މިއަހަރުގެ ތްރީ ޖެނެރޭޝަން ވޯކް ހަނިމާދޫގައި

ޕެންޝަން އޮފީހުން ސިލްސިލާކޮށް ބާއްވަމުންދާ "ތްރީ ޖެނެރޭޝަން ވޯކް" (3ޖެންވޯކް)ގެ ހަތަރުވަނަ އެޑިޝަން މިމަހު 17 ގައި ހދ. ހަނިމާދޫގައި ބާއްވާ ގޮތަށް ހަމަޖެހިއްޖެއެވެ.

ޕެންޝަން އޮފީހުން ވިދާޅުވީ، މިއީ ކުޑަކުދިންނާއި ބޮޑެތި މީހުން އަދި ދޮށީއުމުރުގެ މީހުން ހިމެނޭހެން، މުޅި އާއިލާއަށް ޚާއްޞަ ކޮށްގެން ބާއްވާ ހިނގާލުމެއް ކަމަށެވެ. މި ހަރަކާތަކީ ދުޅަހެޔޮކަމާއި މާލީ ރައްކާތެރިކަން އިތުރުކުރުމާއެކު، ފަހަށް ފައިސާ ރައްކާކުރުމާއި، އިންވެސްޓްކުރުން އަދި ރިޓަޔަރމަންޓަށް ތައްޔާރުވުމުގެ މުހިންމުކަމާމެދު އާއިލާގެ ހުރިހާ މެންބަރުންގެ މެދުގައި ހޭލުންތެރިކަން އުފައްދައި، ރަނގަޅު މާލީ އާދަތަކަށް ބާރުއެޅުމުގެ ގޮތުން އެ އޮފީހުން އަހަރަކު އެއްފަހަރު ކުރިއަށްގެންދާ ސިލްސިލާ ހަރަކާތެކެވެ.

"3ޖެން ވޯކް"ގެ އެންމެ ޚާއްޞަ އަދި މުހިންމު އެއް ބަޔަކީ، އެއްއާއިލާގެ ތިން ޖީލުގެ މެންބަރުން އެކުއެކީގައި ކުރިއަށްގެންދާ 1 ކިލޯމީޓަރުގެ ރަމްޒީ ހިނގާލުމެވެ. މި ހިނގާލުމަކީ ހަމައެކަނި ހަށިހެޔޮކަމަށްޓަކައި ކުރިއަށްގެންދާ ކަމެއް ނޫން ކަމަށާއި، މިއީ މާލީގޮތުން ރައްކާތެރި، ތަނަވަސް މުސްތަޤުބަލެއް ބިނާކުރުމަކީ ދިރިއުޅުމުގެ ވަކި މަރުޙަލާއަކަށް އެކަނި ޚާއްޞަވެފައިވާ ކަމެއް ނޫންކަމާއި، އަދި އެއީ ޅައުމުރުން ފެށިގެން ދޮށީއުމުރާ ހަމައަށް މުޅި އުމުރު ދުވަހަށް ދެމިގެންދާ ދަތުރެއްކަން ރަމްޒުކޮށްދޭ މުހިންމު ހަރަކާތެއް ކަމަށްވެސް އެއޮފީހުން ވިދާޅުވެއެވެ. އަދި ހަމައެހެންމެ، މުސްތަޤުބަލުގެ މާލީ ރައްކާތެރިކަން ކަށަވަރު ކުރުމަކީ އާއިލާގެ ކޮންމެ ޖީލެއްގެވެސް ޒިންމާއެއްކަން މި ހިނގާލުމުގެ ތެރެއިން ހަނދާންކޮށްދޭނެއެވެ.

މި ހިނގާލުމަށްފަހު، ހުރިހާ އުމުރުފުރައެއްގެ ބައިވެރިންނަށްވެސް ބައިވެރިވެވޭނެ ފަދަ އުފާވެރި އަދި ފޯރިގަދަ ޢާއިލީ ހަވީރެއް ކުރިއަށްދާނެއެވެ. މި ހަވީރުގެ ތެރޭގައި ކުޑަކުދިންނާއި ބޮޑެތި މީހުން ޝައުޤުވެރިވާނެ ފަދަ ތަފާތު ކުޅިވަރުތަކާއި، ދިވެހިންގެ ސަޤާފަތާއި އާދަކާދަ ދައްކުވައިދޭ ޚާއްޞަ ހަރަކާތްތައް ހިމެނޭނެއެވެ.

މީގެ އިތުރުން އާންމުންނަށް މުހިންމު މަޢުލޫމާތުތައް ފޯރުކޮށްދިނުމަށް ޤާއިމުކޮށްފައިވާ ސްޓޯލްތަކާއި، ތަފާތު އެކި ރަހަތައް ހިމެނޭ ފުޑް ކޯޓުގެ އިތުރުން މުޅި އާއިލާއަށް އެކުގައި ހިތްހަމަޖެހުމާއި އުފާވެރިކަން ގެނެސްދޭނެ އެތައް ހަރަކާތްތަކެއް މި ހަވީރުގައި ހިމެނިގެންދާނެ ކަމަށްވެސް ޕެންޝަން އޮފީހުން މައުލޫމާތުދެއްވައެެވެ.

"3ޖެން ވޯކް"ގެ މައިގަނޑު މަޤުޞަދަކީ އާއިލާގެ ތެރޭގައި އެކި ޖީލުތަކުގެ މެދުގައި އޮންނަ ގުޅުންތައް އިތުރަށް ބަދަހިކޮށް، އުފާވެރި މާޙައުލެއްގައި އާއިލާތަކަށް އެކުގައި އަގުހުރި ވަގުތުތަކެއް ހޭދަކުރުމުގެ ފުރުޞަތު ތަނަވަސްކޮށްދިނުމެވެ. އަދި ހަމައެއާއެކު، ދިރިއުޅުމުގެ ކުރިމަގަށް ވިސްނައި، ރިޓަޔަރމަންޓަށް ފުރިހަމައަށް ތައްޔާރުވުމާއި، ފަހަށް ރައްކާކުރުމުގެ މުހިންމު އާދަ އަށަގެންނެވުމަށްޓަކައި ޕެންޝަން އޮފީހުން މެދުކެނޑުމެއްނެތި ކުރިއަށްގެންދާ މަސައްކަތްތަކުގެ ތެރެއިން ހިމެނޭ ހަރަކާތެއް ކަމަށްވެސް ޕެންޝަން އޮފީހުން ވިދާޅުވެއެެވެ.