ޚިދުމަތް ފުޅާކުރުމަށް ޓެކްސީ ޤަވާއިދަށް އިޞްލާޙުތަކެއް

ޓެކްސީ ސެންޓަރު ރަޖިސްޓްރީ ކުރުމަށްޓަކައި ބޭނުންވާ އުޅަނދާއި، ޑްރައިވަރުންގެ އެންމެ މަދު އަދަދު 100 އިން 50 އަށް ދަށްކޮށްފިއެވެ.

ޚިދުމަތްތައް ރަނގަޅު ކުރުމަށާއި ފުރުޞަތުތައް ފުޅާކުރުމަށްޓަކައި ޓެކްސީ ޤަވާއިދަށް ވަނީ އިޞްލާޙުތަކެއް ގެނެސްފައެވެ.

މިނިސްޓްރީ އޮފް ޓްރާންސްޕޯޓް އެންޑް ސިވިލް އެވިއޭޝަނުން ވަނީ، ޓެކްސީ ޤަވާއިދަށް 4 ވަނަ އިޞްލާޙު ގެނެސް އާންމުކޮށްފައެވެ. މި ބަދަލުތަކަކީ އެއްގަމު ދަތުރުފަތުރުގެ ނިޒާމު ހަރުދަނާކޮށް، ޚިދުމަތް ދޭ ފަރާތްތަކަށާއި ޑްރައިވަރުންނަށް ލުއިފަސޭހަ ގޮތްތަކެއް ހޯދައިދިނުމަށް ގެނައި ބަދަލުތަކެކެވެ.

މިޤަވާޢިދަށް ގެނައި މައިގަނޑު އެއް ބަދަލަކީ، ޓެކްސީ ސެންޓަރެއް ރަޖިސްޓްރީ ކުރުމަށްޓަކައި ބޭނުންވާ އުޅަނދާއި ޑްރައިވަރުންގެ އެންމެ މަދު އަދަދު 100 އިން 50 އަށް މަދު ކުރުމެވެ. މީގެ ސަބަބުން އައު ސެންޓަރުތައް އުފެދުމަށް ހުރި ހުރަސްތައް ނެތިގޮސް، ގިނަ ބަޔަކަށް މި ދާއިރާއަށް ވަނުމުގެ ފުރުޞަތު ހުޅުވިގެންދާނެއެވެ. މީގެ ނަތީޖާއެއްގެ ގޮތުން މާކެޓުގައި ވާދަވެރިކަން އުފެދި، އާންމުންނަށް ލިބޭ ޚިދުމަތުގެ ފެންވަރު ރަނގަޅުވާނެ ކަމަށް ބެލެވެއެވެ.

މީގެ އިތުރުން، ލައިސަންސް އޮންނަ ޓެކްސީ ޑްރައިވަރުންނަށް އެއް ވަގުތެއްގައި ދެ ޓެކްސީ ސެންޓަރެއްގައި ރަޖިސްޓްރީވެގެން މަސައްކަތް ކުރުމުގެ ފުރުޞަތު މިހާރު ފަހިކޮށްދީފައިވާ ކަމަށާއި، މި ބަދަލުގެ ސަބަބުން ޑްރައިވަރުންނަށް ލިބޭ އާމްދަނީ އިތުރު ކުރުމަށް މަގުފަހިވާނެ ކަމަށް އެވުޒާރާއިން ވިދާޅުވިއެވެ. އަދި ޚިދުމަތަށް އެންމެ ބާރުބޮޑުވާ ވަގުތުތަކުގައި ޑިމާންޑާ އެއްވަރަށް ޚިދުމަތް ފޯރުކޮށްދިނުމަށް ސެންޓަރުތަކަށް އިތުރު ފަސޭހައަކަށް ވެގެންދާނެ ކަމަށްވެސް ވިދާޅުވެއެވެ.

ދަތުރުވެރިންގެ ރައްކާތެރިކަން ކަށަވަރު ކުރުމަށްޓަކައި، މޮބައިލް އެޕްލިކޭޝަން ނުވަތަ އޮންލައިން ޕޯޓަލްތައް މެދުވެރިކޮށް ޓެކްސީ ޚިދުމަތް ދޭން ބޭނުންވާ ފަރާތްތަކުން މިނިސްޓްރީގެ ޚާއްޞަ ހުއްދައެއް ހޯދަންޖެހޭނެ ކަމަށްވެސް މި އިޞްލާޙުގައި ބަޔާންކޮށްފައިވެއެވެ. މިގޮތަށް ހުއްދަ ހޯދައިގެން ޑިޖިޓަލް ޚިދުމަތް ދިނުމަކީ، ޚިދުމަތްދޭ ފަރާތްތައް ޖަވާބުދާރީ ކުރުވުމަށް ލިބޭ ބާރެއް ކަމަށް އެ ވުޒާރާއިން ވިދާޅުވިއެވެ.

ހަމައެއާއެކު، ކުންފުންޏަކުން ދަތުރުފަތުރުގެ ޚިދުމަތް ދޭނަމަ، އެކަމަކީ އެ ފަރާތެއްގެ މެންޑޭޓުގައި ހިމެނޭ ކަމެއްކަން ކަށަވަރު ކުރަންޖެހެއެވެ. އަދި އެފަދަ ފަރާތްތަކުންވެސް ޤަވާއިދާ އެއްގޮތަށް ރަޖިސްޓްރީކޮށް ހުއްދަ ހޯދުން ލާޒިމްވާނެ ކަމަށްވެސް ބަޔާންކޮށްފައިވެއެވެ.

މި ހުރިހާ ބަދަލުތަކެއްގެ މައިގަނޑު އަމާޒަކީ ފަސިންޖަރުންނާއި ޚިދުމަތްދޭ ފަރާތްތަކަށްވެސް މަންފާކުރާނެ، އިތުބާރު ހުރި އަދި ޒަމާނީ ޓެކްސީގެ ނިޒާމެއް ރާއްޖޭގައި ޤާއިމުކުރުން ކަމަށް ދަތުރުފަތުރާ މަދަނީ އުދުހުންތަކާ ބެހޭ ވުޒާރާއިން ވިދާޅުވެއެވެ.