނުވެއެވެ.
2021ވަނަ އަހަރުގެ ތެރޭގައި އަފްޣާނިސްތާނުގެ ވެރިކަމާ ޠާލިބާނުން ޙަވާލުވި ފަހުން އެ ޤައުމުގައި ދޭ ޙަމަލާތަކުގެ ޢަދަދު ވަނީ މަދުވެފައެވެ. ނަމަވެސް އައިސިސްއާ ގުޅުންހުރި ބައެއް ޖަމާޢަތްތަކުން އަދި ވެސް އަފްޣާނިސްތާނުގައި ޙަރަކާތްތެރިވެއެވެ.