ތާރީޚީ ކާމިޔާބީއާއެކު ޤައުމީ ރާޒުވާ ޓީމު އެނބުރި ޤައުމަށް

އުޒްބަކިސްތާނުގައި ކުރިއަށްދާ 46 ވަނަ ޗެސް އޮލިމްޕިއާޑުގައި ވާދަކުރި ޤައުމީ ރާޒުވާ ޓީމު ރާއްޖެ އަތުވެއްޖެއެވެ.

މިމުބާރާތުގައި ވާދަކޮށް ރާއްޖޭގެ އަންހެން ޓީމުވަނީ ވާދަކުރި ކެޓަގަރީގެ ރަން މެޑައްޔެއް ހޯދާ، ތާރީޚީ ކާމިޔާބީއެއް ޤައުމަށް ހޯދަދީފައެވެ. މި ޓީމުގައި ހިމެނޭ ކުޅުންތެރިންނަކީ ރާއްޖޭގެ އެއްވަނަ އަންހެން ކުޅުންތެރިޔާ ނިހާޔާ އަހްމަދު، އީނާ ޢަބްދުﷲ ހަސަން، މަރްޔަމް ލައިސާ ޢަބްދުއްރަޝީދް، ޢާއިޝަތު އަލްޔާ މުހައްމަދު ޝަރީފްގެ އިތުރުން ޢާއިޝަތު ނޯޔާ ޝަހުރުއްދީން އަފީފެވެ. މީގެ އިތުރުން މިމުބާރާތުގައި ރާއްޖޭގެ އެންމެ ވަރުގަދަ ފަސް ކުޅުންތެރިންވެސްވަނީ ވާދަކޮށް މޮޅު ކުޅުމެއްދައްކާފައެވެ.

ޓީމާއެކު މާލެ އައުމަށްފަހު ވެލާނާ އިންޓަނޭޝަނަލް އެއާޕޯޓުގެ ވީއައިޕީގައި ހުރެ ޕީއެސްއެމް ނިއުސްއާ ވާހަކަދައްކަމުން ޓީމުގެ ތަޖުރިބާކާރު ކުޅުންތެރިޔާ ނިހާޔާވަނީ މުބާރާތުގެ ތަޖުރިބާތައް ހިއްސާކޮށްފައެވެ. އޭނާ ބުނެފައިވަނީ ޓީމުން ހޯދި ކާމިޔާބީއާމެދު ވަރަށް ފަޚުރުވެރިވާކަމަށެވެ. މިއީ ޓީމުގެ ކޮންމެ ކުޅުންތެރިޔަކުވެސް ހިތްވަރާއެކު ކުރި ބުރަ މަސައްކަތުގެ ނަތީޖާކަމަށް އޭނާ ފާހަގަކުރިއެވެ.

"ވަރަށް އުނަދަގޫ މުބާރާތެއް. ވަރަށް ގިނަ ގޮންޖެހުތަކެއް ގިރާކޮށްފަ، ވަރަށް ވަރުގަދަ ކުޅުންތެރިންނާ ވާދަކޮށް، މެޗުތަކުން ލިބުނު ނަތީޖާއަކީ ލިބޭނެކަމަށް ހީކުރެވުނު ކުރެވުނު ނަތީޖާތަކެއް ނޫން. އެހެންނަމަވެސް ޓީމުން ގަދައަޅާ މަސައްކަތްކުރީ އެންމެ ރަނގަޅު ނަތީޖާއެއް ނެރުމަށް" ނިހާޔާ ބުންޏެވެ.

ރާޒުވާގެ ޤައުމީ އަންހެން ޓީމުން ރާއްޖޭގެ ކުޅިވަރުގެ ތާރީޚުން ފަޚުރުވެރި ޞަފްޙާއެއް ހޯދިއިރު، މިކާމިޔާބީއަކީ އެންމެފަހު ވަގުތާހަމައަށް ހިތްވަރު ދޫކޮށްނުލާ ކުރެވުނު ބުރަ މަސައްކަތުގެ ނަތީޖާކަމަށް ނިހާޔާ ފާހަގަކުރިއެވެ. މުބާރާތުގައި 37 ޤައުމާ ވާދަކޮށްފަވާއިރު، އެ މެޗުތަކަކީ އުނދަގޫ މެޗުތަކެއްގެ ގޮތުގައި ނިހާޔާ ސިފަކުރިއެވެ. އެހެންނަމަވެސް ޓީމެއްގެ ގޮތުގައި މަސައްކަތްކޮށް ލިބުނު ކާމިޔާބީއާމެދު ފަޚުރުވެރިވާކަމަށް ޒުވާން އެތުލީޓު ބުނެފަވެއެވެ.

"ވަރަށް އުނދަގޫ މެޗުތަކެއްގައި ފައިޓްކޮށްފަ ގިވަޕްނުކޮށް، ނަތީޖާއެއް ހޯދައިގެން ކެޓަގަރީގެ މެޑަލް މި ލިބުނީ" ނިހާޔާ ބުންޏެވެ.

އުޒްބަކިސްތާނުގެ ސަމަރކަންޑް ސްޕޯޓްސް ކޮމްޕްލެކްސްގައި މިމަހުގެ 15 އިން 28 އަށް ކުރިއަށްދިޔަ މިމުބާރާތުގައި ރާއްޖޭގެ އަންހެން ޓީމުން ހޯދި ކާމިޔާބީއަކީ މިހާތަނަށް ރާޒުވާއިން ރާއްޖޭގެ އަންހެން ޓީމެއް ހޯދި އެންމެ ފުރިހަމަ ކާމިޔާބީއެވެ. ޓީމުން ވާދަކުރި "އީ" ކެޓަގަރީއިން ރަން މެޑަލް ހޯދުމުގެ އިތުރުން ޤައުމީ ޓީމުގެ ދެ ކުޅުންތެރިޔަކުވަނީ މިމުބާރާތުން ވުމަން ކެނޑިޑޭޓް މާސްޓާ (ޑަބްލިއުސީއެމް) ޓައިޓްލްވެސް ހޯދާފައެވެ. އެ ދެ ކުޅުންތެރިންނަކީ މަރްޔަމް ލައިސާ ޢަބްދުއްރަޝީދާއި އުމުރުން 14 އަހަރުގެ އީނާ ޢަބްދުﷲ ހަސަންއެވެ.