އީރާނުގެ ދުޝްމަނުން ޢަރަބި ކަނޑުން ވަރަށް އަވަހަށް ބޭރުކޮށްލާނެ ކަމަށް އީރާނުގެ އެންމެ މަތީ ވެރިޔާ، މުޖުޠަބާ ޚާމަނާއީ ވިދާޅުވެއްޖެއެވެ.
އީރާން-ޢިރާޤް ހަނގުރާމައަށް އަހަރު ފުރޭ ދުވަހާއި 2024ވަނަ އަހަރު އަވަހާކޮށްލި ޙިޒްބުاللهގެ އިސްވެރިޔާ، ޙަސަން ނަސްރުالله އަވަހާރަވި ދުވަހުގެ ޒިކުރާ އައު ކުރައްވައި ފޮނުއްވި މެސެޖެއްގައި ޚާމަނާއީ ވިދާޅުވީ އެހެން ޤައުމުތަކުގެ މައްޗަށް ބާރު ހިންގާ ޤައުމުތަކުން އީރާނަށް ހަމަލާތައް ދޭން ފެށިއިރު އީރާން އޮތީ އެންމެ ވަރުގަދަކޮށް ނޫން ކަމަށެވެ. އަދި އިންޒާރުތަކަށް ކުރިމަތިލައި ދިފާޢުވެވޭ ފަދަ ޙާލަތެއްގައި ނޫން ކަމަށެވެ. ނަމަވެސް އީރާނުގެ އަސްކަރީ ޤާބިލުކަން މިހާރު ވަރުގަދަކޮށްފައިވާ ކަމަށާއި، ބޮޑެތި ބާރުތަކުން މިހާރު އީރާނުގެ ހަމަލާތަކުން ރައްކާތެރިކަން ހޯދަމުންދާ ކަމަށެވެ. އަދި ހަނގުރާމަ ހުއްޓައިލުމަށް އެ ޤައުމުތަކުން ގޮވައިލަމުންދާ ކަމަށް އޭނާ ވިދާޅުވިއެވެ.
ވަކި ޤައުމެއްގެ ނަން ބަޔާން ކުރެއްވުމެއް ނެތި ޚާމަނާއީ އިތުރަށް ވިދާޅުވީ އީރާނުން އެ ޤައުމުގެ ދުޝްމަނުން ދެކުދު އީރާނުގެ ކަނޑުގެ ސަރަޙައްދުން ޢަރަބި ކަނޑާ ދިމާލަށް ބޭރުކޮށްފައިވާ ކަމަށެވެ. އީރާނުގެ ފައުޖުތަކުންނާއި ހުރްމުޒް ކަނޑުއޮޅި ބަލަހައްޓަމުންދާ ސިފައިން ދުޝްމަނުންނަށް ވަރުގަދަ ހަމަލާތައް ދީފައިވާ ކަމަށާއި، އޭގެ ސަބަބުން ޢަރަބި ކަނޑަށްވުރެ އެތެރެއަށް ޖެހުމަށް ދުޝްމަނުން ޖެހިލުންވާ ކަމަށް ވެސް އޭނާ ވިދާޅުވިއެވެ. އީރާނުގެ ސަރަޙައްދަށް ވަނުމަށް ކޮށްފައިވަާ މަސައްކަތްތަކުގެ ސަބަބުން ގެއްލުންވެފައި ވަނީ އެ ސަރަޙައްދަށް ވަނުމަށް މަސައްކަތް ކުރި ޤައުމުތަކަށް ކަމަށާއި، ޢަރަބި ކަނޑުން ވެސް އެ މީހުން ބޭރުކޮށްލާ ދުވަސް ގާތްވަމުންދާ ކަމަށް އޭނާ ވިދާޅުވިއެވެ.
ޚާމަނާއީ ވިދާޅުވީ އީރާނުގެ މުޖުތަމަޢުގެ ތެރޭގައި ޚިޔާލު ތަފާތުވުންތައް ހުރި ނަމަވެސް އީރާނުގެ ހައްޤުތަކަށް ވަކާލާތުކުރުމުގައި މުޅި ޤައުމު އެއް ގަލަކަށް އަރާ ކަމަށެވެ. އަދި ހުރްމުޒް ކަނޑުއޮޅީގެ މައްޗަށް އީރާނުގެ ބާރު އޮތުމާމެދު އެންމެން ވެސް އެއްބަސްވާ ކަމަށް އޭނާ ވިދާޅުވިއެވެ.
ޚާމަނާއީ މި ފަދަ މޭރުމަކުން ވާހަކަ ދައްކަވާފައި މި ވަނީ މި އަހަރުގެ ފެބްރުއަރީ މަހުގެ 28ވަނަ ދުވަހު އެމެރިކާއިން އިސްވެ އީރާނަށް ހަމަލާދީ ހަނގުރާމަ ކުރަމުންދާތާ ހަތް މަސް ދުވަސް ވެފައި ވަނިކޮށެވެ. ހަނގުރާމައަށް ދާއިމީ ނިމުމެއް ގެނައުމާ ގުޅޭ ގޮތުން އަދިވެސް އެއްބަސްވުމަކާ ހަމައަށް އާދެވިފައެއް ނުވެއެވެ.