ތަކުރާރުކޮށް ޓްރެފިކް ޤަވާއިދުތަކާއި ޚިލާފުވާނަމަ ހަރުކަށި ފިޔަވަޅު!
-
މާލޭގެ އިތުރުން ރަށްރަށުގައިވެސް ފިޔަވަޅުތައް ތަންފީޒުކުރާނެ
-
އަމާޒަކީ މަގުތައް ރައްކާތެރިކުރުން
މަގުމަތީގެ އުސޫލްތަކާއި ޓްރެފިކް ޤާނޫނާއި ޤަވާއިދުތަކަށް ތަކުރާރުކޮށް ޚިލާފުވާ ފަރާތްތަކާމެދު ޚާއްސަ ފިޔަވަޅުތަކެއް ފުލުހުން އަޅަމުންދާނެކަމަށް ކޮމިޝަނަރ އޮފް ޕޮލިސް އަޙްމަދު މުޙައްމަދު ވިދާޅުވެއްޖެއެވެ.
ކޮމިޝަނަރ އޮފް ޕޮލިސް މިހެން ވިދާޅުވީ މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، ޓްރެފިކް ގަވާއިދުތަކާ ތަކުރާރުކޮށް ޚިލާފުވާ ފަރާތްތަކާމެދު ހަރުކަށި ފިޔަވަޅު އެޅުމާ ގުޅޭގޮތުން ދެއްވި މެސެޖެއްގައެވެ.
ސީޕީގެ މެސެޖުގައި ޓްރެފިކްގެ އާއްމު އުސޫލްތަކަށާއި، އަދަބުތަކަށް ބޯނުލަނބާ މަދު ބައެއްގެ ސަބަބުން، ގިނަ ބައެއްގެ ހައްގުތައް ގެއްލި، ނުރައްކާތެރި އެކި ހާދިސާތައް ހިނގަމުންދާކަން ވަނީ ފާހަގަކުރައްވާފައެވެ. އެހެންކަމުން އެފަދަ އަމަލުތައް ހިންގާ ފަރާތްތަކާމެދު ހަރުކަށި ފިޔަވަޅު އަޅާނެކަމަށާއި، އެފަދަ ފަރާތްތަކަށް ފިޔަވަޅުއަޅަން އިދާރާތަކަށް އަންގަވާފައިވާނެކަމަށް ސީޕީ ވިދާޅުވިއެވެ.
މިފަދަ ފިޔަވަޅުތައް އެޅުމުގެ މަޤްސަދަކީ މަގުތަކަކީ އެންމެންނަށް ރައްކާތެރިތަނަކަށް ހެދުންކަމަށް ސީޕީ ވިދާޅުވިއެވެ. އަދި ނުރައްކާތެރި ހާދިސާތައް ހުއްޓުވުމަކީވެސް މަޤްސަދެއްކަމަށް ވިދާޅުވިއެވެ.
އެ ފިޔަވަޅުތައް އަޅާނީ ކަމާގުޅުންހުރި އިދާރާތަކުން ގުޅިގެންކަމަށާއި، މާލެ ސަރަހައްދުގެ އިތުރުން އަތޮޅުތެރޭގައި ވެސް މިފަދައިން ފިޔަވަޅުތައް އަޅާނެކަމަށް ސީޕީ ވިދާޅުވިއެވެ.
އަދި ފުލުހުން ކުރައްވާ މިފަދަ މަސައްކަތްތަކަށް އެންމެހާ ފަރާތްތަކުން އެއްބާރުލުން ދެއްވުމަށްވެސް ކޮމިޝަނަރ އޮފް ޕޮލިސް ވަނީ އިލްތިމާސްކުރައްވާފައެވެ.
ޤަވާޢިދާ ޚިލާފުވާ ފަރާތްތަކާމެދު ހަރުކަށި ފިޔަވަޅު އަޅުއްވާނެކަން ސީޕީ ހާމަކުރައްވާފައި މިވަނީ މިފަހުން މާލެ ސަރަޙައްދުގައި ހިނގާފައިވާ އެކްސިޑެންޓްތަކާ ގުޅިގެން އެކިފަރާތްތަކަށް އަނިޔާލިބި ބައެއް ފަރާތްތަކުގެ ފުރާނައަށް ގެއްލުވި ހާދިސާތަކެއް ހިނގާފައިވާ ދަނޑިވަޅެއްގައެވެ.