"އައު ޤާނޫނާއެކު ދަނޑުވެރިކަމާއި މެރިކަލްޗަރ ދާއިރާއިން ބޮޑެތި އިންވެސްޓްމެންޓް ލިބޭނެ"

ފަޅުރަށްތަކާއި ބެހޭ އައު ޤާނޫނާއެކު ދަނޑުވެރިކަމާއި މެރިކަލްޗަރ ދައިރާއިން ރަނގަޅު ޕްރޮޕޯސަލްތައް ލިބި ކާބޯތަކެތީގެ ރަށްކާތެރިކަން ކަށަވަރުކުރުމަށް ކުރާ މަސައްކަތަށް ކުރިއެރުންތަކެއް ލިބޭނެ ކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.

ވަޒީރު ޝިޔާމް ވަނީ މިދައިރާތަކުގައި ރާއްޖޭގައި އުފައްދާ ބާވައްތައްވެސް މިހާރު އިމްޕޯޓް ކުރަންޖެހޭ ކަމުގެ ކަންބޮޑުވުން ފާޅުކުރައްވާފައެވެ.

އަހާ ފޯރަމުގައި ވާހަކަފުޅުދައްކަވަމުން މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހުމަދު ޝިޔާމް ވަނީ ރާއްޖޭގެ ކާބޯތަކެތީގެ ރައްކާތެރިކަން ކަށަވަރުކުރުމަށް ބަލާއިރު، އެންމެ ބޮޑު އެއް ކަންބޮޑުވުމަކީ ރާއްޖޭގައި އުފައްދާ ބާވައްތައްވެސް އިމްޕޯޓުކުރަން ޖެހިފައި އޮތުން ކަމަށް ވަޒީރު ވިދާޅުވިއެވެ. މިކަން ހައްލުކުރުމަށް ދަނޑުވެރިކަމާއި މެރިކަލްޗަރ ދާއިރާއިން މަސައްކަތް ކުރެވޭ ކަމަށް ވަޒީރު ވިދާޅުވިއެވެ.

ވަޒީރު ޝިޔާމް ވިދާޅުވީ، މިހާރު ކުރަމުންދާ މަސައްކަތްތަކުގެ ތެރެއިން ދަނޑުވެރިކަން ކުރުމަށް މީހުން ދިރިއުޅޭ 10 ރަށަކާއެކު މަސައްކަތްތަކެއް ކުރަމުންދާކަމަށެވެ. އަދި ދަނޑުވެރިކަމުގެ ދައިރާއިން އިންވެސްޓްމެންޓް ހޯދުމަށް މިފަހުން ތަސްދީޤު ކުރެވުނު ފަޅުރައްތަކާއި ބެހޭ އައު ޤާނޫނުން ހައްލުތަކެއް ހޯދާފައިވާ ކަމަށް ވަޒީރު ވިދާޅުވިއެވެ.

ވަޒީރު ޝިޔާމް ވަނީ މީގެ ކުރީގައި ފަޅުރަށްތައް ދޫކޮށްގެން ހިންގުން މަޝްރޫޢުތައް ރަނގަޅަށް ކުރިއަށް ނުގޮސް ހުރިކަން ފާހަގަކުރައްވާފައެވެ. އެހެން ކަމުން މި ޤާނޫނަށް އަމަލުކުރަން ފަށައި ޤާނޫނުގެ ދަށުން ހަދަން ޖެހޭ ޤަވާޢިދުތައް އައުމުން ދަނޑުވެރިކަމުގެ ދައިރާއިން ރަނގަޅު އިންވެސްޓްމެންޓުތަކެއް ލިބިގެން ކުރިއަށް ދެވޭނެ ކަމަށް ވަޒީރު ވިދާޅުވިއެވެ.

"އައު ޤާނޫނާއިއެކު އެކަމަށް ވާނެ އެޑްރެސްކޮށްފައި. ހާއްސަކޮށް އިމްޕޯޓް ރިޕްލޭސް ކުރަން ބޭނުންނަމަ، އިންޕޯޓް ކުރާ މިންވަރު ދަށް ކުރަން ބޭނުންނަމަ އިންވެސްޓމެންޓްތަކަށް ޖާގަަ ދޭންޖެހޭ. އަދި ދިވެހިރާޢްޖެއިން ބޭރުވާ ބޭރުފައިސާ އެބަހިފެހެއްޓޭ. ބޮޑެތި އިންވެސްޓްމެންޓްތައް އެބައާދޭ. އެހެންވެ ލުއިތައް ދީގެން އިންވެސްޓްމެންޓްތައް ގިނަ ކުރުމަށް އަޅުގަނޑުމެން މަސައްކަތް ކުރަނީ. " ވަޒީރު ވިދާޅުވިއެވެ.

