ލެވަރ ކަޕްގެ ޗެމްޕިއަންކަން ޓީމް ޔޫރަޕް ހޯދައިފި

ލަންޑަންގެ އޯ ޓޫ އެރީނާގައި ބޭއްވި ލެވަރ ކަޕް ޓެނިސް މުބާރާތުގެ ޗެމްޕިއަންކަން ޓީމް ޔޫރަޕުން ހޯދައިފިއެވެ.

ޓީމް ޔޫރަޕާއި ޓީމް ވޯލްޑްގެ މެދުގައި ކޮންމެ އަހަރަކު ކުޅޭ މިމުބާރާތް މިފަހަރު ޓީމް ޔޫރަޕުން ކާމިޔާބު ކޮށްފައިވަނީ 13 ޕޮއިންޓް 5 ޕޮއިންޓުން ކާމިޔާބު ކޮށްގެންނެވެ. މިއީ ޓީމް ޔޫރަޕުން މިމުބާރާތް ކާމިޔާބު ކުރި 6 ވަނަ ފަހަރެވެ.

މިފަހަރުގެ މުބާރާތުގެ ފަހު ދުވަހުގެ ކުޅުމަށް ނިކުންއިރު ޓީމް ޔޫރަޕް އޮތީ 7 ޕޮއިންޓް 5 ޕޮއިންޓުން ކުރީގައެވެ. އަދި މިއާއެކު ތިންވަނަ ދުވަހު ފުރަތަމަ ކުޅެވިގެންދިޔައީ ޑަބަލްސް މެޗެކެވެ. މިމެޗުގައި އިޓަލީވިލާތުގެ ފްލާވިއޯ ކޯބޯލީ އާއި ޗެކިއާގެ ޔާކޫބް މެންސިކްވަނީ ޓީމް ވޯލްޑް ތަމްސީލް ކުރަމުންދިޔަ އޮސްޓްރޭލިއާގެ އެލެކްސް ޑި މިނޯ އާއި އެމެރިކާގެ ޓޭލަރ ފްރިޓްޒް ސީދާ ދެސެޓުން ބަލިކޮށްފައެވެ. މިމެޗުގެ ފުރަތަމަ ސެޓު ހަތެއް ފަހަކުން ޓީމް ޔޫރަޕް ކާމިޔާބު ކުރިއިރު ދެވަނަ ސެޓު އެޓީމުން ކާމިޔާބު ކޮށްފައިވަނީ ހައެއް ތިނަކުންނެވެ. މިކާމިޔާބީއާއެކު 10 ޕޮއިންޓް 5 ޕޮއިންޓުން ޓީމް ޔޫރަޕް ލީޑު ނެގިއިރު ރޭ ކުޅުމަށް ބާކީ އޮތް ސިންގަލްސް ތިން މެޗުގެ ތެރެއިން މުބާރާތް ކާމިޔާބު ކުރުމަށްޓަކައި އެޓީމަށް ބޭނުންވެފައިއޮތީ އެންމެ މެޗެކެވެ.

