އިނގިރޭސިވިލާތުގެ ބޮޑުވަޒީރު ކީރް ސްޓާމާ މަޤާމުން އިސްތިޢުފާ ދެއްވާނެކަން ޖޫން 22 ވަނަ ދުވަހު އިޢުލާނު ކުރެއްވުމާ އެކު، ފާއިތުވި ދަހަރެއްހާ ދުވަހުގެ ތެރޭގައި އެ ޤައުމަށް ހަތްވަނަ ވެރިޔަކު ޢައްޔަންކުރުމުގެ މަސައްކަތް މި ވަނީ ފެށިގެން ގޮސްފައެވެ. މި ސިޔާސީ ހަލަބޮލިކަމުގެ އަސްލު ގުޅިފައިވަނީ، މީގެ ދިހަ އަހަރު ކުރިން ނެގުނު ބްރެކްސިޓް ފެންނަ ނުފެންނަ ވޯޓާއެވެ. އެއީ، ވިލާތުގެ އިއްތިޙާދުން (އީޔޫ) އިނގިރޭސިވިލާތް ވަކިވުމާ ގުޅޭ ވޯޓެވެ. އެ ވޯޓަށް ފަހު ވޭތުވެދިޔަ އަހަރުތަކުގައި، އިނގިރޭސިވިލާތުން އަމިއްލަ މިނިވަން މަގެއް ކޮށުމަށް ގިނަ މަސައްކަތްތަކެއް ކުރި ނަމަވެސް، ބޮޑުވަމުންދާ ދަރަންޏާއި އިޤުތިޞާދީ ޙާލަތުގެ ސަބަބުން ޤައުމުގެ ކުރިއެރުމަށް ވަނީ ހުރަސްތަކެއް ކުރިމަތިވެފައެވެ.
ބްރެކްސިޓް ވޯޓާ އެކު އެއިރު ވެރިކަން ކުރައްވަމުން ގެންދެވި ޑޭވިޑް ކެމަރަން އިސްތިޢުފާ ދެއްވުމުން ދެން ވެރިކަމަށް ވަޑައިގެންނެވި ތެރޭސާ މޭގެ އިތުރުން، ބްރެކްސިޓް ނުވަތަ އީޔޫން ވަކިވުމުގެ ކަންކަން ފުރިހަމަ ކުރެއްވި ބޮޑުވަޒީރު، ބޮރިސް ޖޮންސަންއަށް ވެސް ސިޔާސީ ގަޑުބަޑުން ސަލާމަތްވެވަޑައި ނުގެންނެވުނެވެ. މަދު މަސްތަކަކަށް ފަހު ދެ ބޭފުޅުންނަށް ވެސް ޖެހިވަޑައިގަތީ އިސްތިޢުފާ ދެއްވާށެވެ. އެއަށްފަހު ވެރިކަމާ ޙަވާލުވެ ވަޑައިގެންވި ލިޒް ޓްރަސް ހުށަހެޅުއްވި ބަޖެޓާ ގުޅިގެން މާލީ ބާޒާރަށް ލޮޅުންއަރައި، އޭނާއަށް ވެސް ވެރިކަމުގައި ދެމިހުންނެވުނީ އެންމެ 44 ދުވަހަށެވެ. ދެން ބޮޑުވަޒީރު ކަމުގެ މަޤާމާ ޙަވާލުވެވަޑައިގެންނެވި ރިޝީ ސުނާކް އިޤުތިޞާދު ރަނގަޅު ކުރެއްވުމަށް މަސައްކަތްތަކެއް ކުރެއްވި ނަމަވެސް، އޭނާގެ މަޤުބޫލުކަން ކުޑަވުމުގެ ސަބަބުން 2024 ވަނަ އަހަރުގެ އިންތިޚާބުން ވަނީ ނާކާމިބުވެފައެވެ. އެއަށްފަހު، 14 އަހަރަށް ދެމިގެންދިޔަ ކޮންޒަރވެޓިވް ޕާޓީގެ ވެރިކަން ނިމުމަކަށް އައިސް، ދެން ވެރިކަމާ ޙަވާލުވެ ވަޑައިގެންނެވީ ލޭބަރ ޕާޓީގެ ސްޓާމަރއެވެ.
ނަމަވެސް، ސްޓާމަރގެ ސަރުކާރުން ޓެކުސް އާމްދަނީ އަހަރަކު 52.76 ބިލިޔަން އެމެރިކާ ޑޮލަރަށް ބޮޑުކުރުމަށް ފިޔަވަޅުތައް އެޅުމުން ވިޔަފާރިވެރިންގެ ބޮޑު ނުރުހުމެއް އަމާޒުވިއެވެ. މީގެ އިތުރުން، ލޭބަރ ޕާޓިއަށް މި ވަގުތު އޮތް އެންމެ ބޮޑު ގޮންޖެހުމުގެ ގޮތުގައި ބެލެވޭ ނައިޖެލް ފަރާޖްގެ 'ރިފޯމް ޔޫކޭ' ޕާޓީގެ މަޤްބޫލުކަން ބޮޑުވެ، އިޖުތިމާޢީ ޚަރަދުތައް ކުޑަކުރުމުގެ މަޝްރޫޢު އަނބުރާ ގެންދަން ސްޓާމަރއަށް މަޖުބޫރުވިއެވެ. ހަމައެއާއެކު، އެމެރިކާއަށް ކަނޑައަޅާފައި ހުންނަވާ ސަފީރު ކަމުގެ މަޤާމަށް ޕީޓަރ މެންޑެލްސަން ޢައްޔަންކުރުމާ ގުޅިގެން، ސްޓާމަރގެ ސަރުކާރަށް އޮތް އިތުބާރު ގެއްލިގެން ދިޔައެވެ. ސަބަބަކީ، ޖިންސީ ކުށްތައް ސާބިތުވި ކުށްވެރިޔާ، ޖެފްރީ އެޕްސްޓީނާއި މެންޑެލްސަނާ ގުޅުންތަކެއް އޮތް ކަން ހާމަވެގެން ދިޔުމެވެ.
މި ނުތަނަވަސްކަމުގެ ތެރެއިން، 2026 މޭ މަހުގެ ބޭއްވި މުހިންމު އިންތިޚާބުތަކަކުން ލޭބަރ ޕާޓީއަށް ބޮޑު ނާކާމިޔާބީއެއް ލިބި، ޞިއްޙީ ވަޒީރު ވެސް ސްޓްރީޓިންގ އަދި ދިފާޢީ ވަޒީރު ޖޯން ހީލީ މަޤާމުން އިސްތިޢުފާ ދެއްވިއެވެ. އަދި، ދާދިފަހުން އިންގްލެންޑުގެ އުތުރުގައި ބޭއްވި ބައި-އިލެކްޝަނަކުން އެންޑީ ބަރނަމް ބޮޑު ކާމިިޔާބީއެއް ހޯއްދެވުމާއެކު، ސްޓާމަރ ވަނީ ލޭބަރގެ އިސްވާރުގެ މަޤާމުން އިސްތިޢުފާ ދެއްވަން ނިންމަވާފައިވާ ކަން އިޢުލާނު ކުރައްވާފައެވެ. ލޭބަރގެ ގިނަ މެންބަރުން ޤަބޫލުކުރާ ގޮތުގައި، ސްޓާމަރގެ އިސްވާރުކަމުގެ ދަށުން ކުރިއަށް އޮތް އިންތިޚާބުގައި ޕާޓީއަށް ކާމިޔާބީ ލިބުމަކީ ނާދިރު ކަމެކެވެ.