ޔޫކްރެއިންގެ ދޮނެސްކު ސަރަޙައްދުން ރަޝިއާގެ ބާރުގެ ދަށަށް ގެންގޮސްފައިވާ ބައެެއް ސަރަޙައްދުތައް ޔޫކްރެއިންގެ އަސްކަރިއްޔާއިން އަލުން ހޯދާފައިވާ ކަމަށް ޔޫކްރެއިންއިން ބުނެފިއެވެ.
ޔޫކްރެއިންގެ އަސްކަރީ އިސް ކޮމާންޑަރެއް ކަމަށްވާ ބްރިގެޑިއާ ޖެނެރަލް އަންދްރީ ބިލެޓްސްކީ ވިދާޅުވީ ރަޝިއާއިން ޔޫކްރެއިނުގެ ބައެއް ސަރަޙައްދުތަކަށް ދެމުންދާ ހަމަލާތަކަށް ބުރޫ އެރުވުމަށް ކުރިއަށް ގެންދިޔަ އޮޕަރޭޝަނެއްގައި ޔޫކްރެއިންގެ ތަރޑް އާމީ ކޯޕްސްއިން 51 އަކަ ކިލޯމީޓަރުގެ ސަރަޙައްދެއް އަނބުރާ ހޯދާފައިވާ ކަމަށެވެ. ވިވަލްޑީގެ ނަމުގައި ހިންގަމުންދާ މި އަސްކަރީ ޙަރަކާތުގައި ދޮނެސްކުގެ އުތުރުން ޖުމްލަ 176 އަކަ ކިލޯމީޓަރު އަނބުރާ ހޯދައި، ތިން އަވަށެއް މިނިވަންކޮށް، އިތުރު ދެ އަވަށެއްގައި އަލުން ޔޫކްރެއިންގެ ބާރު ހިންގަން ފަށާފައިވާ ކަމަށް އޭނާ ވިދާޅުވިއެވެ.
އެމެރިކާގެ އިންސްޓިޓިއުޓް ފޮރ ދަ ސްޓަޑީ އޮފް ވޯ (އައިއެސްޑަބްލިޔު)އިން ބުނީ ޔޫކްރެއިންއިން ކުރިއަށް ގެންގޮސްފައިވާ އަސްކަރީ އޮޕަރޭޝަންގެ ސަބަބުން ޔޫކްރެއިންގެ ‘ފޯޓްރެސް ބެލްޓް’ ސިޓީތައް ވަށައިލުމަށް ރަޝިއާއިން ކުރަމުންދާ މަސައްތަކަށް ކާމިޔާބުކަމާއެކު ހުރަސް އެޅެމުންދާ ކަމަށެވެ.
މި އަހަރުގެ ތެރޭގައި ރަޝިއާގެ ފައުޖުތައް ކުރީ ސަފަށް ނިކުމެ ޔޫކްރެއިންގެ ސަރަޙައްދުތައް ހިފަމުންދާ މިންވަރު ވަނީ މަޑުޖެހިފައެވެ. ނަމަވެސް ޔޫކްރެއިންގެ ދެކުނުގެ އަވަށްތަކަށް ރަޝީއާއިން ދަނީ ވަރުގަދަ ހަމަލާތައް ދީ، އިރުމަތީ ސިޓީއެއް ކަަމަށްވާ ކޮސްޓިއަންޓިނިވްކާއަށް ވަންނަމުންނެވެ. ހަނގުރާމައިގައި އެންމެ ގިނަ ހަމަލާތައް ބަދަލުކުރަމުން ދަނީ ދޮނެސްކު ސަރަޙައްދުގައެވެ.
މި އަހަރުގެ ކުރީކޮޅު ވެސް ޔޫކްރެއިން ވަނީ ރަޝިއާއިން އެ ޤައުމުގެ ދެކުނު އިރުމަތީ ސަރަޙައްދުތަކުން ހިފާފައިވާ ސަރަޙައްދުތަކުގެ ތެރެއިން 700 އަކަ ކިލޯމީޓަރުގެ ސަރަޙައްދެއް އަނބުރާ ހޯދައިފައެވެ.