ވަޒީރު ވަނީ މި ޤާނޫނާއެކު މެރިކަލްޗަރ ދައިރާއިން ލިބިފައި ހުރި އިންވެސްޓްމެންޓް ފުރުސަތުތަކަށް އަމަލީ ސިފައެއް ގެނެވޭނެ ކަމަށް ވިދާޅުވެފައެވެ. ސަރުކާރުން މިދައިރާއިން ކުރިއެރުންތަކެއް ހޯދުމަށް މިހާރު މިމަސައްކަތް ކުރުމަށް 13 ސަރަހައްދެއް ކެބިނެޓް ފެންވަރުގައި ކަނޑައަޅާފައިވާކަން ވަޒީރު ޝިޔާމް ފާހަގަކުރެއްވިއެވެ. މި ސަރަހައްދުތަށް ހިމެނޭހެން މިހާރުވެސް އެ ވުޒާރާއަށް ޕްރޮޕޯލަސްތަކެއް ލިބިފައި ހުރިނަމަވެސް އެ ޕްރޮޕޯސަލްތައް އިވެލުއޭޓް ކުރެވޭނީ، ފަޅުރަށްތަކާއި ބެހޭ ޤާނޫނުގެ ދަށުން ހެދޭ ޤަވާޢިދުތައް އައުމުންކަން ވަޒީރު ފާހަގަކުރެއްވިއެވެ.

"ޤާނޫނަށް އަމަލުކުރަން ފެށި ޤަވާޢިދުތައް ނިމޭއިރު އެސަރަހައްދުތައްވެސް ހުޅުވާލެވޭނެ. މީގެ ކުރިން އަޅުގަނޑުމެންނަށް ލިބިފައި ހުރި ޕްރޮޕޯސަލްތަކުގެ އިވެލުއޭޝަން ފެށެން އޮތީވެސް ޤަވާއިދު ނިމިގެން. އަޅުގަނޑުމެން އަމާޒު ހިފަނީ އޮކްޓޯބަރ މަހުގެ ފުރަތަމަ ހަފްތާގެ ތެރޭގައި ޤަވާއިދުތައް ނިންމާ އަޅުގަނޑުމެންނަށް ލިބިފައި ހުރި ޕްރޮޕޯސަލްތަކާއި އަޅުގަނޑުމެންނަށް އަލަށް ލިބޭ ޕްރޮޕޯސަލްތަކާއެކު ކުރިއަށް ދާން." ވަޒީރު ޝިޔާމް ވިދާޅުވިއެވެ.

ވަޒީރު ޝިޔާމްގެ ވާހަކަފުޅުގައި މެރިކަލްޗަރ ދައިރާއަކީ މިހާރުވެސް މަސައްކަތްތަކެއް ފެށިފައިވާ ދައިރާއެއް ނަމަަވެސް އެ ދައިރާއަށް ބޭނުންވަނީ ބޮޑު އިންވެސްޓްމެންޓްތައްކަން ފާހަގަކުރައްވާފައެވެ. އަދި މިހާރު އެވަރުގެ އިންވެސްޓްމެންޓައް ފެންނަމުންދާކަން ވަޒީރު ޝިޔާމް ވިދާޅުވިއެވެ.

ދިވެހިރާއްޖޭގެ ކާބޯތަކެތީގެ ރަށްކާތެރިކަން ކަށަވަރުކުރުމަށް ސަރުކާރުގެ މުހިންމު އަމާޒެކެވެ. މިމަސައްކަތުގެ ތެރެއިން އިމްޕޯޓަށް ބަރޯސާވުން ކުޑަކުރުމަށް ދުރުރާސްތާގައި މަސައްކަތްތަކެއް މިހާރު ކުރަންޖެހިފައިވާ ކަމަށް މަސްްވެރިކަމާއި ކަނޑުގެ ވަސީލަތްތަކައި ބެހޭ ވަޒީރު އަހުމަދު ޝިޔާމް ވިދާޅުވިއެވެ.