ރެއާލްއަށް ރޮޑްރީ ބޭނުމެއްނުވޭ: މޮރީނިއޯ

ސްޕެނިޝް ލަލީގާގެ ޗެމްޕިއަން އެފްސީ ބާސެލޯނާއަށް ދާދިފަހުން ސޮއިކުރި ސްޕެއިންގެ ޤައުމީ ޓީމުގެ ކެޕްޓަން ރޮޑްރީ އަކީ ރެއާލް މެޑްރިޑަށް ބޭނުން ކުޅުންތެރިއެއް ނޫން ކަމަށް އެޓީމުގެ ކޯޗު ހޯސޭ މޮރީނިއޯ ބުނެފިއެވެ.

މޮރީނިއޯ މިހެން ބުނެފައިވަނީ އެލް ޗިރިންގުއިޓާ ޓީވީ ޝޯއަށް ދިން އިންޓަރވިއުއެއްގައެވެ. މޮރީނިއޯ ބުނީ ރެއާލްއަށް ރޮޑްރީ ބޭނުން ނޫންކަން އޭނާއަށް ޔަގީން ކަމަށެވެ. ނަމަވެސް ރޮޑްރީ އެޓީމަށް ގެންދިއުމަށް ވަރަށް ރަނގަޅު ހުށަހެޅުމެއް ހުށަހެޅިކަމަށްވެސް މޮރީނިއޯ އެއްބަސްވެއެވެ. އިންގްލިޝް ޕްރިމިއަރ ލީގުގެ މެންޗެސްޓަރ ސިޓީއަށް ކުޅެމުންދިޔަ ރޮޑްރީ ބާސާއަށް ރަސްމީކޮށް ސޮއިކޮށްފައިވަނީ ރޭގެ ވަގުތެއްގައެވެ.

ރެއާލްގެ ކޯޗުކަމާއި ދެވަނަ ފަހަރަށް މިސީޒަންގައި ހަވާލުވި މޮރީނިއޯ ބުނީ އޭނާ ދެ ފަހަރު މަތިން ރޮޑްރީ އާއި ވާހަކަ ދެއްކި ކަމަށާއި ނަމަވެސް ރޮޑްރީއަށް އޭނާގެ މުސްތަގްބަލާމެދު ހިތުގާ ނުތަނަވަސްކަމެއް ހުރިކަން އެނގިގެންދިޔަ ކަމަށެވެ. މޮރީނިއޯ ބުނީ ރޮޑްރީގެ ހިތުގައި އޮތް ނުތަނަވަސް ކަމުގެ ސަބަބުން އޭނާއަށްވެސް ރޮޑްރީއާމެދު ސުވާލު އުފެދިގެންދިޔައީ ކަމަށެވެ. އޭނާ ބުނީ ރޮޑްރީ އަކީ ވަރަށް މޮޅު ކުޅުންތެރިއެއް ކަމަށާއި އަދި ރެއާލްއަށްވެސް ވަރަށް ރަނގަޅު ކުޅުންތެރިއަކަށް ވެގެންދިޔައީސް ކަމަށެވެ. ނަމަވެސް ރެއާލްއަކީ އެޓީމަކާއި ގުޅުމާމެދު ހިތުގައި ސުވާލު އުފެދޭ އެއްވެސް ކުޅުންތެރިޔަކަށް ޖާގަ ދެވޭވަރަށް ވުރެ ބޮޑު ކްލަބެއް ކަމަށެވެ. އެހެން ކަމުން ރެއާލް އާއި ގުޅެން ދެފަހަރަށް ވިސްނަން ޖެހޭ ކުޅުންތެރިޔެއް އެކްލަބަށް ބޭނުމެއްނުވާކަމަށެވެ.

މޮރީނިއޯ ބުނީ އޭނާ ރޮޑްރީ ބޭނުން ނޫން ކަމަށާއި ރެއާލްގައި މިހާރުވެސް ހުނަރުވެރި މޮޅެތި ކުޅުންތެރިން އެބަތިބި ކަމަށެވެ. ލަލީގާގެ އެންމެ ވާދަވެރި ދެ ކްލަބްގެ ގޮތުގައި ފާހަގަ ކުރެވޭ ރެއާލް އާއި ބާސާގެ ވާދަވެރިކަމަށް ބަލާއިރު މޮރީނިއޯ ބުނީ ރޮޑްރީ ބާސާއަށް ސޮއި ކުރުމަކީ ރެއާލްގެ މައްޗަށް ބާސާއަށް ހޯދުނު ކާމިޔާބީއެއްކަމަށް ގަބޫލް ނުކުރާ ކަމަށެވެ.

ބާސާއިން ރޮޑްރީ އާންމުކޮށް ދައްކާލުން ރޭ ބޭއްވުމުގެ ކުޑަ ވަގުތު ކޮޅެއް ކުރިން ރެއާލް އިން ވަނީ މޮރީނިއޯ ރަސްމީކޮށް އާންމުކޮށް ދައްކާލުން ބާއްވައިފައެވެ. މޮރީނިއޯ ބުނީ ކާމިޔާބީ ހާސިލް ކުރެވޭނީ ދަނޑު މަތީގައި ކަމަށާއި އަދި އެކަން ކުރެވޭނީ މުބާރާތް ކާމިޔާބު ކޮށްގެން ކަމަށެވެ.

ވޭތުވެދިޔަ ދެސީޒަން ރެއާލް އިން ތަށްޓަކާއި ނުލާ ސީޒަން ނިންމާލަން ޖެހުމާއި ގުޅިގެން މިސީޒަންގައި އެޓީމުން މޮރީނިއޯ އަލުން ގެނައުމުގެ އިތުރުން ޓީމު ވަރުގަދަ ކުރުމުގެ ގޮތުން މާކް ކުކުރެޔާ، އިބްރާހީމާ ކޮނާޓޭ، ޑެންޒެލް ޑަމްފްރީސް، ބެނާޑޯ ސިލްވަރ އަދި ޔާން ޑިއޮމޮންޑް އެޓީމަށް ގެންގޮސްފައެވެ.