އަފީފްގެ ފުރިހަމަ ތާއީދު، 10 ރިސޯޓުގެ ފައިދާ ރައްޔިތުންނަށް

ކޮންމެ ދިވެއްސަކަށް ފައިދާ ބަހާގޮތަށް ސަރުކާރުން 10 ރިސޯޓު ހެދުމަކީ، އަނެއްކާވެސް ރާއްޖޭގެ ޓޫރިޒަމަށް އަންނާނެ ބޮޑު ބަދަލެއްގެ ގޮތުގައި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީގެ ޗެއަރމަން އަދި ފަތުރުވެރިކަމުގެ ދާއިރާގެ އިސްބޭފުޅެއް ކަމަށްވާ ހުސައިން އަފީފު ސިފަކުރައްވައި، އެ މަޝްރޫއަށް ފުރިހަމައަށް ތާއީދު ކުރައްވައިފިއެވެ.

ޤައުމީ ފަތުރުވެރިކަމުގެ ދުވަސް ފާހަގަކުރުމަށް ބޭއްވި ޚާއްސަ ރަސްމިއްޔާތުގައި ވާހަކަ ދައްކަވަމުން އަފީފު ވިދާޅުވީ، ސަރުކާރުން އިއުލާންކޮށްފައިވާ ގޮތަށް 10 ރިސޯޓު ހަދައި، އޭގެ ފައިދާ ދިވެހިންނަށް ބެހުމަކީ އެ ދާއިރާއިން ބޮޑު ބަދަލެއް ފެންނާނެ ކަމެއް ކަމަށެވެ. އަދި ސަރުކާރުގެ މި މަޝްރޫއުގައި ބައިވެރިވާން ބޭނުންފުޅުވާ ކަމަށާއި، މިކަން ކާމިޔާބުވާނެ ކަމަށް ވަރަށް ބޮޑަށް އުއްމީދު ކުރައްވާ ކަމަށްވެސް އޭނާ ވިދާޅުވިއެވެ.

"މިކަމުގައި ބައިވެރިވާންވެސް ބޭނުން. އަދި މި މަޝްރޫއު ކާމިޔާބުވާނެ ކަމަށް ވަރަށް ބޮޑަށް އުއްމީދު ކުރަން." ހުސައިން އަފީފު ވިދާޅުވިއެވެ.

ސަރުކާރުގެ ކުންފުންޏަކުން ކުރިއަށް އޮތް ތިން އަހަރުގެ ތެރޭގައި 10 ރަށެއް ރިސޯޓެއްގެ ގޮތުގައި ތަރައްޤީކޮށް، އެއިން ލިބޭ ފައިދާއިން ކޮންމެ ދިވެއްސަކަށް އަހަރަކު 400 ޑޮލަރު ދޭން ފަށާނެކަން ސަރުކާރުން އިއުލާންކުރީ މި އަހަރުގެ ކުރީކޮޅުއެވެ.

މީގެ 54 އަހަރު ކުރީގެ ހަނދާންތައް އައު ކުރައްވަމުން އަފީފު ވިދާޅުވީ، 1970ގެ އަހަރުތަކުގައި ރާއްޖެއަށް ޓޫރިޒަމް ތައާރަފުކުރުމަށް އޭރުގެ ޒުވާނުން ނުކުމެ ކުރި ބުރަ މަސައްކަތުގައި އެންމެ ފުރަތަމަ ކުރިމަތިވި ގޮންޖެހުމަކީ ރާއްޖެ އޮތް ތަނެއް ބޭރުގެ ފަރާތްތަކަށް ނޭނގުން ކަމަށެވެ. އޭރު ޔޫރަޕުގެ ޤައުމުތަކާއި ޖަރުމަނުގެ އައިޓީބީ ފަދަ ފެއާތަކަށް ގޮސް، ވޯލްޑް މެޕުގައި އަމިއްލައަށް ރާއްޖެ ޕިންޕޮއިންޓްކޮށްދީގެން މެނުވީ ޓުއާ އޮޕަރޭޓަރުންނަށް ރާއްޖެއަކީ ސީރިއަސް މަންޒިލެއްގެ ގޮތުގައި ޤަބޫލުކުރަންވެސް ދަތިވިކަމަށް އަފީފު ވިދާޅުވިއެވެ.

