ފުލުހުންގެ ތަރުޖަމާނަކަށް އިންސްޕެކްޓަރ އޮފް ޕޮލިސް އަޙްމަދު ޝިޔާމް

ދިވެހި ފުލުހުންގެ ޚިދުމަތުގެ ރަސްމީ ތަރުޖަމާނުގެ މަގާމަށް އިންސްޕެކްޓަރ އޮފް ޕޮލިސް އަޙްމަދު ޝިޔާމް ހަމަޖައްސަވައިފައެވެ.

ފުލުހުން ވިދާޅުވީ، އިންސްޕެކްޓަރ އޮފް ޕޮލިސް އަޙްމަދު ޝިޔާމް މި މަގާމާ ހަވާލުވެވަޑައިގަތީ، މީގެ ކުރިން ތަރުޖަމާނުގެ މަސްއޫލިއްޔަތު އަދާކުރެއްވި ސުޕްރިންޓެންޑެންޓް އޮފް ޕޮލިސް އާރިފްގެ ބަދަލުގައި ކަމަށެވެ. އަދި ޝިޔާމް މިމަގާމަށް ހަމަޖައްސާފައިވަނީ މިއަދުން ފެށިގެންނެވެ.

މީގެ އިތުރުން، މި ބަދަލާ ގުޅިގެން، ދިވެހި ފުލުހުންގެ ޚިދުމަތުގެ ފަރާތުން މީޑިއާތަކަށް މައުލޫމާތު ދެއްވުމާއި، އާންމު ހޭލުންތެރިކަން އިތުރުކުރުމުގެ މުއާމަލާތްތަކުގައި އެންމެ އިސްކޮށް ދެން ހަރަކާތްތެރިވެވަޑައިގަންނަވާނީ އިންސްޕެކްޓަރ އޮފް ޕޮލިސް އަޙްމަދު ޝިޔާމު ކަމަށް ފުލުހުން ވިދާޅުވިއެވެ.

އިންސްޕެކްޓަރ އޮފް ޕޮލިސް އަޙްމަދު ޝިޔާމް ވަނީ މީގެ ކުރިންވެސް ފުލުހުންގެ މީޑިއާ ހިންގުމުގައި އިސްކޮށް ހަރަކާތްތެރިވެފައެވެ.

މީގެ އަހަރުތަކެއް ކުރިން ފުލުހުންގެ ވަޒީފާއިން ވަކިކޮށްފައިވަނިކޮށް، ކޯޓުން މައްސަލަ ނިންމުމާއި ގުޅިގެން އިންސްޕެކްޓަރ އޮފް ޕޮލިސް އަޙްމަދު ޝިޔާމަށް ވަނީ ވަޒީފާ އިޔާދަކޮށްދެއްވާފައެވެ.