އެމް.ޑަބްލިއު.އެސް.ސީ އިން ރ. ދުވާފަރުގައި ޤާއިމްކުރުމަށް ހަމަޖެހިފައިވާ ބޮޓްލިންގ ޕްލާންޓް، ނުވަތަ ފުޅީގައި ފެން ބަންދުކުރާ ކާރުޚާނާ ޤާއިމްކުރުމަށް ބޭނުންވާ ބިން އެ ކުންފުންޏާ ހަވާލުކޮށްފިއެވެ.
ބިން ހަވާލުކުރުމުގެ އެއްބަސްވުމުގައި އެމް.ޑަބްލިއު.އެސް.ސީގެ ފަރާތުން ސޮއިކުރައްވާފައިވަނީ އެކުންފުނީގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދެވެ. އަދި ރ. ދުވާފަރު ކައުންސިލްގެ ފަރާތުން ސޮއިކުރެއްވީ ކައުންސިލުގެ ނާއިބު ރައީސް އާމިނަތު ރިޒްނާއެވެ.
މިކަމަށްޓަކައި މިއަދު އެމް.ޑަބްލިއު.އެސް.ސީގައި ބޭއްވި ރަސްމިއްޔާތުގައި، އެކުންފުނީގެ މެނޭޖިން ޑިރެކްޓަރ ފަޒުލް ރަޝީދު ވަނީ މި މަޝްރޫޢުގެ އަމަލީ މަސައްކަތް އަންނަ އަހަރުގެ ކުރީކޮޅު ފެށުމަށް އަމާޒުކޮށްފައިވާކަމަށް ވިދާޅުވެފައެވެ. 15 މިލިއަން ރުފިޔާ ޚަރަދުވާނެކަމަށް ބެލެވޭ މި މަޝްރޫޢަކީ އެމް.ޑަބްލިއު.އެސް.ސީއިން، މާލެ ފިޔަވައި އެހެން ރަށެއްގައި ހިންގާ މިފަދަ ފުރަތަމަ މަޝްރޫޢެވެ.
މި ޕްލާންޓަކީ ގަޑިއަކު 6000 ފުޅި ބަންދުކުރުމުގެ ޤާބިލުކަން ލިބިފައިވާ ޕްލާންޓެއް ކަމަށް އެމް.ޑަބްލިއު.އެސް.ސީން ވިދާޅުވެއެވެ. އަދި މި ޕްލާންޓާއެކު އެކުންފުނީގެ ލޮޖިސްޓިކް ޚަރަދުތައް ކުޑަވެ، ރާއްޖޭގެ އެކި ޞަރަހައްދުތަކަށް ފެން ފޯރުކޮށްދިނުމަށް ފަސޭހަތަކަކެއް ލިބިގެންދާނެކަމަށްވެސް އެމް.ޑަބްލިއު.އެސް.ސީއިން ވިދާޅުވެއެވެ.
މިފަދަ މަޝްރޫޢުތަކާއެކު ވަޒީފާގެ ގިނަ ފުރުޞަތުތަކެއް ހުޅުވިގެންދާނެކަމަށް އެމް.ޑަބްލިއު.އެސް.ސީގެ މެނޭޖިން ޑިރެކްޓަރ ފަޒުލް ރަޝީދު ވަނީ ވިދާޅުވެފައެވެ.
މީގެ އިތުރުން ހދ.ކުޅުދުއްފުށީގައިވެސް ފުޅީގައި ފެން ބަންދުކުރާ ކާރުޚާނާއެއް ޤާއިމް ކުރުމުގެ މަސައްކަތް އެމް.ޑަބްލިއު.އެސް.ސީއިން ދަނީ ކުރަމުންނެވެ. އަދި ކ. މާފުށީގައިވެސް މިފަދަ ކާރުޚާނާއެއް ޤާއިމުކުރުމުގެ ވިސްނުން އެބަހުރިކަމަށާއި، އެކަމަށް ބޭނުންވާ ފީސިބިލިޓީ ސްޓަޑީޒް ހަދަމުންދާކަމަށް އެމް.ޑަބްލިއު.އެސް.ސީގެ މެނޭޖިން ޑިރެކްޓަރ ފަޒުލް ވަނީ ވިދާޅުވެފައެވެ.
މި ރަސްމިއްޔާތުގައި ވާހަކަދައްކަވަމުން ދުވާފަރު ކައުންސިލްގެ ނާއިބު ރައީސް އާމިނަތު ރިޒްނާ ވިދާޅުވީ، ދުވާފަރުގައި ޤާއިމުކުރާ ފުޅީގައި ފެން ބަންދުކުރާ ކާރުޚާނާގެ ސަބަބުން، ދުވާފަރުގެ އިތުރުން، މުޅި އެ ޞަރަޙައްދަވެސް ފަސޭހަތަކެއް ލިބިގެންދާނެކަމަށެވެ. އަދި އެރަށުގެ ތަރައްޤީގައި އެމް.ޑަބްލިއު.އެސް.ސީގެ ދައުރު ބޮޑުކަން ފާހަގަކުރައްވާ، އެކަމަށް އޭނާ ވަނީ ޝުކުރު އަދާކުރައްވާފައެވެ.
އެމް.ޑަބްލިއު.އެސް.ސީއިން މިހާރުވެސް ދަނި ރ. ދުވާފަރުގައި ފެނާއި ނަރުދަމާގެ ޚިދުމަތް ދެމުންނެވެ. އަދި އެރަށުގައި ރައްކާތެރިގޮތުގައި ކުނި މެނޭޖްކުރުމުގެ މަސައްކަތްވެސް އެކުންފުނިން ދަނީ ކުރަމުންނެވެ.