އަންނަ ދިރާސީ އައު އަހަރުގެ ކިޔެވުން ފަށާނީ ޖެނުއަރީ 17ގައި
-
ފުރަތަމަ ޓާމްގެ ޗުއްޓީ ލިބޭނީ ޖުލައި 16އިން 31އަށް
-
ބޮޑު ޗުއްޓީ ފެށޭނީ ޑިސެމްބަރު 10ގައި
އަންނަ ދިރާސީ އައު އަހަރުގެ ކިޔެވުން ޖެނުއަރީ 17ވަނަ ދުވަހު ފަށާގޮތަށް ހަމަޖައްސައި ވަގުތީ އެކަޑަމިކް ކަލަންޑަރު އާންމުކޮށްފިއެވެ.
ތަޢުލީމީ ވުޒާރާއިން އާންމުކުރެއްވި އަންނަ އަހަރުގެ ވަގުތީ އެކަޑެމިކް ކަލަންޑަރު ވާގޮތުން އަންނަ އަހަރުގެ ކިޔެވުން ފެށޭނީ ޖެނުއަރީ މަހުގެ 17ވަނަ ދުވަހުއެވެ. އަދި ފުރަތަމަ ޓާމްގެ މިޑް ބްރޭކް މެއި މަހުގެ 16 އިން 22 ލިބޭއިރު ފުރަތަމަ ޓާމްގެ ކިޔެވުން ނިންމާ ދަރިވަރުންނަށް ޗުއްޓީ ލިބޭނީ ޖުލައި މަހުގެ 16އިން 31އަށެވެ.
މި ކަލަންޑަރުގައި ވާގޮތުން ދެވަނަ ޓާމްގެ ކިޔެވުން އަންނަ އަހަރު އޯގަސްޓް މަހުގެ ފުރަތަމަ ދުވަހު ފަށާއިރު ދެވަނަ ޓާމްގެ ކިޔެވުން ނިންމާ ބޮޑު ޗުއްޓީ ލިބޭނީ ޑިސެމްބަރު 10 އިން 2028 ވަނަ އަހަރުގެ ޖެނުއަރީ މަހުގެ 4 ވަނަ ދުވަހާއި ހަމައަށެވެ. އަދި 2028 ވަނަ އަހަރުގެ ކިޔެވުން ފެށޭނީ ޖެނުއަރީ 9 ވަނަ ދުވަހުއެވެ.
މިފަހަރުގެ ކަލަންޑަރުގައިވެސް ވަނީ އަލަށް ސްކޫލްއަށް ދަރިވަރުން ވައްދާ ތާރީޚާއި އެއް ސްކޫލްއިން އަނެއް ސްކޫލްއަށް ދަރިވަރުން ބަދަލުކުރެވޭނެ މުއްދަތުވެސް ހިމަނާފައެވެ. އެގޮތުން ފުރަތަމަ ޓާމްގައި އެއް ސްކޫލްއިން އަނެއް ސްކޫލްއަށް ބަދަލުވުމުގެ ފުރުޞަތު ދީފައިވަނީ މެއިމަހުގެ 9 އިން ޖޫން 10 އަށެވެ. އަދި ދެވަނަ ފަހަރަށް އެއް ސްކޫލްއިން އަނެއް ސްކޫލްއަށް ބަދަލުވުމުގެ ފުރުޞަތު ދިނުމަށް ނިންމާފައިވަނީ އޮކްޓޫބަރު މަހުގެ 10 އިން ނޮވެމްބަރު މަހުގެ 9ވަނަ ދުވަހާހަމައަށެވެ. މީގެ އިތުރުން އަންނަ އަހަރު އަލަށް ސްކޫލަށް ކުދިން ވެއްދުމަށް ކަނޑައަޅާފައިވާ މުއްދަތަކީ 4 ޖުލައިން 31 އޯގަސްޓްއާ ހަމައަށެވެ.
އަންނަ އަހަރުގެ ކަލަންޑަރުގައި ސްކޫލުގައި ކިޔަވައިދޭނެ ދުވަސްތަކާއި އެއް ދަންފަޅީގައި ކިޔަވައިދޭނެ ދުވަސްތައް ވަނީ ވަކިކޮށްފައެވެ. އަދި ކުޑަކުދިންގެ ދުވަހާއި ޓީޗަރުންގެ ދުވަހަކީ އެއް ދަންފަޅީގައި ކިޔަވައިދޭ ދުވަސްތައް ކަމަށް ވަނީ ކަނޑައަޅައިފައެވެ.