ޢަބްދުއްޝަކޫރު ޞާލިޙް: މާލޭގެ ކަރަންޓުގެ ޚިދުމަތަށްއައި ބަދަލު ގާތުން ތަޖުރިބާކުރި

ކަރަންޓުގެ ޚިދުމަތަކީ އަސާސީ މުހިއްމު ޚިދުމަތެކެވެ. ޚިދުމަތް ފޯރުކޮށްދިނުމަށް ވޭތުވެދިޔަ ދިގު ތާރީޚުގައި މުހިއްމު މަސައްކަތްތަކެއް ސަރުކާރުން ކުރައްވާފައިވާއިރު މިމަސައްކަތް ކާމިޔާބުކަމާއެކު އިތުރުވަމުންދިޔަ އާބާދީއަށް ފޯރުކޮށްދެވުނީ ޚިދުމަތުގައި ތިއްބެވި އަޒުމް ވަރުގަދަ މުވައްޒަފުންގެ ހިތްވަރުންނެވެ.

އެފަދަ އެއްބޭފުޅަކީ ޢަބްދުއްޝަކޫރު ޞާލިޙެވެ. ވަރަށް އާދައިގެ މުވައްޒަފެއްގެ ގޮތުގައި ކުރީގެ އިންޖީނުގެއަށް ވަޒީފާއަށް ނުކުތް ޢަބްދުއްޝަކޫރަކީ ފަހުން ސްޓެލްކޯ އުފައްދާ އެތަނުގައިވެސް މުހިއްމު މަޤާމުތަކެއް ފުރުއްވި އިންޖިނިއަރެކެވެ.

ރާއްޖޭގެ ތަރައްޤީގައި އިންޖިނިއަރުންގެ ދައުރު ފާހަގަކުރުމުގެ ގޮތުން ސަރުކާރުން މިއަހަރު އަލަށް ދޭން ފެއްޓެވި އިންޖިނިއަރިން އެވޯޑްގެ، ލައިފްޓައިމް އެޗީވްމަންޓް އެވޯޑް ލިބިވަޑައިގެންނެވި ޢަބްދުއްޝަކޫރު ޞާލިޙަކީ މި ދާއިރާގައި 50 އަހަރަށްވުރެ ގިނަ ދުވަހުގެ ތަޖުރިބާ ލިބިވަޑައިގެން ހުންނެވި ބޭފުޅެކެވެ.

ކުޑައިރުން ފެށިގެންވެސް އިލެކްޓްރޯނިކް ތަކެތި ރޫޅާލުމަށާއި ބެޓަރި ބޭނުންކޮށްގެން ބޮކި ދިއްލުމާއި މަސްޓޭންކުގެ ބޮކިދިއްލުން ފަދަ ކަންކަމަކީ ޢަބްދުއްޝަކޫރު ޞާލިޙް ވަރަށް ޝައުގުވެރިވީ ކަންކަމެވެ. އެހެންކަމުން ރާއްޖެއިން ބޭރުގައި ސާނަވީ ތަޢުލީމު ޙާސިލުކުރެއްވުމަށްފަހު މާލެ ވަޑައިގަތް ހިސާބުން އޭރުގެ އިންޖީނުގޭގައި މަސައްކަތްކުރެއްވުމަށް ލިބިގެންދިޔަ ފުރުޞަތުވީ ހަޔާތް ބަދަލުކޮށްލި ފުރުޞަތެއްގެ ގޮތުގައި ޢަބްދުއްޝަކޫރު ފާހަގަކުރައްވައެވެ.

ޕީއެސްއެމް ނިއުސްއަށް މަޢުލޫމާތުދެއްވަމުން ޢަބްދުއްޝަކޫރު ވިދާޅުވީ އިންޖީނުގޭގައި އޭރު ވެރިޔަކަށް ހުންނެވި އަޙްމަދު އަމްދާދުގެ ފަރާތުން ލިބިގެންދިޔަ އެހީތެރިކަމާ އެއްބާރުލުމާ ކުރެއްވި އިތުބާރަކީ އިންޖިނިއަރިންގ ދާއިރާގައި އެހާ ދިގު މުއްދަތެއްގައި ދެމިހުރެވުމުގެ ސަބަބުކަމަށެވެ. ޢަބްދުއްޝަކޫރު ވިދާޅުވީ އެންމެ ފުރަތަމަ އިންޖީނުގޭގައި ހުރިހާ މަސައްކަތެއްވެސް ދަސްކުރައްވަންޖެހުނުކަމަށެވެ. ވެލްޑިން ކުރުމާއި އިސްތިރި ފަދަ އިލެކްޓްރޯނިކް އެކި ތަކެތި މަރަމާތުކުރަން ދަސްކުރަންޖެހުނުކަން ފާހަގަކުރެއްވިއެވެ.

