ޖޮއިންޓް ގޯތިން ވަކިވާން ބޭނުންވާ މީހުންގެ އުޞޫލު ޢާއްމުކޮށްފި

ބިންވެރިޔާ ސްކީމުގެ ދަށުން ޖޮއިންޓްކޮށް ގޯތި ލިބުނު މީހުން ގޯތި ދޫކޮށްލާ، ވަކިން ގޯއްޗަށް ކުރިމަތިލާން ބޭނުންވާ މީހުންނަށް އެ ފުރުޞަތު ހުޅުވާލުމުގެ އުސޫލު ޢާއްމުކޮށްފިއެވެ.

އިމާރާތް ކުރުމާއި ގެދޮރުވެރިކަމާ ބިނާރާ ބެހޭ ވުޒާރާއިން ވިދާޅުވީ، ފޯމު ހުށައެޅުމަށް ހުޅުވާލާނީ މާރިޗު މަހުގެ 24 ވަނަ ދުވަހު ކަމަށެވެ. ޖޮއިންޓްކޮށް ގޯތި ލިބުނު މީހުންނަށް، ވަކިވުމަށް ހުށައެޅޭ ކެޓަގަރީއަކީ، "ބިންވެރިޔާ" އަށް ޚާއްސަ ސްކީމެކެވެ.

އުސޫލުގައި ބުނާގޮތުން، ވަކިން ގޯއްޗަށް ކުރިމަތިލެވޭނީ ބިންވެރިޔާ ސްކީމުގެ ދަށުން ޖޮއިންޓްކޮށް މާލެ ސަރަޙައްދުން ބަންޑާރަ ގޯތި ލިބިފައިވާ އެންމެހައި ފަރާތްތަކުން، އެ ގޯތި ދޫކޮށްލާނެ ކަމަށް އެއްބަސްވެ އިޤުރާރުވުމުންނެވެ.

މިގޮތަށް ފުރުޞަތު ދޭން ނިންމީ، ޖޮއިންޓްކޮށް ގޯތި ލިބުނު ބައެއް މީހުން އެގޮތަށް އެދެމުންދާތީއާއި ކޮންމެ އާއިލާއަކަށްވެސް ވަކި ބޯހިޔާވަހިކަމެއް ހުރުމުގެ ފުރުޞަތު ދިނުމަށް ކަމަށް ގެދޮރުވެރިކަމާ ބެހޭ ވަޒީރު ޑރ.ޢަބްދުﷲ މުއްޠަލިބު ނޫސްވެރިންގެ ބައްދަލުވުމުގައިވެސް ފާހަގަކޮށްފައިވެއެވެ.

މިއުސޫލުގެ ދަށުން ދޫކުރާނީ، ރަސްމާލެއިން 1250 އަކަފޫޓުގެ ގޯއްޗެވެ. މި ސްކީމް ބަހާލާފައިވަނީ، މައިގަނޑު ދެ ކެޓަގަރީއަކަށެވެ.

ކެޓަގަރީ 1: ބިންވެރިޔާ ސްކީމުގެ ދަށުން ޖޮއިންޓް އެޕްލިކޭޝަން ހުށަހަޅައިގެން ގޯތި ލިބުނު ފަރާތްތައް

ގޯއްޗަށް އެދި ހުށަހަޅަންވާނީ، ބިންވެރިޔާ ސްކީމުގެ ދަށުން ގޯތި ލިބުނު އެންމެހައި ފަރާތްތަކުން ޖޮއިންޓުކޮށް 1 އެޕްލިކޭޝަނެކެވެ.

ކެޓަގަރީ 2: ފުލެޓެއް ލިބިފައި އޮތުމުގެ ސަބަބުން ބިންވެރިޔާ ސްކީމަށް ކުރިމަތި ނުލެވުނު ފަރާތްތައް

ކެޓަގަރީ 2އިން ކުރިމަތިލާ މީހުން މި އުސޫލުގެ ދަށުން ގޯތި ލިބި، އެ ގޯތި ޙަވާލުކުރުމާއެކު ސަރުކާރުން ހިންގައިފައިވާ އަސާސީ ބޯހިޔާވަހިކަމުގެ ސްކީމަކުން އެ މީހަކަށް ލިބިފައިވާ ފުލެޓު ދޫކޮށްލާނެ ކަމަށް އެއްބަސްވެ އިޤުރާރުވާން ޖެހޭނެއެވެ.

މި ދެ ކެޓަގަރީއަށް ފޯމު ހުށައެޅުމާއި ގުޅޭ އުސޫލު މިހާރު ވަނީ ގެޒެޓުކޮށްފައެވެ. މި އުސޫލުގައި ޕޮއިންޓް ދޭނެ ގޮތްވެސް ވަނީ ހިމަނާފައެވެ.

އެޕްލިކޭޝަން ހުށައެޅުމަށް ހުޅުވާލަން ނިންމާފަވަނީ، މިމަހުގެ 24 ވަނަ ދުވަހުއެވެ. އަދި ފޯމު ހުށައެޅުމުގެ މުއްދަތު ހަމަވާނީ، އޭޕްރިލް މަހުގެ 30 ވަނަ ދުވަހުއެވެ. ފޯމު ހުށައެޅޭނީ، "ބޯހިޔާވަހިކަން" ޕޯޓަލް މެދުވެރިކޮށެވެ.