"ނުކުޅުދުންތެރިކަން ހުންނަ މީހުންނަށް ފުރުޞަތުތައް ހޯދައިދޭނަން"

ނުކުޅުދުންތެރިކަން ހުންނަ ފަރާތްތަކަށް ހަމަހަމަ ފުރުޞަތުތައް ހޯދައިދިނުމަށް ހުރި ދަތިތައް ހައްލުކޮށްދެއްވާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ، މިހަފްތާގެ ރައްޔިތުންގެ އަޑު ޕްރޮގްރާމްގައި އާއްމު ފަރާތަކުން ޙިއްސާކުރި ކަންބޮޑުުވުންތަކާއި ގުޅިގެން ވާހަކަފުޅުއްކަވަމުންނެވެ. ނުކުޅުދުންތެރިކަން ހުންނަ ފަރާތްތަކަށް ހަމަހަމަ ފުރުޞަތުތައް ހޯދައިދެއްވުމަކީ އެ މަނިކުފާނު ޚާއްސަ އިސްކަމެއް ދެއްވާކަމެއްކަން ރައީސް ފާހަގަކުރެއްވިއެވެ. އަދި ސަރުކާރުން މަސައްކަތްކުރައްވަނީ މުޅި މުޖުތަމަޢުއަށް ފައިދާވާ ގޮތަށް، ހަމަހަމަ ފުރުޞަތުތަކެއް ހޯދާދިނުމަށްކަމަށް ވެސް ރައީސް ވިދާޅުވިއެވެ.

"ތިވިދާޅުވި ހުރިހާ ކަމަކަށް އަޅުގަނޑު އެޑްރެސްކުރާނަން. ވީއެންމެ ރަނގަޅަކަށް ވީއެންމެ އަވަހަކަށް އެ ކަންކަމުގައި ވަކި ކުއްޖަކަށް ނޫން، މުޅި މުޖުމަޢުއަށް ފައިދާވާނެ ގޮތަކަށް ކަންކަން ފަހިވާން އަޅުގަނޑު ބޭނުމީ." ރައީސް ޑރ.މުޙައްމަދު މުޢިއްޒު ވިދާޅުވިއެވެ.

މި ހަފްތާގެ ރައްޔިތުންގެ އަޑު ޕްރޮގްރާމްގައި، ޑައުންސިންޑްރޯމް ހުންނަ ކުއްޖެގެ ބެލެނިވެރިޔަކު ވަނީ އޭނާއަށް ދިމާވެފައިވާ ގޮންޖެހުންތައް ރައީސާއި ޙިއްސާކޮށްފައެވެ. ފާތިމަތު ފައިރޫޒާ އާދަމް ވަނީ ޑައުންސިންޑްރޯމް ހުންނަ މީހުންނާއި، އެހެނިހެން ނުކުޅުދުންތެރިކަން ހުންނަ ފަރާތްތަކަށް ތަޢުލީމާއި، ކުޅިވަރު ފަދަ ދާއިރާތަކުން ތަފާތުކުރުމަކާއި ނުލާ ޚިދުމަތްތައް ހޯދައިދޭންޖެހޭކަން ފާހަގަކޮށްފައެވެ. އޭނާގެ ދަރިފުޅު ވަރަށް ކުޑައިރުވެސް ތަޢުލީމް ހާސިލްކުރަން ބޭނުންވި ސްކޫލުން ފުރުޞަތު ނުދިންކަމަށް ފައިރޫޒާ ފާހަގަކުރިއެވެ. އޭގެ އިތުރުންވެސް ޑައުންސިންޑްރޯމް ހުންނަ ކުއްޖަކަށްވުމުން، ތަޢުލީމީ ނިޒާމުގެ ތެރެއިން ތަފާތުކުރުންތަކާއި ދަތިތަކާއި ދިމާވިކަމަށް ފައިރޫޒާ ފާހަގަކުރިއެވެ.

