ގޫގްލް އަރތުން އަލަށް ޢާންމުކުރި ސެޓެލައިޓް ފޮޓޯތަކުން، ފަލަސްޠީނުގެ ޣައްޒާގެ ބޮޑު ބައެއް ސުންނާފަތިކޮށް، ކުނިފުންޏަކަށް ބަދަލުކޮށްލާފައިވާ "ހައިރާންކުރަނިވި" މަންޒަރުތައް ހާމަވެއްޖެއެވެ. ޔަހޫދީ އަސްކަރިއްޔާއިން ހިންގާ ނަސްލުހޭދުގެ ސަބަބުން، 141 އަކަމޭލުގެ މި ސަހަރުގައި ހުރި ގިނަ ގެދޮރާއި، ހަސްފަތާލުތަކާއި، މަދަރުސާތައް ވަނީ ބިމާ ހަމަކޮށްލާފައެވެ. ޔަހޫދީންގެ ނިރުބަވެރި ބޮޑުވަޒީރު ބެންޖަމިން ނަތަންޔާހޫގެ ސަރުކާރުން ބޭރުގެ ނޫސްވެރިންނާއި މިނިވަން ތަޙުޤީޤުވެރިން ޣައްޒާއަށް ވަނުން މަނާކޮށްފައިވާއިރު، އެކުވެރި ދައުލަތްތަކުން (އދ) ވަނީ ހެކި އެއްކުރުމަށް އެ ސަރަޙައްދަށް ވަނުމުގެ ހުއްދައަށް އެދިފައެވެ.
ތާރީޚުގައި ދުށް އެންމެ ބޮޑު އިޤުތިޞާދީ ކާރިސާއާ ޣައްޒާ ކުރިމަތިލާން ޖެހިފައިވާ ކަމުގައި އދގެ ރިޕޯޓެއްގައި ވަނީ ބުނެފައެވެ. މި ގޮތުން، މަސައްކަތްކުރެވޭ އުމުރުގެ މީހުންގެ %90 ވަޒީފާނެތްއިރު، އަހަރަކު ބޮލަކަށް ޖެހޭ އާމްދަނީ ވަނީ އެންމެ 212 އެމެރިކާ ޑޮލަރަށް ވެއްޓިފައެވެ. މީގެއިތުރުން، ދަނޑުވެރިކަމާއި ޞިނާޢީ މަސައްކަތްތައް %94 ދަށަށް ގޮސްފައިވާއިރު، ފަލަސްޠީނުގެ ރައްޔިތުންނަށް މިހާރު ބޭނުންކުރެވެނީ ދަނޑުވެރިކަން ކުރެވޭ ބިމުގެ އެންމެ %1.5 އެވެ.
ޔަހޫދީ ފައުޖުން ދިން ޢުދުވާނީ ހަމަލާތަކުގެ ސަބަބުން 60 މިލިޔަން ޓަނުގެ ކުނި މުޅި ޣައްޒާއަށް ފެތުރިފައިވާ ކަމަށް ލަފާކުރެވެއެވެ. ރެޑް ކްރޮސްއިން ބުނީ، މި ތަކެތި ނެގުމަށް މުޅި ސަރަޙައްދުގައި ވެސް އޮތީ، ބިންގަނޑު ކޮނުމަށް ބޭނުންކުރާ އެންމެ އުޅަނދެއް ކަމުގައެވެ. އަދި، ޝަހީދުކޮށްލާފައިވާ އެތައް ހާސް ބަޔެއްގެ ހަށިތައް ކުނިތަކުގެ ދަށުގައި ވާނެ ކަމަށް ބެލެވޭއިރު، މިހާތަނަށް ފެނުނު ހަށިތަކުގެ ތެރެއިން 1،129 މީހެއްގެ ވަނަވަރު ދެނެގަނެވިފައި ނުވާ ކަމަށް ޣައްޒާގެ އޮފިޝަލުން ހާމަކުރެއްވިއެވެ. މާހިރުން ބުނީ، މި ކުނިތައް އެއްކޮށް ސާފުކުރުމަށް އެތައް ދަހަރެއް ހޭދަވެދާނެ ކަމުގައެވެ.
ޣައްޒާގެ ހަސްފަތާލުތަކުގެ %90 ސުންނާފަތިކޮށްލާފައިވާ ކަމަށް ދުނިޔޭގެ ޞިއްޙަތު ޖަމުޢިއްޔާއިން (ޑަބްލިޔުއެޗްއޯ) ލަފާކުރެއެވެ. އަދި އާމާރާތްތަކުގެ %82 އާއި ޢާންމުންގެ ގެދޮރުގެ %90 އަށްވުރެ ބޮޑުބައި ސުންނާފަތިކޮށް ބިމާ ހަމަކޮށްލާފައިވާ ކަމުގައި އދގެ ސެޓެލައިޓް ސެންޓަރުން ހާމަކުރިއެވެ. ޔަހޫދީން ޤަތުލުޢާންމުގެ ކުށްތަކުގެ ހެކި ފޮރުވުމަށް ގައުކުނޑިއާއި ކުންޏާއި ކޮންކުރީޓުތައް ނައްތައިލަމުންދާ ކަމަށް ތުހުމަތުކުރެވޭއިރު، މީގެ ސަބަބުން ޔަހޫދީ ފައުޖުން ހިންގަމުންދާ އިންސާނިއްޔަތާ ޚިލާފު ޖަރީމާތަކުގެ ހެކި ފޮހެވިދާނެ ކަމުގައި އދގެ މާހިރުން އިންޒާރުދެއެވެ. ނަމަވެސް، ޔަހޫދީން ވަނީ ހަނގުރާމައިގެ ކުށްތައް ކުރި ކަމަށް ކުރެވޭ ތުހުމަތުތައް ދޮގުކޮށްފައެވެ.