މެލޭޝިއާގައި އެންމެ ދިގު މުއްދަތަކަށް ބޮޑުވަޒީރު ކަމުގެ މަޤާމުގައި ޚިދުމަތްކުރެއްވި މަހާތީރް މުޙައްމަދުގެ އަނބިކަނބަލުން އަދި ޢާންމު ޞިއްޙަތަށް ވަކާލާތު ކުރެއްވުމުގައި އިސް ދައުރެއް އަދާކުރައްވާފައިވާ ސިއްތީ ޙަސްމާ މުޙައްމަދު ޢަލީ، އުމުރުފުޅުން 100 އަހަރުގައި އަވަހާރަވެއްޖެއެވެ. އެ ކަމަނާގެ ޖަނާޒާ ސެޕްޓެންބަރު 28 ވަނަ ދުވަހުގެ ހަވީރު ބޭއްވުމަށްފަހު، ފަސްދާނުވަޑުވާނީ ޤައުމުގެ އިދާރީ ވެރިރަށް ޕުތުރަޖާޔާގެ ޤަބުރުސްތާނެއްގައި ކަމުގައި މަހާތީރްގެ އޮފީހުން ބުންޏެވެ. ނަމަވެސް، އިތުރު ތަފުސީލެއް ހާމައެއް ނުކުރެއެވެ.
ބޮޑުވަޒީރު އަންވަރު އިބްރާހީމް ވަނީ ތަޢުޒިޔާ ވިދާޅުވެ، ސިއްތީ ޙަސްމާގެ ޖަނާޒާ ދަޢުލަތުގެ ފުރިހަމަ ޢިއްޒަތުގައި ބާއްވާނެ ކަން އިޢުލާނު ކުރައްވާފައެވެ. އެކަމަނާގެ މައިވަންތަ ސިފަތަކުގެ މަތިން ޤައުމު އަބަދުވެސް ހަނދާންކުރާނެ ކަމަށާއި، ކޮށްދެއްވި ޚިދުމަތްތައް ބަލައިގަންނަ ކަމުގައި އަންވަރު ވިދާޅުވިއެވެ. މަހާތީރާއި ސިއްތީ ޙަސްމާ ބައްދަލުވެވަޑައިގެންނެވީ 1940 ގެ އަހަރުތަކުގެ ފަހުކޮޅު ސިންގަޕޫރުގައި ތަޢުލީމު ހާސިލުކުރައްވަމުން ގެންދެވި ދުވަސްވަރެވެ. އޮގަސްޓު މަހު ކައިވެންޏަށް 70 އަހަރު ފުރުނު މި ދެކަނބަލުންގެ ހަތް ބޭފުޅުން ތިއްބަވައެވެ.
އުމުރުފުޅުން 101 އަހަރުގެ މަހާތީރަކީ މެލޭޝިޔާ ޒަމާނީ ކުރެއްވި ވެރިޔާގެ ގޮތުގައި ބެލެވެއެވެ. ދެ ދަހަރަށް ވުރެ ގިނަ ދުވަހު ވެރިކަން ކުރެއްވި މަހާތީރުގެ ފުރަތަމަ ދައުރުގައި، 1981 އިން 2003 އަށް، މެލޭޝިއާއަށް ޞިނާޢީ ގޮތުން ބޮޑު ކުރިއެރުމެއް ގެންނެވިއެވެ. އަދި، އެތައް ބިލިޔަން ޑޮލަރެއްގެ 1އެމްޑީބީ ޚިޔާނާތާ ގުޅިގެން ކުރީގެ ބޮޑޫވަޒީރު ނަޖީބް ރައްޒާޤު ވެރިކަމުން ދުރުކުރުމުގައި ވެސް މަހާތީރްގެ ދައުރެއް އޮތެވެ. 2018 ވަނަ އަހަރު ދެވަނަ ފަހަރަށް ބޮޑުވަޒީރު ކަމުގެ މަޤާމާ މަހާތީރް ޙަވާލުވެޑައިގަތީ އެ މަޤާމު އަދާކުރައްވާ އެންމެ ދޮށީ ބޭފުޅާގެ ގޮތުގައެވެ. ނަމަވެސް، ސިޔާސީ ކޯޅުންތަކުގައި 2020 ގައި ވެރިކަންކުރާ އިއްތިޙާދު ރޫޅި، ދެ އަހަރު ނުވަނީސް އެ ވެރިކަން ނިމުނެވެ.
ސިއްތީ ޙަސްމާއަކީ މަޑުމައިތިރި، މަޖާ މިޒާޖެއްގެ މަޤުބޫލު ބޭފުޅެކެވެ. މަހާތީރުގެ އުފަން ސްޓޭޓް ކެޑާގެ ފުރަތަމަ އަންހެން މެޑިކަލް އޮފިސަރަކީ އެކަމަނާއެވެ. އެކަމަނާ ވަނީ މައިންގެ ޞިއްޙަތަށާއި ޢާއިލާ ރޭވުމަށް ވަކާލާތު ކުރައްވާފައެވެ. މަހާތީރު ވިދާޅުވީ، ސިއްތީ ޙަސްމާއަކީ އޭނާގެ ކާމިޔާބީގެ މައިބަދަ ކަމުގައެވެ. ސިއްތީ ޙަސްމާއަކީ މެލޭ ދަރިކޮޅުގެ އަންހެނުންގެ ތެރެއިން އެ ޒަމާނުގައި ޔުނިވަރސިޓީއަށް ވަޑައިގަންނަވައި ޑިގްރީ ހާސިލުކުރެއްވި މަދު އަންހެނުންގެ ތެރެއިން ފާހަގަކޮށްލެވޭ ބޭފުޅެކެވެ.