"ޔޫރަޕުގެ ޤައުމުތަކަށް ދިޔައީމަ، ރާއްޖެ އެއީ އޮންނަ ތަނެއްކަންވެސް އެމީހުންނަށް ނޭނގޭ. އަހަރެން ބުނަނީ ސްރީލަންކާއާއި އިންޑިއާ ކައިރީގައޭ ރާއްޖެ އޮންނާނީ، ބުނީމާވެސް އެ މީހުންނަށް ރާއްޖެއެއް ނޭނގޭ. ރާއްޖެއަކީ އޮތް ޤައުމެއްކަން ކިޔައިދިނުން އެއީ އެންމެ ފުރަތަމަ ކުރިމަތިވި ގޮންޖެހުން." ހުސައިން އަފީފު ވިދާޅުވިއެވެ.

ނަމަވެސް، އޭރު ބޭންކުތަކެއް ނެތުމުން ޓުއާ އޮޕަރޭޓަރުންގެ އެހީތެރިކަމާއެކު ރިސޯޓުތައް ތަރައްޤީކޮށް، ހުއްޓާނުލައި ކުރި ހިތްވަރާއެކު ދާއިރާއަށް ބޮޑެތި ކުރިއެރުންތަކެއް ލިބުނުކަން ފާހަގަކުރެއްވިއެވެ. އަދި 1996ގައި ދުނިޔޭގެ މަޝްހޫރު ހޮޓެލް ޗެއިން "ހިލްޓަން" ރާއްޖެއަށް އައިސް، 80ގެ އަހަރުތަކުގައި އައު އެއާލައިންތައް ދަތުރުކުރަން ފެށުމާއި، ރިސޯޓުތަކުން އިސްނަގައިގެން ޓޫރިސްޓުން އުފުލަން ޚާއްސަ ފެރީތައް ހަމަޖެއްސުމުން ދަތުރުފަތުރު ފަސޭހަވެގެން ދިޔުމަކީ ރާއްޖޭގެ ޓޫރިޒަމް މުޅިން ބަދަލުކޮށްލި ކަންކަން ކަމުގައި އަފީފު ސިފަކުރެއްވިއެވެ.

މިއަދު ރާއްޖޭގެ ބައެއް ރިސޯޓުތަކުން ކޮޓަރިއަކަށް ދުވާލަކަށް 15,000 ޑޮލަރަށްވުރެ މަތީ އަގުތައް ނަގާއިރު، 1972ގައި "ކުރުނބާ މޯލްޑިވްސް"ގެ ނަމުގައި ރާއްޖޭގެ ފުރަތަމަ ރިސޯޓުގެ ޚިދުމަތް ފެށިއިރު، ތިންއިރުގެ ކެއުމާއެކު ކޮންމެ ޓޫރިސްޓެއްގެ ބޮލަކަށް ދުވާލަކަށް ޗާޖުކުރީ، އެންމެ 9 ޑޮލަރެވެ. އަދި ވެލާނާ އިންޓަނޭޝަނަލް އެއާޕޯޓުން ރިސޯޓަށް ދިއުމަށް ޗާޖުކުރީ، އެންމެ ޑޮލަރެކެވެ.

1972ގައި އެންމެ 1,097 ޓޫރިސްޓުންނާއި 280 އެނދާއެކު ފެށި މި ސިނާއަތުގައި، މިދިޔަ އަހަރު 2.2 މިލިއަން ޓޫރިސްޓުން ރާއްޖެއަށް ޒިޔާރަތް ކޮށްފައިވާކަން އަފީފު ފާހަގަކުރެއްވިއެވެ. އަދި މިއަދު ރާއްޖޭގެ އެކި ސަރަހައްދުތަކުގައި ޓޫރިސްޓުންނަށް ޚިދުމަތްދޭ ފެސިލިޓީތަކުގައި 67,000 އަށްވުރެ ގިނަ އެނދު އެބަހުއްޓެވެ. އޭރު ރާއްޖޭގެ އުފެއްދުންތެރިކަން 1.3 ބިލިއަން ޑޮލަރުގައި ހުރިއިރު، މިއަދު އެ އަދަދު ވަނީ 18 ބިލިއަން ޑޮލަރަށް އަރާފައެވެ.