މިމުބާރާތުގައި ރޭ ދެން ފެނިގެންދިޔައީ މިސީޒަންގައި ފްރެންޗް އޯޕަން އާއި ޔޫއެސް އޯޕަން ކާމިޔާބު ކޮށްފައިވާ ޖަރުމަނުވިލާތުގެ އެލެގްޒެންޑަރ ޒުވަރޭވް އާއި އެމެރިކާގެ ލާނަރ ޓިއެންގެ ކުރިމަތިލުމެވެ. މިމެޗު ޒުވަރޭވް ސީދާ ދެސެޓުން ކާމިޔާބު ކުރުމާއެކު ބާކީ ދެމެޗު ނުކުޅެ އޮއްވާ މިމުބާރާތް ޓީމް ޔޫރަޕަށް ކާމިޔާބު ވެގެންދިޔައެވެ. މިމެޗުގެ ފުރަތަމަ ސެޓު ދިޔައީ ވަރަށް ވާދަވެރި ކޮށެވެ. ނަމަވެސް ޓައި ބްރޭކަކަށް ގޮސް މިސެޓު ޒުވަރޭވް ކާމިޔާބު ކޮށްފައިވަނީ ހަތެއް ތިނަކުންނެވެ. އަދި ދެވަނަ ސެޓު އޭނާ ކާމިޔާބު ކުރީ ހައެއް ތިނަކުންނެވެ. މިމެޗު ކާމިޔާބު ކުރުމާއެކު ކާލޯސް އަލްކަރާޒް އާއި ޑި މިނޯ އަދި ރަފައެލް ހޯޑާ އާއި ޓޭލަރ ފްރިޓްޒް ކުޅެން އޮތް ދެމެޗު އިތުރަށް ކުޅޭކަށެއް ނުޖެހުނެވެ.

މެޗަށްފަހު ވާހަކަ ދައްކަމުން ޒުވަރޭޒް ބުނީ ލެވަރ ކަޕްގައި ވޭތުވެދިޔަ ދެ އަހަރު އޭނާއަށް މެޗެއް ކާމިޔާބު ކުރެވިފައިނުވާ ކަމަށާއި އެހެން ކަމުން މިމެޗު ކާމިޔާބު ކުރެވުމުން ވަރަށް ހިތްހަމަ ޖެހިއްޖެ ކަމަށެވެ .މިމުބާރާތުގައި މިފަހަރު ޒުވަރޭވް ކުރިން ކުޅުނު މެޗުންވެސް ވަނީ ބަލިވެފައެވެ. ޒުވަރޭޒްގެ ވާހަކައިގާ އޭނާވަނީ ޓީމް ވޯލްޑް އިން މިމުބާރާތުގެ ތަށި ދިފާއު ކުރުމަށް ކުރި މަސައްކަތް ފާހަގަކޮށް ޓީމް ޔޫރަޕުން މިފަހަރު މުބާރާތް ކާމިޔާބު ކުރުމަށް ގުޅިގެން ކުރި މަސައްކަތް ފާހަގަ ކޮށްފައެވެ. މީގެއިތުރުން ޓީމެއްގެގޮތުގައި ކުޅެ މޮޅުވުމުން ކުރެވޭ އިހްސާސް ވަރަށް ތަފާތު ކަމަށާއި މިފަދަ މުބާރާތްތައް ޓެނިހުގައި ކުޅެވޭލެއް ތަންކޮޅެއް މަދުކަން ޒުވަރޭވް ފާހަގަ ކުރިއެވެ.

ޒުވަރޭވްވަނީ ޓީމް ޔޫރަޕުން މިމުބާރާތް ކާމިޔާބު ކުރި 6 ފަހަރުވެސް އެޓީމުގައި ހިމެނިފައެވެ. އަދި މިދިޔަ ދެއަހަރު މެޗަކުން މޮޅުނުވި ނަމަވެސް މިމުބާރާތުގައި އެންމެ ގިނަ ސިންގަލްސް މެޗު ކާމިޔާބު ކޮށްފައިވާ ކުޅުންތެރިޔަކީ ޒުވަރޭވްއެވެ. އެއީ އަށް މެޗު ކާމިޔާބު ކޮށްގެންނެވެ.

ލެވަރ ކަޕްގެ މިއަންނަ އަހަރުގެ މުބާރާތް ބޭއްވުމަށް ހަމަޖެހިފައިވަނީ އެމެރިކާގެ ކެލިފޯނިއާގެ އިންގްލްވުޑްގެ އިންޓުއިޓް ޑޯމްގައެވެ. މިއަންނަ އަހަރުގެ މުބާރާތް ވެގެންދާނީ ލެވަރ ކަޕްގެ 10 ވަނަ މުބާރާތަށެވެ.