"ރާއްޖޭގެ ފަތުރުވެރިކަމުގެ ބޮޑު ދައުރެއް އަދާކުރީ އައިޓީބީ"

ރާއްޖޭގެ ފަތުރުވެރިކަން މިހާރު އޮތް ހިސާބަށް އައުމުގައި އެންމެ ބޮޑު ދައުރެއް އަދާކުރީ އައިޓީބީ ބާލިން ކަމަށް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ، މަޓީގެ ޗެއަރމަން ހުސެއިން އަފީފް ވިދާޅުވެއްޖެއެވެ.

އައިޓީބީ ފެއަރގެ ތެރެއިން ޕީއެސްއެމް ނިއުސްއަށް ދެއްވި ޚާއްސަ އިންޓަވިއުއެއްގައި އަފީފް ވަނީ މިފަދަ ބޮޑު މާކެޓް ޕްލޭސްއެއްގައި ރާއްޖެއިން ބައިވެރިވުމުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ.

ޕީއެސްއެމް ނިއުސްއަށް ދެއްވި ޚާއްސަ އިންޓަވިއުއެއްގައި މަޓީގެ ޗެއަރމަން ހުސެއިން އަފީފް ވިދާޅުވީ ކުރިން ރާއްޖޭގެ ފަތުރުވެރިކަން ހަމައެކަނި ރިސޯޓުތަކަށް ބަރޯސާވި ނަމަވެސް، މިހާރު ގެސްޓް ހައުސްތަކާއި އާއިލާތަކާއެކު ޗުއްޓީ ހޭދަކުރެވޭނެ ގޮތަށް މިސިނާޢަތް ސިންދަފާތު ކުރެވިފައިވާ ކަމަށެވެ.

"ރާއްޖޭގެ ފަތުރުވެރިކަމަށް މިހާރު އައިސްފައި ހުރި ހުރިހާ ބަދަލުތަކަކީވެސް މިތަންތަނަށް އައިސްގެން ކުރި މަސައްކަތްތަކުން ނޫންތޯ. އައިޓީބީ މުޅީ އެކީގައި އޮންނަތާ މިވީ 60 އަހަރު. އަޅުގަނޑުމެން އަތުވެއްޖެން އޭގެ 45 އަހަރު ކަހަލަ ގޮތަަކަށް. މިއަދު އެހުރީ މިތަނަށް އައިސްގެން އައިސްފަ ހުރި ބަދަލުތައް." މަޓީގެ ޗެއަރމަން ހުސެއިން އަފީފް ވިދާޅުވިއެވެ.

އަފީފް ވިދާޅުވީ، ތަރައްޤީވަމުން އަންނަ ރާއްޖޭގެ ފަތުރުވެރިކަމުގެ ސިނާޢަތަށް އައިސްފައިވާ ބަދަލުތައް އައިޓީބީގައި ބައިވެރިވެ މުޅި ދުނިޔެއަށް އަދިވެސް ކިޔައިދޭން ޖެހޭ ކަމަށެވެ.

މަޓީގެ ޗެއަރމަން ހުސެއިން އަފީފް ވިދާޅުވީ އައިޓީބީއަކީ މުޅި ދުނިޔޭގައިވެސް ބާއްވާ އެންމެ ބޮޑު ފެއަރ ކަމަށާއި، ދުނިޔޭގެ އެކި ހިސާބުތަކުން ހޮޓާތަކާއި ގެސްޓްހައުސްތައް ވިއްކުމަށް މިތަނަށް ޖަމާވާ ކަމަށެވެ. އެހެންކަމުން، ރާއްޖޭގެ އުފެއްދުންތައް ދުނިޔެއަށް ދައްކާލުމަށް މި މާރުކޭޓުގައި ރާއްޖެ އޮތުމަކީ މަޖުބޫރު ކަމެއްގެ ގޮތުގައި އަފީފް ސިފަކުރެއްވިއެވެ.

"މިސާލަކަށް އަޅުގަނޑުމެން ވިސްނަވާ ރާއްޖޭގެ ވެރިރަށް މާލެއަށް. ރަށްރަށުން ގެންނަ ހުރިހާ ކަރާ، ފަޅޯ، މި ހުރިހާ އެއްޗެއްވެސް މި ހުންނަނީ މާރުކޭޓަށް ލާފަ، އެކަމު އެމާރުކޭޓުގައި ނީންނަ މީހާއަށް ވަރަށް ބޮޑަށް ގެއްލުންވާނެ އެދެއްތޯ. އެގޮތުން ވިސްނާއިރު އަޅުގަނޑުމެން ކޮންމެހެންވެސް ތިބެންޖެހޭ މިތާގަ." މަޓީގެ ޗެއަރމަން ހުސެއިން އަފީފް ވިދާޅުވިއެވެ.

އަފީފް ވިދާޅުވީ، ދުނިޔޭގެ އެހެން މަންޒިލްތަކެކޭ އެއްގޮތަށް ރާއްޖެއިންވެސް މި ފެއަރގައި ބައިވެރިވަނީ ރާއްޖޭގެ ފަތުރުވެރިކަން އިސްތިހާރުކުރުމުގެ މަޤްޞަދުގައި ކަމަށެވެ.

"އަޅުގަނޑުމެން މިތަނަށް އައިސްގެން މިއުޅެނީ ރާއްޖެ ވިއްކަން. ރާއްޖެއަށް އަންނަ މީހުން އިތުރުކުރަންވެގެން. ރާއްޖޭގެ އެކި އެކި ރިސޯޓުތަކާއި ގެސްޓް ހައުސްތަކާއި އަދި އެހެނިހެން ޕްރޮޑަކްޓްތައް އިސްތިހާރުކުރުމަށް،" އަފީފް ވިދާޅުވިއެވެ.

މިއަހަރުގެ އައިޓީބީ ބާލިންގައި ރާއްޖޭގެ 67 ކުންފުންޏަކުން 159 ފަރާތަކުން އަންނަނީ ރާއްޖެ ތަމްސީލުކުރަމުންނެވެ. މީގެ ތެރޭގައި ރާއްޖޭގެ މަޝްހޫރު ރިސޯޓުތަކާއި، ގެސްޓް ހައުސްތަކާއި، ސަފާރީ އުޅަނދުފަހަރުގެ އިތުރުން ޓްރެވަލް އެޖެންސީތައް ހިމެނެއެވެ.