37000 މީހުން ގައިންގަޔަށް ނާރާ ބައްޔަށް ސްކްރީންކޮށްފި

މިއަހަރުގެ މިހާތަނަށް 37,038 މީހުން ގައިންގަޔަށް ނާރާ ބައްޔަށް ސްކްރީންކޮށްފައިވާކަމަށާއި އޭގެ ތެރޭގައި %18 މީހުންނަކީ ލޭ މައްޗަށް ދާ މީހުންކަމަށް ހެލްތް ޕްރޮޓެކްޝަން އެޖެންސީ އެޗްޕީއޭއިން ވިދާޅުވެއްޖެއެވެ. ލޭ މައްޗަށް ދިއުމަކީ ހިތުގެ ބައްޔަށް މީހުން ހުށައެޅޭ ހިރާސްތަކުގެ ތެރެއިން ހިމެނޭ ކަމެކެވެ.

ދުނިޔޭގެ ހިތުގެ ދުވަހާ ގުޅިގެން އެޗްޕީއޭއިން ނެރުނު ރިޕޯޓެއްގައި ވިދާޅުވީ ވަކި ޝިއާރެއް ކަނޑައަޅައިގެން މިދުވަސް ފާހަގަކުރުމަށް އެކި ހަރާކާތްތައް ކުރިއަށް ގެންދެވެނީ ހިތުގެ ދުޅަހެޔޮކަމާ ބެހޭ ގޮތުން ހޭލުންތެރިކޮށް، ހިތުގެ ބަލިތަކަށް ހުށައެޅޭ ހިރާސްތައް ދެނެގަނެ ރައްކާތެރިވެތިބުމަށް ބާރު އެޅުމާއި ހިތުގެ ދުޅަހެޔޮކަމަށް މަގުފަހިވާގޮތަށް ދިރިއުޅުން ބައްޓަން ކުރާނެ ގޮތާއި ހިތުގެ ބަލިތަކުގެ ނުރައްކާތައް އަންގައިދީ ހޭލުންތެރިކުރުމަށްކަމަށެވެ

މި އަހަރުގެ ހިތުގެ ދުވަހުގެ ޝިޢާރަކީ "ޑޯންޓް މިސް އަ ބީޓް"އެވެ. މި ޝިއާރުގެ މަޤްސަދަކީ ހިތާއި ލޭހުޅޮޅިތަކުގެ ބަލިތަކުގެ އަލާމާތްތައް ދެނެގަނެ، ފަރުވާ އަވަހަށް ފެށުމަށް ބާރުއެޅުމެވެ. މި ގޮތުން ކޮންމެ މީހަކުވެސް، ހިތުގެ ބަލިން ރައްކާތެރިވުމަށް އަމަލީގޮތުން ދިރިއުޅުމުގެ ވައްޓަފާޅިއަށް ބަދަލުގެނައުމާއި ދުރާލާ ހިތުގެ ބައްޔަށް ސްކްރީންކުރުމަށް އަހުލުވެރިކޮށް ބާރުއެޅުން ހިމެނެއެވެ.

ހިތާއި ލޭހޮޅިތަކުގެ ބައްޔަކީ ގައިންގަޔަށް ނާރާ ބަލިތަކުގެ ތެރެއިން ދުނިޔޭގައި އެންމެ ގިނައިން މީހުން މަރުވާ އެއްބައްޔެވެ. ދިވެހިރާއްޖޭގައި ވެސް ގައިންގަޔަށް ނާރާ ބަލިތައް ނިސްބަތުން ގިނަވެ، މަރުވާ މީހުންގެ %84 އަކީ މިފަދަ ބަލިތައް ތަޙައްމަލު ކުރާ މީހުންނެވެ. ގައިންގަޔަށް ނާރާ ބަލިތަކުގެ ހިރާސްތައް ދެނެގަތުމުށް ހެދުނު "ނޮން ކޮމިއުނިކަބްލް ޑިޒީޒް ރިސްކް ފެކްޓަރ ސަރވޭ 2020 -2021" ދައްކާ ގޮތުގައި ރާއްޖޭގައި 15 އަހަރާއި 65 އަހަރާ ދެމެދުގެ %4.7 މީހުންނަކީ ހިތުގެ ބަލި، ސްޓްރޯކް އަދި އެންޖީނާ ފަދަ ބަލިތައް ޖެހިފައިވާ މީހުންނެވެ.