"އޭރު އަމްދާދުއާއެކު އުޅުނުއިރު ގިނަ ކަންކަން ތަޖުރިބާކުރުމަށް ލިބުނު. އެގޮތުން ނަސަންދުރާ ކަޑަ ޖެހުމާ، ޓީވީ ބިލްނޑިންގ އެންޓަނާ ހަރުކުރުމަށް ފައުންޑޭޝަން އެޅުމަށް ރޯނުދަމާ ކަޑަޖެހުން ފަދަ ކަންކަމުގައި އުޅޭނީ އަޅުގަނޑުމެން. ޢަބްދުއްޝަކޫރު ވިދާޅުވިއެވެ.

އޭރުގެ ހަނދާންތައް އައުކުރައްވަމުން ޢަބްދުއްޝަކޫރު ވިދާޅުވީ، ބަނދަރުގައި އޮންނަ ބޯޓެއްގެ ނަގިލި ކަހާލައިގެން ހިނގާ ހާދިސާތަކާއި، މާލޭ އިންޖީނުގެއަށް ގެންނަ ބޮޑެތި އިންޖީނުތައް އެހިސާބަށް ގެންދިޔުމަށް ކުރި މަސައްކަތްތަކަކީ އިންޖިނިއަރިންގ ދާއިރާގައި ކުރެއްވުނު ތަފާތު ތަޖުރިބާތަކެކެވެ.

"ބާޖަކަށް އިންޖީނު ބާލައިގެން މާލެގެނެސް އެއްގަމު ތޮށި ކައިރިކޮށްފައި އަޅުގަނޑުމެން ތެބެންޖެހުނު ދިޔަވަރު ބޮޑުވަންދެން. އެއީ އަރާ ހަމަވަންދެން. ދެން ދަމައިގަނެވުނީ. ދެން ރޭލު ދަގަނޑު އަޅާފައި މާލޭ މަގުތަކުން އިންޖީނު ގެންދިޔައީ." ޢަބްދުއްޝަކޫރު ވިދާޅުވިއެވެ.

އެންމެ ތަފާތު އެއްކަމެއްގެ ގޮތުން ފާހަގަކުރެއްވީ މާލޭގައި ކޮންމެ ގޭބިސީއަކަށް ފޮނުވާ ކަރަންޓު ބިލުގައި ސޮއިކުރެއްވުމެވެ. އެގޮތުން 17500 އެއްހާ ސޮއި ކޮންމެ މަހެއްގެ ކަރަންޓު ބިލުގައި ކުރަންޖެހުނު ހަނދާން އައުކުރެއްވިއެވެ.

މަތީ ތަޢުލީމު ޙާސިލުކުރައްވަން އިނގިރޭސިވިލާތުގައި 4 އަހަރު އުޅުއްވުމަށްފަހު އެނބުރި ވަޑައިގެން ސްޓެލްކޯގައި މުހިއްމު މަޤާމުތަކެއް ފުރުއްވިއެވެ. އެގޮތުން މެޖޭނިންގ ޑިރެކްޓަރކަމުގެ މަޤާމުވެސް ވަނީ ފުރުއްވާފައެވެ. އެމަޤާމުގައި އެންމެ އިސްކަމެއް ދެއްވީ މުވައްޒަފުން ބިނާކުރުމަށާއި މުވައްޒަފުންނާ ގާތްގުޅުމެއް ޤާއިމުކުރުމަށްކަމަށް ވިދާޅުވިއެވެ.

"އަޅުގަނޑު އަބަދުވެސް މަސައްކަތްކުރިން ހުރިހާ މުވައްޒަފުންނަށްވެސް ނަމުން ގޮވާލެވޭތޯ. މިދައްކަނީ 700 އެއްހާ މުވައްޒަފުން. އަޅުގަނޑަށް އެނގޭނެ މާލޭގައި ތިބި ހުރިހާ މުވައްޒަފުން. ކޮންމެ ދުވަހަކުވެސް ފެނުމުން ގޮވާލެވޭތޯ ބަލަން." ޢަބްދުއްޝަކޫރު ވިދާޅުވިއެވެ.

އިންޖިނިއަރެއްގެ ގޮތުގައި ރާއްޖޭގެ އެންމެ ޒިންމާދާރު އެއް އޮފީހުގައި ޚިދުމަތްކުރެއްވިއިރު ޢާއިލާގެ ފަރާތުން ލިބިގެންދިޔަ އެއްބާރުލުންވެސް ޢަބްދުއްޝަކޫރު ފާހަގަކުރެއްވިއެވެ. އަދި ދާއިރާ ބިނާކުރުމުގައި އެންމެ ބޮޑު އިސްކަމެއް ދެއްވި ކަރަންޓު ފޯރުކޮށްދޭ ކުންފުންޏަކީ ސައްތައިން ސައްތަ ދިވެހިން މަސައްކަތްކުރާ ކުންފުންޏަކަށް ހެދުމަށްކަމަށާއި އެކަން އެގޮތުގައި އަބަދުވެސް އޮތުމަށް އުއްމީދުކުރައްވާކަމަށް ވިދާޅުވިއެވެ.