ސިޓީ ބަލިކޮށް އާސެނަލްއިން ކޮމިއުނިޓީ ޝީލްޑް ކާމިޔާބުކޮށްފި

އިންގްލިޝް ޕްރިމިއަރ ލީގުގެ ޗެމްޕިއަން އާސެނަލް އިން އިނގިރޭސި އެފް އޭ ކަޕްގެ ޗެމްޕިއަން މެންޗެސްޓަރ ސިޓީ ބަލިކޮށް ކޮމިއުނިޓީ ޝީލްޑް ކާމިޔާބު ކޮށްފިއެވެ.

ކާޑިފްގެ ޕްރިންސިޕަލިޓީ ސްޓޭޑިއަމްގައި ކުޅުނު މިމެޗު އާސެނަލް ކާމިޔާބު ކޮށްފައިވަނީ ހީކުރި ވަރަށް ވުރެ ފަސޭހަ ކަމާއެކު 3 ލަނޑު ސުން ލަނޑުންނެެވެ. މިމެޗުން އާސެނަލް މޮޅުވި ނަމަވެސް ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސިޓީއިންނެވެ. ނަމަވެސް އާސެނަލްއިން ކުރިއަށްދާ ގިނަ ފަހަރު ސިޓީގެ ޑިފެންސް ހާސްކަމުގެ ތެރެއަށް ވެއްޓެމުންދިޔަތަން ފެނިގެންދިޔައެވެ. އަދި މިމެޗު އާސެނަލްއިން ފަށާފައިވަނީ ވަރަށް ފޯރީގައެވެ.

ނަތީޖާ އަކަށް ވެގެންދިޔައީ މެޗުގެ ކުޅުން ފެށިތާ 23 ވަނަ ސިކުންތުގައި އާސެނަލްއިން މެޗުގެ ލީޑު ނެގުމެވެ. މިލަނޑު މައިލްސް ލުވިސް ކެލީ ތަނަވަސްކޮށްދިން ފުރުސަތެއްގައި ކާމިޔާބު ކޮށްދިނީ ރިކާޑޯ ކަލަފިއޯރީއެވެ.

މެޗުގެ ފުރަތަމަ ލަނޑަށް ފަހު ދެޓީމުގެ ފަރާތުން ވަރަށް ހަމަހަމަ ކުޅުމެއް ފެނިގެންދިޔަ އިރު ދެޓީމުންވެސް ހަމަލާއަށް އިސްކަން ދީގެން ކުޅުނު ތަން ފެނިގެންދިޔައެވެ. ނަމަވެސް މިމެޗުގައި އަނެއްކާވެސް ފެނިގެންދިޔައީ އާސެނަލްއިން އެޓީމުގެ ލީޑު ފުޅާކުރި ތަނެވެ.

މެޗުގެ 28 ވަނަ މިނެޓުގައި މިލަނޑު އާސެނަލް އަށް ކާމިޔާބު ކޮށްދިނީ ކްރިސްޓޯސް ޒޯލިސް ތަނަވަސްކޮށްދިން ފުރުސަތެއްގައި ކައި ހަވާޓްޒްއެވެ. މިމެޗުގައި އާސެނަލްއިން ކާމިޔާބު ކުރި ތިންވަނަ ލަނޑު ދެވަަނަ ހާފުގެ ކުޅުން ފެށިތާ ތިންވަނަ މިނެޓުގައި ޖަހައިދިނީ ކެޕްޓަން މާޓިން އޮޑެގާޑްއެވެ. މިލަނޑު ޖެހުމަށްވެސް ފުރުސަތު ތަނަވަސްކޮށްދިނީ ޒޯލިސްއެވެ.

މިމެޗުގައި އާސެނަލް އާއި މިސީޒަންގައި އަލަށް ގުޅުނު ގްރީސްގެ ފޯވަޑް ޒޯލިސްގެ ފަރާތުން މޮޅު ކުޅުމެއް ފެނިގެންދިޔައިރު ބްރެޒިލްގެ ބްރޫނޯ ގިމަރާއޭސްގެ ފަރާތުންވެސް ރަނގަޅު ކުޅުމެއް ފެނިގެންގޮސްފައިވެއެވެ. މިއާއެކު މިއަންނަ ހަފްތާ ބަންދުގައި އިންގްލިޝް ޕްރިމިއަރ ލީގުގެ ކުޅުން ފެށުމަށް ހަމަޖެހިފައިވާއިރު މިފަހަރުވެސް ލީގަށް އެންމެ ބޮޑަށް ވާދަކުރާނެ ޓީމަކަށް ވެގެންދާނީ އާސެނަލްކަން މިވަނީ ހާމަވެގެން ގޮސްފައެވެ.

މިކާމިޔާބީ އާއެކު އާސެނަލް މިވަނީ ހަތަރު މަސްތެރޭ ދެވަނަ ޓްރޮފީ ކާމިޔާބު ކޮށްފައެވެ. އަދި މިއީ އާސެނަލްއިން ކޮމިއުނިޓީ ޝީލްޑް ކާމިޔާބު ކުރި 18 ވަނަ ފަހަރެވެ.

ސިޓީއަށް ބަލާލާއިރު އެޓީމުގެ ކުރީގެ ކޯޗު ޕެޕް ގާޑިއޯލާ ޓީމު ދޫކޮށް ދިޔަފަހުން ކުޅުނު ވާދަވެރި ފުރަތަމަ މެޗުގައި މިވަނީ އާ ކޯޗު އެންޒޯ މަރެސްކާގެ ބެލުމުގެ ދަށުން ބަލިވެފައެވެ. އަދި މިމެޗުގައި ސިޓީގެ ފަރާތުން ރަނގަޅު ހަމަލާތަކެއް އުފެއްދި ނަމަވެސް ޑިފެންސް ފެނިގެންދިޔައީ ވަރަށް ދޯދިޔާކޮށެވެ. މިގޮތުން އާސެނަލްއިން ޖެހި ތިންލަނޑުވެސް އެޓީމުން ޖަހާފައިވަނީ ވަރަށް ފަސޭހަ ކަމާއެކުއެވެ.

ލީގުގެ ފުރަތަމަ ހަފްތާގައި ޗެމްޕިއަން އާސެނަލް އިން ނިކުންނާނީ އަމިއްލަ ދަނޑުގައި އަލަށް ލީގުން ޖާގަހޯދި ކޮވެންޓްރީ ސިޓީ އާއި ދެކޮޅަށެވެ. އަދި ސިޓީ ނިކުންނާނީ އަމިއްލަ ދަނޑުގައި ބޯންމޯތާއި ދެކޮޅަށެވެ.