އެގޮތުން، ޚާއްސައެހީއަށް ބޭނުންވާ ކުދިންނަށް ތަޢުލީމު އުނގަންނައިދޭއިރު އެއް މުދައްރިސަކު ގިނަ ދަރިވަރުންނަށް އުނގަންނައިދިނުމަކީ ދިމާވާ ގޮންޖެހުމެއްކަމަށް އޭނާ ފާހަގަކުރިއެވެ. އޭގެ ސަބަބުން ދަރިވަރުންނަށް ސަމާލުކަން ދޭން އުނދަނގޫވާކަމަށް އޭނާ ފާހަގަކުރިއެވެ. ހަމައެހެންމެ، ޚާއްސަ އެހީއަށް ބޭނުންވާ ކުދިންނަށް، އެ ކުއްޖަކަށް އެންމެ އެކަށީގެންވާ ފަދަ ތަޢުލީމީ ފުރުޞަތުތައް ފަހިވާނެ އިންތިޒާމްތަކެއް ހަމަޖައްސާދިނުމަށް އޭނާ ވަނީ އެދިވަޑައިގެންފައެވެ. މީގެއިތުރުން، ބޯހިޔާވަހިކަމާއި، ތެރަޕީފަދަ ކަންކަމުގައި ވެސް ގިނަ ދަތިތަކެއް ދިމާވާކަން އޭނާ ފާހަގަކުރިއެވެ.

ފައިރޫޒާއަކީ ސްޕެޝަލް އޮލިމްޕިކްސްގެ ސެކޭޓްރީ ޖެނެރަލް އަދި ނޭޝަނަލް ޑައިރެކްޓަރއެވެ. އޭނާވަނީ ފާއިތުވެދިޔަ 7 އަހަރު އެ މަޤާމް އަދާކުރައްވާފައެވެ. އޭނާ ވަނީ ދެމެހެއްޓެނެވި ގޮތެއްގައި އެފަދަ ޕްރޮގްރާމެއް ކުރިއަށްގެންދިއުމުގެ މުހިންމުކަމަށް އަލިއަޅުވާލާފައެވެ.

"ޚާއްސަކޮށް އިންޓަރލެކްޗުއަލް ޑިސްއެބިލިޓީސްއަށް. އިންޓަރލެކްޗުއަލް ޑިސްއެބިލިޓީސްއަކީ އޭޑީއެޗްޑީ، އޯޓިޒަމް، ޑައުންސިންޑްރޯމްފަދަ ކަންކަން. މިހާރަށް ވުރެ އިންކްލޫސިވް ސޮސައިޓީ އެއް އުފައްދަން އެބަ އެހީތެރިވެދޭ މިކަމުން." ފައިރޫޒާ ވިދާޅުވިއެވެ.

2022ގެ ބޯހިމެނުމަށް ބަލާއިރު 24401 މީހުންނަކީ ޚާއްސަ އެހީއަށް ބޭނުންވާ މީހުންނެވެ. އޭގެ ތެރެއިން 3.2% މީހުންނަކީ އިންޓަރލެކްޗުއަލް ޑިސްއެބިލިޓީ ހުރި މީހުންނެވެ. އެހެންކަމަށްވާއިރު އެފަދަ ފަރާތްތަކަށް ފުރުސަތުތައް އެންމެ އެކަށީގެންވާ ގޮތުގައި ނުލިބޭކަމަށް ފައިރޫޒާ ފާހަގަކުރިއެވެ. ސްޕެޝަލް އޮލިމްޕިކްސް އާއި އެހެނިހެން ކުޅިވަރުތަކާއި ތަފާތުކުރުންތަކެއް ގެންގުޅޭކަމަށް އޭނާ ފާހަގަކުރިއެވެ. ރައީސްވަނީ އެފަދަ ހުރިހާ ދަތިތަކަކަށް ހައްލު ހޯދައިދެއްވަން މަސައްކަތްކުރައްވާނެކަމުގެ ޔަޤީންކަން ދެއްވާފައެވެ.

އިޖުތިމާޢީ ހަމަހަމަކަން ޤާއިމުކުރުމަށް ރާއްޖޭގެ އެކި ކަންކޮޅުތަކުގައި ދިރިއުޅޭ ޚާއްސަ އެހީއަށް ބޭނުންވާ ފަރާތްތަކާއި ނުކުޅުދުންތެރިކަން ހުންނަ ފަރާތްތަކަށް، ފުރުސަތުތަކާއި، ކަރާމާތާއި، ރައްކާތެރިކަން ފޯރުކޮށްދީ ފަހި މުޖުތަމަޢުއެއް ޤާއިމުކުރުމަށް ސަރުކާރުން ޚާއްސަ އިސްކަމެއްދެއްވައެވެ.