އިތިއޯޕިއާގެ އުތުރުގައިވާ ޓިގްރޭ ސަރަޙައްދުގައި، މަރުކަޒީ ސަރުކާރުގެ ސިފައިންނާއި ޓިގްރޭގެ ބާރުތަކުން އިސްކޮށް އޮވެ އުފައްދާފައިވާ އިއްތިޙާދަކާ ދެމެދު އަލުން ވަރުގަދަ ހަނގުރާމައެއް ފެށިއްޖެއެވެ. ބޭރުފުށުން ބަލާއިރު މިއީ 2020 އިން ފެށިގެން 2022 އަށް ހިނގި އަދި އެތައް ލައްކަ ބަޔަކު މަރުވި ދާޚިލީ ހަނގުރާމައިގެ އައު ފެށުމެއް ކަމަށް ފެނުނު ނަމަވެސް، މެދުއިރުމައްޗާއި އެފްރިކާ ބައްރުގެ އެހެން ޤައުމުތަކުގެ މައްސަލަތަކާ ގުޅިފައިވުމުން، މި ފަހަރު މި ސަރަޙައްދުގެ ނުތަނަވަސްކަމާއި ނުރައްކާތެރިކަން ބޮޑުވެފައިވާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
ކުރީގެ ހަނގުރާމައާ ޚިލާފަށް، މި ފަހަރު އެރިޓްރިއާއިން މަސައްކަތްކުރަނީ އިތިއޯޕިއާއާ ދެކޮޅަށެވެ. އިތިއޯޕިއާއިން ބުނީ، އެރިޓްރިއާއިން އިތިއޯޕިއާއާ ދެކޮޅަށް ހަނގުރާމަ ކުރަމުންދާ ފައުޖުތަކަށް އެހީތެރިވާ ކަމުގައެވެ. ނަމަވެސް، އެރިޓްރިއާއިން އެ ކަން ދޮގުކުރެއެވެ. މީގެ އަސްލަކީ ކަނޑު ބާރުވެރިކަން ހޯދުމަށް އިތިއޯޕިއާއިން ކުރާ މަސައްކަތާއި ޒަމާންވީ ޢަދާވާތްތެރި ކަން ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. މީގެ އިތުރުން، އިތިއޯޕިއާގެ އަސްކަރިއްޔާއިން ބުނީ އެރިޓްރިއާއަށް ސޫދާނާއި އިޖިޕްޓުން ވެސް އެހީތެރިވާ ކަމުގައެވެ. މި ދެ ޤައުމާއި އިތިއޯޕިއާއާ ދެމެދު ވަނީ ފެން ފޯރުކޮށްދިނުމަށް ބިނާކުރަމުންދާ ބޮޑު ޑޭމެއްގެ މައްސަލައިގައި ނުތަނަވަސްކަން އުފެދިފައެވެ.
މި މައްސަލަތައް ވަނީ ސޫދާނުގައި ތިން އަހަރުވީ ދާޚިލީ ހަނގުރާމައާ ވެސް ގުޅިފައެވެ. އެކުވެރި ދައުލަތްތަކުގެ (އދ) ތަޖުރިބާކާރުން ބުނީ، އިތިއޯޕިއާއަށް އެހީވާ ޔުނައިޓެޑް އެރެބް އެމިރޭޓްސްއިން (ޔޫއޭއީ) ސޫދާނުގެ ރެޕިޑް ސަޕޯޓް ފޯސަސްއަށް (އާރްއެސްއެފް) ވެސް އެހީވާ ކަމުގައެވެ. އަދި، އިތިއޯޕިއާއިން ވެސް އާރްއެސްއެފްއަށް އެހީވާކަމަށް ތުހުމަތުކުރެވެއެވެ. ނަމަވެސް، ސޫދާނުގެ އަސްކަރިއްޔާއަށް އެހީވަނީ އިޖިޕްޓާއި، އެރިޓްރިއާ އަދި ސައުދީ އަރަބިއްޔާއިން ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. ބައެއް ޑިޕްލޮމެޓުން ބުނީ، ޓިގްރޭގެ ބައެއް ހަނގުރާމަވެރިން ސޫދާނުގެ ސިފައިންނާ ގުޅިގެން ހަނގުރާމަކުރާ ކަމުގައެވެ.
މި ސަރަޙައްދުގައި ޔޫއޭއީއާއި ސައުދީ އަރަބިއްޔާގެ ވާދަވެރިކަން ވެސް ވަނީ ބޮޑުވެފައެވެ. ޔޫއޭއީން ސޯމާލީލޭންޑާއެކު އެއްބަސްވުންތައް ހަދައި، އިތިއޯޕިއާއަށް ރަތް ކަނޑުގެ މަގު ހޯދައިދޭން މަސައްކަތްކުރަމުންދާ ކަމަށް ދާރިސުން ބުންޏެވެ. ޔަހޫދީ ދައުލަތަކީ ވެސް އިތިއޯޕިއާގެ އެކުވެރިއެއްގެ ގޮތުގައި އޮވެ، ސޯމާލީލޭންޑް ބަލައިގަތް ހަމައެކަނި ޤައުމެވެ. ސައުދީން ދެކޭގޮތުގައި މިއީ އެ ޤައުމުގެ ސަލާމަތަށް އޮތް ނުރައްކަލެކެވެ. އެހެންކަމުން، ސައުދީން ގުޅުން ބަދަހިކުރަނީ އިތިއޯޕިއާގެ ދުޝްމަނުން ކަމަށްވާ ސޫދާނުގެ އަސްކަރިއްޔާއާއި އިޖިޕްޓާއި އެރިޓްރިއާއާއެކު ކަމުގައި ވެސް މަސްރަޙު ދިރާސާކުރާ ފަރާތްތަކުން ބުންޏެވެ.