އިސްތިއުމާރުކޮށްފައިވާ ހުޅަނގު އައްސޭރީގައިވާ ޔަހޫދީ ވަޒަންވެރިންގެ އުފެއްދުންތައް މަނާކުރުމާ ގުޅިގެން، ނެދަލޭންޑްސްގެ ޑިޕްލޮމޭޓުންގެ ހުއްދަ ޔަހޫދީ ސަރުކާރުން ބާތިލްކޮއްފިއެވެ.
ޔަހޫދީން އިސްތިޢުމާރު ކޮއްފައިވާ ހުޅަނގު އައްސޭރީގެ ޣައިރުޤާނޫނީ ޔަހޫދީ ވަޒަންވެރިންގެ އުފެއްދުންތައް ނެދަލޭންޑްސްއަށް އެތެރެކުރުން މަނާކުރުމާ ގުޅިގެން، ފަލަސްޠީނުގެ ރާމަﷲގައި ހުންނަ ފަލަސްޠީނިއަން އޮތޯރިޓީގައި އެ ޤައުމު ތަމްސީލުކުރާ ޑިޕްލޮމޭޓުންގެ ޑިޕްލޮމެޓިކް ހުއްދަ ޔަހޫދީ ދައުލަތުން ބާޠިލުކޮށްފިއެވެ.
ޔަހޫދީ ޚާރިޖީ ވަޒީރު ގިދިއޮން ސާރ ހާމަކުރެއްވި ގޮތުގައި، ރާމަﷲގައި މަސައްކަތްކުރާ ނެދަލޭންޑްސްގެ ޑިޕްލޮމޭޓުންނަށް ދޫކޮށްފައިވާ ރަސްމީ ލިޔެކިޔުންތައް 7 ދުވަހުގެ ތެރޭގައި އަނބުރާ ޙަވާލުކުރަންޖެހޭނެއެވެ. އަދި އެ މުއްދަތު ހަމަވުމުން، އެ ފަރާތްތަކަށް ލިބިދޭ އެންމެހައި ޑިޕްލޮމެޓިކް އިމްތިޔާޒުތަކާއި ޤާނޫނީ ރައްކާތެރިކަން ނިމުމަކަށް އަންނާނެއެވެ.
މި ނިންމުމާ ގުޅިގެން ނެދަލޭންޑްސްގެ ޚާރިޖީ ވަޒީރު ޓޮމް ބެރެންޑްސެން ވިދާޅުވީ، ޔަހޫދީ ސަރުކާރުގެ މި ފިޔަވަޅާމެދު ކަންބޮޑުވެ ހިތާމަކުރައްވާ ކަމަށާއި، މިކަމަށް އެކަށީގެންވާ ރައްދު ފިޔަވަޅުތަކެއް އެޅުމަށް ސަރުކާރުން މަޝްވަރާކުރަމުންދާ ކަމަށެވެ. މީގެ އިތުރުން އޭނާ ފާހަގަކުރެއްވި ގޮތުގައި، ނެދަލޭންޑްސްއިން އެޅި ފިޔަވަޅުތަކަކީ ވަކި ދައުލަތަކާ ދެކޮޅަށް ކުރި ކަމެއް ނޫން ކަމަށާއި، އެއީ ޣައިރުޤާނޫނީ ވަޒަންވެރިވުންތަކަށް އެއްބާރުލުން ނުދިނުމުގެ ގޮތުން ބައިނަލްއަޤްވާމީ ޤާނޫނުތަކާއި މުޢާހަދާތަކަށް އިޙްތިރާމުކުރުމުގެ ގޮތުން ނިންމި ނިންމުމެކެވެ.
ނެދަލޭންޑްސްގެ އިތުރުން އިނގިރޭސިވިލާތުންވެސް ވަނީ ޔަހޫދީ ވަޒަންވެރިންގެ އުފެއްދުންތައް އެ ޤައުމަށް އެތެރެކުރުން މަނާކޮށްފައެވެ. އެކަމުގެ ބަދަލުހިފުމެއްގެ ގޮތުން ޔަހޫދީ ސަރުކާރުން ވަނީ މި މަހުގެ ކުރީކޮޅު އިރުމަތީ ޤުދުސްގައި ހުންނަ އިނގިރޭސި ކޮންސިއުލޭޓް ބަންދުކުރުމަށް އަމުރުކޮށްފައެވެ. މީގެ އިތުރުން ފަރަންސޭސިވިލާތް، ކެނެޑާ، ސްޕެއިން އަދި އަޔަލެންޑުންވެސް ވަނީ ޣައިރުޤާނޫނީ ވަޒަންވެރިންގެ ވިޔަފާރިތަކާއި އުފެއްދުންތަކާ ދެކޮޅަށް ދަތިކުރުމުގެ ފިޔަވަޅުތައް އަޅަން ފަށާފައެވެ.
ޣައްޒާއާއި ހުޅަނގު އައްސޭރީގައި ޔަހޫދީ އިސްތިއުމާރީ ބާރުތަކުން ހިންގަމުންދާ ލާއިންސާނީ ޖަރީމާތަކާއި ޤަތުލުޢާންމުތަކުގެ ސަބަބުން، ބެންޖަމިން ނަތަންޔާހޫގެ ހައްދުފަހަނައެޅި ޓެރަރިސްޓް ސަރުކާރު ވަނީ ބައިނަލްއަޤްވާމީ މައިދާނުގައި މުޅިން އެކަހެރިވެފައެވެ. އަދި ޔަހޫދީ ކެބިނެޓުގެ ދެ ވަޒީރަކަށް ބޭރުގެ ބައެއް ޤައުމުތަކުން ވަނީ ދަތިކުރުމުގެ ސީދާ ފިޔަވަޅުތައްވެސް އަޅާފައެވެ.