ޔަހޫދީން ޣައްޒާގައި ޢުދުވާން ހިންގަމުންދާ ގޮތަށް ޔަހޫދީން އިސްތިޢުމާރުކޮށްފައިވާ ހުޅަނގު އައްސޭރީގައި ވެސް ހަނގުރާމަ ފެށުމަށް ޔަހޫދީންގެ ހައްދުފަހަނައަޅާފައިވާ މާލީ ވަޒީރު ބެޒަލެލް ސްމޮޓްރިޗް ގޮވާލައިފިއެވެ.
ފަލަސްޠީނުގެ ކުށެއްނެތް ރައްޔިތުންނަކީ އިންސާނުންގެ ދަރަޖަ ވެސް ނުލިބޭހާ ދަށު ދަރަޖައިގެ ބައެއްގެ ގޮތަށް ދޭހަވާ ފަދަ ހަރުކަށި ބަހުރުވައިން އަބަދުވެސް ވާހަކަ ދައްކާ ސްމޮޓްރިޗް ވަނީ ޔަހޫދީން ވެރިވެގަނެފައިވާ ދެކުނު ލުބުނާންއާއި ޣައްޒާގެ ބިންތަކަކީ ރަސްމީކޮށް ޔަހޫދީންގެ ބިންތަކެއް ކަމަށް ހަދަން ޖެހޭ ކަމަށް ބުނެފައެެވެ. އޭނާ އެހެން ބުނެފައި ވަނީ ޔަހޫދީންގެ އާންމު އިންތިޚާބަށް ތައްޔާރުވަމުންދާ ދަނޑިވަޅެއްގައެވެ. އިންތިޚާބާ ދިމާކޮށް ޔަހޫދީންގެ ހަމަލާތަައް ގިނަވެ ފަލަސްޠީނުގެ ބިންތައް ފޭރިގަނެ އެ ބިންތަކުގައި ވަޒަންވެރިވެފައިވާ ޔަހޫދީންގެ އަނިޔާވެރިކަން ވަނީ އިތުރުވެފައެވެ. އަދި ހުޅަނގު އައްސޭރީގެ ބައެއް ޗެކްޕޮއިންޓުތަކާއި މަގުތައް ބަންދުކޮށް، އަވަށްތައް އެކަހެރިކޮށް، ވަޒީފާއަށް ދިޔުމަށާއި ޒަރޫރީ ޚިދުމަތްތައް ނުހޯދޭނެ ހެން ޔަހޫދީން ދަނީ ފަލަސްޠީނުގެ ރައްޔިތުންނަށް ދުއްތުރާ ކުރަމުންނެވެ.
ސްމޮޓްރިޗްއަކީ ޔަހޫދީންގެ ވަޒީރެއް ކަމަށްވާ އިތަމާ ގެން ގަވީރާއެކު ހުޅަނގުގެ ބައެއް ޤައުމުތަކުން އެ ބައެއްގެ ޖައްބާރުކަން ބޮޑު ކަމުން ފިޔަވަޅުތައް އަޅާފައިވާ ވަޒީރުންގެ ތެރޭގައި ހިމެނޭ މީހެކެވެ. ހުޅަނގު އައްސޭރީގައި ހަނގުރާމަ ފެށުމުގެ އިތުރުން ފަލަސްޓީނިއަން އޮތޯރިޓީ، ޕީއޭ ރޫޅައިލުމަށް ވެސް އޭނާ ގޮވާލައިފައެވެ.
ފަލަސްޠީނުގެ ޚާރިޖީ ވުޒާރާއިން ވަނީ ސްމޮޓްރިޗްގެ ވާހަކަތައް ކުށްވެރިކޮށް، އެއީ ފަލަސްޠީނުގެ ރައްޔިތުންނަށް އަނިޔާވެރިވެ އެ މީހުންނާ ދެކޮޅަށް ޖަރީމާ ހިންގުމަށް ހިތްވަރު ލިބޭ ކަމެއް ކަމަށް ސިފަކޮށްފައެވެ. އަދި ޔަހޫދީންނާ ދެކޮޅަށް ބައިނަލްއަޤްވާމީ ދުނިޔެއިން އެކުގައި މަސައްކަތްކޮށް ފިޔަވަޅު އެޅުމަށް ވެސް އެ ވުޒާރާއިން ވަނީ ގޮވާލައިފައެވެ.
2023ވަނަ އަހަރުގެ އޮކްޓޯބަރު މަހުގެ ތެރޭގައި ޔަހޫދީން ޣައްޒާއަށް ޢުދުވާނީ ހަމަލާތައް ދޭން ފެށުމާއެކު ހުޅަނގު އައްސޭރީގައި ދިރިއުޅޭ ފަލަސްޠީނުގެ ރައްޔިތުންނާ ދެކޮޅަށް ދެމުންދާ ހަމަލާތައް ވެސް ވަނީ އިތުރުވެފައެވެ. ޣައްޒާ ހަނގުރާމަ ފެށި ފަހުން ހުޅަނގު އައްސޭރީގައި ފަލަސްޠީނުގެ 1،206 ރައްޔިތުން ޝަހީދުކޮށްލާފައިވެއެވެ. އަދި 13،300އަށްވުރެ ގިނަ މީހުންނަށް ވަނީ ޒަޚަމްވެފައެވެ. އޭގެ އިތުރުން 26،000އަށްވުރެ ގިނަ ފަލަސްޠީނުގެ ރައްޔިތުން ހައްޔަރުކޮށްފައިވެއެވެ.
ހުޅަނގު އައްސޭރީގައި ޔަހޫދީން ދެމުންދާ ހަމަލާތަކުގެ ތެރޭގައި ގެދޮރާއި އިމާރާތްތައް ސުންނާފަތިކޮށް ބިމާ ހަމަކުރުމާއި މިސްކިތްތަކުގައި ހުޅުޖެހުމާއި ދަނޑުބިންތައް ހަލާކުކުރުން ހިމެނެއެވެ. އޭގެ ސަބަބުން އެތައް ބައެއްގެ ގެދޮރާއި ބިންތަކާއި އާމްދަނީ ވަނީ ގެއްލިފައެވެ.
ޣައްޒާއަށް ދެމުންދާ ހަަމަލާތަކުގައި މިހާތަނަށް 74،000އަށްވުރެ ގިނަ ފަލަސްޠީނުގެ ރައްޔިތުން ޔަހޫދީން ވަނީ ޝަހީދުކޮށްލައިފައެވެ. އަދި 175،000އަށްވުރެ ގިނަ މީހުންަނަށް ވަނީ ޒަޚަމްވެފައެވެ. އެ ސަހަރުގެ 90 އިންސައްރަހެން އޮތީ ބިމާ ހަމަވެފައެވެ. މިދިޔަ އަހަރުގެ އޮކްޓޯބަރު މަހުގެ 10ވަނަ ދުވަހު ހަމަލާ ބަދަލުކުރުން މެދުކަނޑައިލުމުގެ އެއްބަސްމުވެއްގައި ނަމެއްގައި ސޮއިކޮށްފައިވާއިރު، ޔަހޫދީން ދަނީ އެއްބަސްވުމާ ޚިލާފަށް އަދިވެސް މެދުކެނޑުމެއް ނެތި ޣައްޒާއަށް ހަމަލާތައް ދެމުންނެވެ.