ގައިންގަޔަށް ނާރާބަލިތަކުގެ ހިރާސްތަކަށް މީހުން ހުށަހެޅިފައިވާގޮތް ދެނެގަތުމަށާއި ބަލި ދުރާލާ ދެނެގަތުމަށް ސްކްރީންކުރުމުގެ އިންތިޒާމުތައް ރަގަޅު ނިޒާމެއްގެ ދަށުން ކުރިއަށް ގެންދިއުމަށް ރާއްޖޭގައި ޕްރައިމަރީ ހެލްތު ކެއަރ ނިޒާމު ހަރުދަނާކުރުމުގެ ގިނަ މަސައްކަތްތަކެއް ދަނީ ކުރަމުންނެވެ.

އެޗްޕީއޭއިން ވިދާޅުވީ މާލޭ ސަރަހައްދުގެ އިތުރުން އަތޮޅު ތެރޭގައި ޕްރައިމެރީ ހެލްތް ކެއަރ ނިޒާމް ހަރުދަނާކުރުމަށް ފަށާފައިވާ މަސައްކަތުގެ ދަށުން ރާއްޖޭ ގެ ހުރިހާ އަތޮޅެއް ގައި ޞިއްޙީ ދާއިރާގެ ގިނަ ޚިދުމަތްތެރިންނަށް ކަމާ ގުޅޭ ތަމްރީނުތައް ދެވި، ކުރިއާލާ ބައްޔަށް ސްކްރީންކޮށް އެ މައުލޫމާތުތައް ބަލަހައްޓަމުންދާކަމަށެވެ. މިގޮތުން މިއަހަރުގެ ސެޕްޓެމްބަރު މަހުގެ ނިޔަލަށް 37,038 މީހުން ގައިންގަޔަށް ނާރާ ބައްޔަށް ސްކްރީން ކޮށްފަިއވާކަމަށް އެޗްޕީއޭއިން ވިދާޅުވިއެވެ. މީގެ ތެރޭގައި %21.2 މީހުންނަކީ ކޮލޮސްޓްރޯލް މައްޗަށް ދާ މީހުނނާއި %10.4 ހަކުރުބަލި ތައްހަމަލް ކުރަމުންދާ މީހުން ހިމެނޭކެމަށް އެޗްޕީއޭއިން ވިދާޅުވިއެވެ. އަދި %18 މީހުންވަނީ ލޭ މައްޗަށް ދާ މީހުންގެ ގޮތުގައި ރިކޯޑް ކުރެވިފައިވާކަމަށްވެސް އެޗްޕީއޭއިން ވިދާޅުވިއެވެ. ލޭ މައްޗަށް ދިއުމަކީ ހިތުގެ ބައްޔަށް މީހުން ހުށައެޅޭ ހިރާސްތަކުގެ ތެރެއިން ހިމެނޭ ކަމެކެވެ.

ހިތުގެ ބަލިތަކަށް ހުށަ ހެޅޭނެ އެންމެ ބޮޑު އެއް ނުރައްކާތެރި ހިރާސް އާއި ދެކޮޅަށް ފިޔަވަޅު އެޅުމުގެ ގޮތުން، އަންނަން އޮތް ޖީލުތަކަށް އަމާޒުކޮށް ޖެނެރޭޝަނަލް ބޭން ގެ ނަމުގައި ދުންފަތުގެ އިސްތިއުމާލުކުރުން މަނާކުރުމުގެ ސިޔާސަތެއް ވަނީ ތައާރަފުކޮށްފައެވެ. އަދި ދުންފަތުން ރައްކާތެރިވެފައިވާ މުޖުތަމަޢެއް ބިނާކުރުމަށްޓަކައި މިއަހަރު މޭ މަހުގައި 5 އަހަރު ދުވަހުގެ ޤައުމީ ކެމްޕޭނެއްވެސް ވަނީ ފަށާފައެވެ.

ހަކުރުބައްޔާއި ހިތުގެ ބަލިތައް ފަދަ ގައިންގަޔަށް ނާރާ ބަލިތަކުން ރައްކާތެރިވުމަށްޓަކައި، ދުޅަހެޔޮ އަދި ހަރަކާތްތެރި ދިރިއުޅުމުގެ އާދަތަކަށް ބާރުއެޅުމުގެ ގޮތުން ދިވެހިރާއްޖޭގައި ވަނީ ނެޝަނަލް ގައިޑް ލައިންސް ނުވަތަ ގައުމީ އިރުޝާދުތަކެއް އެކުލަވާލާފައެވެ.