ފުރަތަމަ ގައުމީ ކެޕްޓަންގެ އިލްތިމާސްއެއް ޒުވާން ޓީމަށް!

ގަދަ ހިތްވަރާއި އަޒުމަކާއެކު ކުޅެ މޮޅުވާން ހިތްވަރުކުރުމަށް، ކުރިޔަށްއޮތް ސާފް ޗެމްޕިއަންޝިޕުގައި ވާދަކުރާ ރާއްޖޭގެ ޒުވާން ޤައުމީ ޓީމަށް، ޤައުމީ ފުޓުބޯޅަ ޓީމުގެ އެންމެ ފުރަތަމަ ކެޕްޓަން، އިބްރާހީމް އިސްމާއީލް އިލްތިމާސް ކުރައްވައިފިއެވެ.

ޤައުމީ ޓީމަށް ކުޅުމުގެ އިތުރުން ފުޓުބޯޅައާއި އެކި ކުޅިވަރުތަކަށް އަގުހުރި ހިދުމަތްތަކެއް ކޮށްދެއްވާފައިވާ އިބްރާހީމް އިސްމާއީލް، ޕީއެސްއެމް ނިއުސްއަށް ދެއްވި ހާއްސަ އިންޓަވިއުއެއްގައި ވިދާޅުވީ، ޤައުމީ ޓީމަށް ކުޅުމަކީ އާދައިގެ ކަމެއް ނޫން ކަމަށާއި، އެއީ ވަރަށް ބޮޑު ކަމެއް ކަމަށެވެ. އެހެންކަމުން ޒުވާން ޤައުމީ ޓީމުގެ ކުޅުންތެރިން އެހެން ކުދިންނަށް ނަމޫނާއަކަށް ވާންޖެހޭނެ ކަމަށެވެ.

ބައިނަލްއަގްވާމީ މެޗެއްގައި ރާއްޖޭގެ ފުރަތަމަ ކެޕްޓަން ބޭންޑުގައި ނިކުތް ކުރީގެ ކެޕްޓަން ވިދާޅުވީ ޤައުމީ ޓީމަށް ހޮވުން އެއީ ކުޅިވަރުގައި ލިބޭނެ އެންމެ މަތީ ޝަރަފުކަމަށެވެ.
އަދި 17 އަހަރުން ދަށާއި، 19 އަހަރުންދަށުގެ ގައުމީ ޓީމުގައި މިހާރު މިތިބަ ކުދިންނަކީ ހުނަރުވެރި ކުދިންތަކެއްގެ ތެރެއިން ފުރޭނިގެން އައިސްތިބި ވަރަށް މޮޅު ކުޅުންތެރިންތަކެއް ކަަމަށް ފާހަގަކުރެވޭކަމަށެވެ. އަދި ގައުމު ތަމްސީލުކުރުމުގައި މޮޅުވުމުގެ އަޒުމާއި ހިތްވަރު ދޫކޮށްނުލުމަށް އެކުދިންނަށް އިލްތިމާސް ކުރެއްވިއެވެ.

"ދެރަވާ ދުވަސްވެސް އަންނާނެ މޮޅުވާ ދުވަސްވެސް އަންނާނެ. އެކަމަކު ތިޔަ ކުދިންނަކީ ފުރޭނިގެން ހުނަރުވެރި ކުޅުންތެރިންގެ ތެރެއިން ހޮވިގެން އައިސްތިބި ކުދިންތަކެކޭ. އަޅުގަނޑުމެން ކުޅުން އިރާއި ވަރަށް ތަފާތު. މިހާރު ކުޅުންތެރިންނަކީ ވަރަށް ހުނަރުވެރި ވަރަށް މޮޅު ކުދިންތަކެއްގެ ގޮތުގައި އަޅުގަނޑަށްވެސް ފާހަގަކުރެވިގެންދޭ. އަޅުގަނޑު އެކުދިންނަށް ހަމަ ދަންނަވާލަނީ ޤައުމު ތަމްސީލުކުރާ ކަމަށް ވަނީވިއްޔާ ގަދަ ހިތްވަރާއި އަޒުމަކާއެކުގައި ކުޅެންވާނެއޭ" އިބްރާހީމް އިސްމާއީލް ވިދާޅުވިއެވެ.

ކުރީގެ ޤައުމި ޓީމުގެ ކުޅުންތެރިއެއްގެ ހައިސިއްޔަތުން އިބްރާހިމް އިސްމާއިލްވަނީ ޒުވާން ޓީމުގެ ކުޅުންތެރިންގެ ވިސްނުން ގެންގުޅެންވީ މޮޅުވުމަށް ކަމަށް ބުނެ ޤައުމީ ޓީމުގެ ކުޅުންތެރިންނަށް ހިތްވަރު ދެއްވާފައެވެ.

ކޯޗުންގެ އިރުޝާދުތައް ވަރަށް ރަނގަޅަށް އަޑުއަހާ ޕްރެކްޓިސްތަކަށް ވަރަށް ރަނގަޅަށް ސަމާލުކަންދިނުމަށް އިތްލިމާސް ކުރެއްވިއެވެ. މީގެ އިތުރުން ގަޑިއަށް ސަމާލުވެ މެޗަށް ނިކުތުމުގެ ކުރީގައި މާތް ﷲގެ ކިބަފުޅަށް ކާމިޔާބަށް އެދި ދުޢާކުރުމަކީ އޮންނަންވާނެ ކަމެއްކަމަށްވެސް އޭނާ ވިދާޅުވިއެވެ.

