އުސްގެކޮޅު އިމަރސިވް މިއުޒިއަމަކަށް ބަދަލު ކުރުމުގެ މަސައްކަތް ފަށައިފި
-
މިތަން ތަރައްްޤީކުރަނީ ޒަމާނީ ވަސީލަތްތަކާއެކު
-
ރާއްޖޭގެ ތަރިކައިގެ ދާއިރާއަށް އިންޤިލާބީ ބަދަލެއް އަންނާނެ
އުސްގެކޮޅު އިމަރސިވް މިއުޒިއަމެއްގެ ގޮތުގައި ތަރައްޤީ ކުރުމުގެ މަސައްކަތް ފަށައިފިއެވެ.
ދިވެހިބަހާއި ސަޤާފަތާއި ތަރިކައާބެހޭ ވުޒާރާއިން އިމަރސިވް މިއުޒިއަމެއްގެ ގޮތުގައި އުސްގެކޮޅު ތަރައްޤީ ކުރުމުގެ މަސައްކަތް ޙަވާލުކޮށްފައިވަނީ ފަހި ދިރިއުޅުން ކޯޕަރޭޝަން، އެފްޑީސީއާއެވެ.
އުސްގެކޮޅު އިމަރސިވް މިއުޒިއަމެއްގެ ގޮތުގައި ތަރައްޤީ ކުރުމުގެ މަޝްރޫޢަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދިވެހި ތަރިކަ އިޔާދަ ކުރުމާއި، ދިވެހި ތަރިކައިގެ ދާއިރާ ތަރައްޤީ ކުރުމާއި، ދިވެހީންނަށް އޭގެ ހަޤީގީ މާނައިގައި ތަރިކަ ރައްދު ކޮށްދެއްވުމަށް ގެންގުޅުއްވާ ސިޔާސަތުގެ ތެރެއިން ކުރައްވާ މަސައްކަތެކެވެ.
އުސްގެކޮޅު އިމަރސިވް މިއުޒިއަމެއްގެ ގޮތުގައި ތަރައްްޤީ ކުރަނީ، ހުރިހާ ޢުމުރު ފުރާއަކަށް ފެތޭގޮތަށް އެންމެ ޒަމާނީ ވަސީލަތްތަކާ އެކުގައެވެ. މި މަޝްރޫޢުގެ މަސައްކަތް ނިމުމާއެކު ދިވެހިން ތަރިކައާމެދު ދެކެމުން އަންނަ ގޮތް ބަދަލުވެގެންދާނެ ކަމަށް ސަރުކާރުން ޤަބޫލު ކުރައްވައެވެ.
މި މަޝްރޫއުގެ މަސައްކަތާ ގުޅޭގޮތުން ވާހަކަ ދައްކަވަމުން ދިވެހިބަހާއި ސަޤާފަތާއި ތަރިކައާބެހޭ ވަޒީރު އާދަމް ނަސީރު އިބްރާހިމް ވިދާޅުވީ، މިއީ ރާއްޖޭގެ ތަރިކައިގެ ދާއިރާއަށް އިންޤިލާބީ ބަދަލެއް ގެންނަވަން ރައީސުލްޖުމްހޫރިއްޔާ ފައްޓަވާފައިވާ މަސައްކަތުގެ ތެރެއިން ޚާއްޞަ މަސައްކަތެއް ކަމަށެވެ. އަދި އުސްގެކޮޅު ތަރައްޤީ ކުރެވޭނީ، ތަރިކައިގެ ދާއިރާއާ ގުޅިފައިވާ އެމަނިކުފާނު އިއުލާންކޮށްފައިވާ ޚާއްޞަ ސިޔާސަތުތަކާ އެގޮތަށް ކަމަށްވެސް ވަޒީރު ވިދާޅުވިއެވެ.
"އޭގެ ތެރޭގައި ތަރިކަ، ޒަމާނީ ކުރިއެރުންތަކާއެކު ޒަމާނީ ޓެކްނޮލޮޖީއާއެކު ހުށަހެޅޭނެ. އަދި ތަރިކައިގެ އަސަރުތައް ދިވެހިންގެ ތަޖުރިބާގެ ތެރެއަށް ޒަމާނީ ޓެކްނޮލޮޖީގެ އެހީގައި ގެނައުން. ހަމައެހެންމެ ތަރިކައިގެ ދާއިރާއަކީ އާމްދަނީ ލިބޭ، ޢިލްމީ މިންގަނޑުތަކަކުން ތަރުޖަމާ ކުރެވޭ ދާއިރާއަކަށް ބަދަލުވާނެ ގޮތަށް އުސްގެކޮޅު އިންޓަރެކްޓިވް އިމަރސިވް މިއުޒިއަމަކަށް މި ހެދެނީ،" ދިވެހިބަހާއި ސަޤާފަތާއި ތަރިކައާބެހޭ ވަޒީރު ވިދާޅުވިއެވެ.
ދިވެހިރާއްޖޭގެ ފުރަތަމަ އިންޓަރެކްޓިވް އިމަރސިވް މަޝްރޫޢުގެ މަސައްކަތް ފެށުން#MODLCH#FDC pic.twitter.com/RitbHpmNpt
— Fahi Dhiriulhun Corporation Limited (@Fdc_mv) January 30, 2026
އިމަރސިވް މިއުޒިއަމްތަކަކީ، އެތަނަށް ޒިޔާރަތް ކުރާ ފަރާތްތަކަށް ބައިވެރިވެވޭ ގޮތަށް ޒަމާނީ ޓެކްނޮލޮޖީގެ އެހީގައި ފަރުމާކޮށްފައިވާ މިއުޒިއަމްތަކެކެވެ. މިއީ، ދުނިޔޭގައި މަޤްބޫލުކަން ހޯދަމުން އަންނަ ތަންތަނެވެ.
ދިވެހިންގެ ތަރިކަ ޙިމާޔަތް ކުރެއްވުމަކީ، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސަރުކާރުން ޚާއްޞަ އިސްކަމެއް ދެއްވާ މަސައްކަތެކެވެ. ސަރުކާރުން ދަނީ، ތަރިކަ ޙިމާޔަތްކޮށް ބެލެހެއްޓުމުގެ އިތުރުން ތަރިކައަށް ޙައްޤު ޢިއްޒަތް ދީ، ތަރިކަ ބެލެހެއްޓުމުގެ މަސައްކަތަށް ފަންޑު ކުރެވޭނެ ގޮތްތަކެއް މަގުފަހި ކުރުމުގެ ޕްލޭންތަކެއް އެކުލަވާލައި، ތަންފީޒު ކުރައްވަމުންނެވެ.
ރާއްޖޭގެ އެކި ކަންކޮޅުތަކުގައި ހުރި ޒަމާންވީ ތަރިކަތައް ޙިމާޔަތް ކުރުމުގެ މަސައްކަތް ދިވެހިބަހާއި ސަޤާފަތާއި ތަރިކައާބެހޭ ވުޒާރާއިން މިހާރުވެސް އަންނަނީ ކުރައްވަމުންނެވެ.