ޔޫއެފާ ނޭޝަންސް ލީގުގައި ރޭ ޗެކް ރިޕަބްލިކް އާއި ދެކޮޅަށް ސްޕެއިން ކުޅުނު މެޗު 3-1 ގެ ނަތީޖާއަކުން ސްޕެއިން ކާމިޔާބުކޮށްފިއެވެ.
ނޭޝަންސް ލީގުގެ ގްރޫޕް 3 ގައި ކުޅުނު މި މެޗުން ސްޕެއިން މޮޅުވުމާއިއެކު އެ ޓީމު ވަނީ ގްރޫޕްގައި މިހާތަނަށް ކުޅުނު 3 މެޗުންވެސް މޮޅުވެ 9 ޕޮއިންޓާއެކު ގްރޫޕްގެ އެއްވަނަ މަގާމް ހޯދާފައެވެ. ޗެކް ރިޕަބްލިކްއިން މިހާތަނަށް ކުޅުނު 3 މެޗުވެސް ބަލިވެ އަދި މިހާތަނަށް ޕޮއިންޓެއް ލިބިފައެއް ނުވެއެވެ.
ސްޕެއިންގެ އޮވިއޭޑޯގައި 28 ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގައި ސްޕެއިންއިންވަނީ މެޗު ޑޮމިނޭޓްކޮށްގެން ކުޅެ ގިނަ ހަމަލަތަކެއް ޗެކް ރިޕަބްލިކްގެ ގޯލަށް އަމާޒުކޮށްފައެވެ. އެގޮތުން މުޅި މެޗުގައި ޖުމްލަ 18 ފުރުސަތު ތަނަވަސްކޮށްފައިވާއިރު އޭގެ ތެރެއިން 10 ހަމަލާ ވަނީ ގޯލަށް އަމާޒުކޮށްފައެވެ.
ސްޕެއިން އިން މި މެޗުގައި ކުރި ހޯދާފައިވަނީ މެޗުގެ 6 ވަނަ މިނިޓުގައި ޑެނީ އޮލްމޯ ދިން ޕާހަކުން ލަމީން ޔަމާލް ކާމިޔާބުކޮށްދިން ލަނޑުންނެވެ.
އަދި މެޗުގެ 35 ވަނަ މިނިޓުގައި ރޮޑްރީ ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފައެވެ.
ޗެކް ރިޕަބްލިކް އިން މި މެޗުގައި ސްޕެއިންގެ ކޮޅަށް ލަނޑު ޖަހާފައިވަނީ މެޗުގެ 69 ވަނަ މިނިޓުގައި ޖިރީ ސްލާމާއެވެ.
މި މެޗުގެ 85 ވަނަ މިނިޓުގައި ރެފްރީ ވަނީ ދެވަނަ ރީނދޫ ކާޑަކާއިއެކު ޗެކް ރިޕަބްލިކްގެ ލަޑިސްލާވް ކްރެޗީއަށް ރަތް ކާޑު ދައްކާ ދަނޑުން ފޮނުވާލާފައެވެ.
އަދި އެއް ކުޅުންތެރިއަކު މަދުކޮށް ޗެކް ރިޕަބްލިކްއިން ކުޅުމުގެ ފައިދާ ނަގާ މެޗުގެ ފުރިހަމަ ވަގުތު ހަމަވާން މިނިޓަކަށް ވެފައިވަނިކޮށް ސްޕެއިންގެ މިކޭލް މެރީނޯ ވަނީ އިތުރު ލަނޑެއް ޖަހާ މެޗުގެ ނަތީޖާ 3-1 އަށް ބަދަލުކޮށްފައެވެ.
މި މެޗުން ސްޕެއިން މޮޅުވިއިރު އެ ޓީމުން ވަނީ ފީފާ ވޯލްޑްކަޕްގައި ކޭޕް ވާޑޭ އާއި އެއްވަރުވި މެޗަށްފަހު މިހާތަނަށް 10 މެޗުން މޮޅުވެފައެވެ.