"އެއްވެސް ކުއްޖަކު ތިމަންނައަށްވުރެ މާ މޮޅެތި ޓީމުތަކެއް އެބަތިއްބޭ. އެ ފިކުރުގައި އެ ވިސްނުން ނުގެންގުޅެންވީ. ގެންގުޅެންވީ ވިސްނުމަކީ ތިމަންނަ މިކުޅެނީ ގައުމަށޭ. ތިމަންނައަށް ކުރެވުނު އެންމެ ގަދަ ހިތްވަރަކާއެކު ގައުމަށް ރީތިނަމެއް ހޯދައިދިނުމަށްޓަކައި ކުޅޭނަމޭ. އެހެންވީމާ އެގޮތަށްމަސައްކަތް ކުރާށޭ. އަޅުގަނޑުވެސް މަސައްކަތްކުރީ ފުޓުބޯޅަ ކުޅުނުއިރު ގަދަ ހިތްވަރާއި އަޒުމަކާއެކު ޓާގެޓެއް ކަނޑައަޅައިގެން" ކަމަށް އިބްރާހިސް އިސްމާއިލް ވިދާޅުވިއެވެ.

މާޗް 23 ން އޭޕްރީލް 3 ށް މާލޭގައި ބާއްވާ ސާފް ޗެމްޕިއަންޝިޕް ރާއްޖޭގައި ބާއްވާތީ ދިވެހި ޓީމަށް ވަރަށް ބޮޑެތި ފައިދާތަކެއް ކުރާނެކަމަށް އޭނާ ފާހަގަކުރެއްވިއެވެ.

"އެއީ އަޅުގަނޑުމެންގެ ސަޕޯޓަރުންނަށް ތިބޭނީ ވަށައިގެން. އަޅުގަނޑަށް ހަމަ ޔަގީން އަޅުގަނޑުމެންގެ ސްޓޭޑިއަމަށް ވަރަށް ގިނަ އަދަދެއްގެ މީހުންދާނެ، ފުޓްބޯޅައަކީ ގައުމީ ކުޅިވަރުތަކުގެ ތެރެއިން އެއްނަމްބަރު ކުޅިވަރު. އެކުދިންނަށް ލިބޭ ހިތްވަރަކަށްވެސް ވެގެންދާނެ" އިބްރާހިމް އިސްމާއިލް ވިދާޅުވިއެވެ.

ގަދަ ހިތްވަރާއެކު ޤައުމަށް ރީތި ނަމެއް ހޯދައިދޭން މަސައްކަތް ކުރަން އަޒުމުގައި ނިކުތުމަށް އިލްތިމާސް ކުރައްވާ އިބްރާހިމް އިސްމާއިލް ވިދާޅުވީ ﷲގެ ރަހުމަތްފުޅުން އެކުދިންނަށް ކާމިޔާބު ލިބޭނެ ކަމަށެވެ. އަދި ކާމިޔާބު ނުލިބުނުނަމަވެސް ގަދަ ހިތްވަރާއި އަޒުމަކާއެކު ގައުމަށް ރީތިނަން ހޯދައިދިނުމުގެ ވިސްނުމުގައި ކުޅުމަށް ކުޅުންތެރިންނަށް އިލްތިމާސް ކުރެއްވިއެވެ.

އިބްރާހިމް އިސްމާއިލަކީ ފުޓުބޯޅަ ކުޅުއްވުމުގެ އިތުރަށް ރެފްރީކަމާއި މެޗު ކޮމިޝަނަރުކަންވެސް ކުރައްވާފައިވާ ބޭފުޅެކެވެ. އަދި ފީފާގެ ބައްދަލުވުންތަކުގައި ރާއްޖެ ތަމްސީލުކޮށްދެއްވާފައިވާ އެފްއޭއެމްގެ ހިދުމަތްތެރިއެކެވެ.

އޭނާވަނީ އެފްއޭއެމްގެ ޖެނެރަލް ސެކެއްޓްރީގެ މަގާމުވެސް ފުރުއްވާފައެވެ. އޮލިމްޕިކް ކޮމިޓީގެ ނައިބު ރައީސް ކަމާއި، ހޭންޑްބޯލް މޯލްޑިވްސްގެ ރައީސްކަމާއި، ނޭޝަނަލް ސްޕޯޓްސް ކައުންސިލްގެ ރައީސްކަން ވެސް އޭނާ އަދާކުރެއްވިއެވެ.

އެ މާގާމުގައި ހުންނެވުމަށްފަހު ރަސްމީކޮށް ރިޓަޔަރ ކުރެއްވީ 2020 ވަނަ އަހަރުގެ ސެޕްޓެމްބަރުގައެވެ. ޓެނިސް އެސޯސިއޭޝަނާއި ކުރިކެޓް ބޯޑުގެ މަގާމުތައްވެސް ފުރުއްވިއެވެ. މީގެތެރެއިން ގިނަ މަގާމުތައް އަދާކުރެއްވީ ހިލޭ ސާބަހަށް، އެކުޅިވަރުތަކަށް ހިތްޕުޅުގައި އޮންނަވާ ލޯތްބެއްގެ ސަބަބުންނެވެ.