ޑރ. މަހާތިރުގެ އަނބިކަނބަލުން އަވަހާރަވުމާއި ގުޅިގެން ރައީސްގެ ތަޢުޒިޔާ
-
ޑރ. ސިތީ ޙަސްމާ އަވަހާރަވީ އުމުރުފުޅުން 100 އަހަރުގައި
މެލޭޝިއާގެ ކުރީގެ ބޮޑުވަޒީރު ޑރ. މަހާތިރު މުޙައްމަދުގެ އަނބިކަނބަލުން ޑރ. ސިތީ ޙަސްމާ މުޙައްމަދު ޢަލީ އަވަހާރަވުމާއި ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.
ޢާންމު ޞިއްޙަތަށް ވަކާލާތު ކުރެއްވުމުގައި އިސް ދައުރެއް އަދާކުރައްވާފައިވާ ޑރ. ސިތީ ޙަސްމާ މުޙައްމަދު ޢަލީ އަވަހާރަވުމާއި ގުޅިގެން ޑރ. މަހާތިރަށް ފޮނުއްވި ތައުޒިޔާގެ މެސެޖުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވަނީ ޑރ. ސިތީ ޙަސްމާއަކީ މެލޭޝިއާގައި އުފެދުނު އެންމެ ފުރަތަމަ އަންހެން ޑޮކްޓަރުންގެ ތެރޭގައި ހިމެނިވަޑައިގެންނެވި ބޭފުޅެއްކަން ފާހަގަކުރައްވައި އެކަމަނާ، މައިންގެ ޞިއްޙަތާއި، އާއިލާ ރޭވުމަށް ހިއްވަރުދީ ވަކާލާތުކުރެއްވި ބޭފުޅެއްކަމުގައި ވިދާޅުވެފައެވެ. އެކަމުގެ ސަބަބުން މި ހިތާމަވެރި ދަނޑިވަޅުގައި، އެކަމަނާ ޒިކުރާ އައުކުރެވިގެންދާނީ ޝުކުރުވެެރިކަމާއި ޤަދަރުވެރިކަމާއެކު ކަމަށްވެސް އެމަނިކުފާނު ވިދާޅުވިއެވެ. މީގެ އިތުރުން، މިންތީގެ ހަމަހަމަކަން ޤާއިމްކުރުމާއި، އާއިލާތަކުގެ ފުދުންތެރިކަން އިތުރުކުރުމަށް އެކަމަނާގެ އިސްނެންގެވުމާއެކު ހިންގެވި ކާމިޔާބު މަސައްކަތްތަކަށް ރައީސުލްޖުމްހޫރިއްޔާގެ މެސެޖުގައި އަލިއަޅުއްވާލެއްވިއެވެ. އަދި އެފަދަ އަގުހުރި ޚިދުމަތްތަކުން އެކަމަނާ މުޖުތަމަޢަށް ކޮށްދެއްވާފައިވާ ޚިދުމަތްތަކާއި އަންނަން އޮތް ޖީލުތައް ބާރުވެރިކުރުމުގައި އަދާކުރައްވާފައިވާ ދައުރު ފެނިގެންދާ ކަމަށްވެސް ރައީސް ވިދާޅުވިއެވެ.
ރައީސުލްޖުމްހޫރިއްޔާގެ މެސެޖުގައި، ދިވެހި ސަރުކާރާއި ރައްޔިތުންގެ ނަމުގައި، ޑރ. މަހާތިރު މުޙައްމަދާއި އެމަނިކުފާނުގެ ޢާއިލާއަށް އިޚްލާޞްތެރި ތަޢުޒިޔާ އަރިސްކުރެއްވިއެވެ. އަދި މަރުޙޫމާ ޑރ. ސިތީ ޙަސްމާގެ ޚިދުމަތްތަކުގެ ހަނދާންތަކުން ގެ ޢާއިލާއަށް ހިތްވަރާއި ތަސައްލީ ލިބި، މިހިތާމާގައި ބައިވެރިވާ އެންމެހާ ފަރާތްތަކަށް، ކެތްތެރިކަން ދެއްވުމަށް އެދިވަޑާއިގެންވިއެވެ.
ރައީސުލްޖުމްހޫރިއްޔާގެ މެސެޖުގައި މަރުޙޫމާގެ ހަޔާތުގެ ޒިކުރާއިން ހިތްވަރާއި ތަސައްލީ ލިބިލެއްވި މެލޭޝިއާގެ އެންމެހާ ރައްޔިތުންނަށް، ކެތްތެރިކަން ދެއްވުމަށް އެދިވަޑައިގެންނެވިއެވެ. ރައީސުލްޖުމްހޫރިއްޔާގެ މެސެޖު ނިންމަވާލެއްވީ މަރުޙޫމާގެ ފުރާނައަށް، ރަޙްމަތްލައްވައި، ސުވަރުގޭގެ ސުވަރުގޭގެ ދާއިމީ ނިއުމަތް މިންވަރުކުރެއްވުމަށް އެދިވަޑައިގެން މާތް ﷲގެ ޙަޟްރަތުގައި ދުޢާ ދަންނަވަމުންނެވެ.
އުމުރުފުޅުން 100 އަހަރުގައި ޑރ. ސިތީ ޙަސްމާ މުޙައްމަދު ޢަލީ، އަވަހާރަވެފައިވާއިރު، އެކަމަނާއާއި ބޮޑުވަޒީރު ޑރ. މާތިރުގެ ކައިވެނިފުޅަށް މިދިޔަ އޮގަސްޓު މަހު ވަނީ 70 އަހަރު ފުރިފައެވެ. އަދި ހަތް ބޭފުޅުން ތިއްބަވައެވެ. ޑރ. ސިތީ ޙަސްމާ ޖަނާޒާ ބޭއްވުމަށްފަހު، އެކަމަނާގެ ފަސްދާނުވަޑުވާނީ އެޤައުމުގެ އިދާރީ ވެރިރަށް ޕުތުރަޖާޔާގެ ޤަބުރުސްތާނެއްގައި ކަމުގައި ޑރ. މަހާތިރުގެ އޮފީހުން ވަނީ ވިދާޅުވެފައެވެ.