މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން، އެމް.އާރް.ޑީ.ސީން އަތޮޅުތަކުގައި މިހާރު ކުރިއަށްގެންދާ ހުރިހާ މަޝްރޫޢުތަކެއް މިއަހަރުގެ ފުރަތަމަ 6 މަސް ދުވަހުގެ ތެރޭގައި ނިންމުމަކީ އަމާޒެއްކަމަށް އެކުންފުނީގެ މެނޭޖިންގ ޑިރެކްޓަރ އިބްރާހީމް ޢަބްދުއްރައްޒާޤް ޙަލީމް ވިދާޅުވެއްޖެއެވެ.
އެކުންފުނިން މިހާރުވެސް އަންނަނީ ރާއްޖޭގެ އެކި ކަންކޮޅުތަކުގައި ޢުމްރާނީ ތަރައްޤީއާއި ގުޅުންހުރި 20 މަޝްރޫޢެއް ހިންގަމުންނެވެ. އަދި ފުޓްސަލް ދަނޑު އެޅުމުގެ 67 މަޝްރޫޢެއް ހިންގަމުން.
ރާއްޖޭގެ އެކި ސަރަޙައްދުތަކުގައި ސަރުކާރުން ހިންގަވާ ޢުމްރާނީ ތަރައްޤީއާ ގުޅުންހުރި މަޝްރޫޢުތަކުގައި، މޯލްޑިވްސް ރޯޑް ޑިވެލޮޕްމަންޓް ކޯރޕަރޭޝަން، އެމް.އާރް.ޑީ.ސީއަކީ މުހިއްމު ދައުރެއް އަދާކުރާ ކުންފުންޏެކެވެ. ސަރުކާރުން އެކުންފުންޏާއި ޙަވާލުކުރައްވާ ޢުމްރާނީ ތަރައްޤީއާ ގުޅުންހުރި މަޝްރޫޢުތަކުގެ އިތުރުން، ރާއްޖޭގެ ޢިމާރާތްކުރުމުގެ ދާއިރާއަށް ބޭނުންވާ ގިނަ ޚިދުމަތްތަކެއްވެސް އެކުންފުނިން އަންނަނީ ދެމުންނެވެ. އެގޮތުން އެކުންފުނިން މިހާރުވެސް އަންނަނީ ރާއްޖޭގެ އެކި ކަންކޮޅުތަކުގައި ޢުމްރާނީ ތަރައްޤީއާ ގުޅުންހުރި 20 މަޝްރޫޢެއް ހިންގަމުންނެވެ. މީގެ ތެރޭގައި، ޕާކުތައް ތަރައްޤީކުރުމާއި 14 ރަށެއްގެ މަގު ހެދުމުގެ މަޝްރޫޢުވެސް ހިމެނެއެވެ.
މި މަޝްރޫޢުތަކުގެ ޖުމްލަ އަގު އެއް ބިލިއަން ރުފިޔާއަށް ވުރެ މައްޗަށް އަރާކަމަށް އެކުންފުނިން ހާމަކުރެއެވެ. ހަމައެހެންމެ ޒުވާނުންނަށް އަމާޒުކޮށްގެން، ސަރުކާރުން ހިންގަވާ ސްޕޯޓްސް އެރީނާތައް ތަރައްޤީކުރެއްވުމުގެ ބިޔަ މަޝްރޫޢުގެ ތެރެއިން 67 ރަށެއްގައި ފުޓްސެލް ދަނޑު އެޅުމުގެ މަސައްކަތްވެސް އެމް.އާރު.ޑީ.ސީން އަންނަނީ ކުރަމުންނެވެ.
img:http://s1.psmnews.mv/images/660x400/14748801677729.jpg|ރަށެއްގެ މަގުހެދުމަށް ބޭނުންވާ ސާމަނު އެރަށަށް ބާލަނީ- ފޮޓޯ: އެމްއާރު ޑީސީ
ޕީ.އެސް.އެމް ނިއުސްއަށް ދެއްވި ޚާއްސަ އިންޓަރވިއުއެއްގައި އެމް.އާރު.ޑީ.ސީގެ މެނޭޖިންގ ޑިރެކްޓަރ އިބްރާހީމް ޢަބްދުއްރައްޒާޤް ޙަލީމް ވިދާޅުވީ، އެކުންފުނީގެ ހިންގުން ހަރުދަނާކުރެއްވުމުގެ ގޮތުން ފާއިތުވި ކުރު މުއްދަތަކުގެ ތެރޭގައި ކާމިޔާބު މަސައްކަތްތަކެއް ކުރެވިފައިވާކަމަށެވެ. އެގޮތުން އެކުންފުނީގެ ޕްރޮޑަކްޝަން ކެޕޭސިޓީ އިތުރުކުރުމާއި އައު ވެހިކަލްތައް ހޯދުމަށް ހިންގި 8.5 މިލިއަން ޑޮލަރުގެ މަޝްރޫޢު އޭނާ ފާހަގަކުރެއްވިއެވެ. އޭނާ ވިދާޅުވީ، އެކުންފުނިން މިހާރު ރާއްޖޭގެ އެކި ސަރަޙައްދުތަކުގައި ހިންގާ މަޝްރޫޢުތަކުގެ ބޮޑުބައެއް ނިމިފައިވާކަމަށާއި އެކުންފުނީގެ އަމާޒަކީ އަތޮޅުތަކުގައި މިހާރު ކުރިއަށްގެންދާ ހުރިހާ މަޝްރޫޢެއް މިއަހަރުގެ ފުރަތަމަ 6 މަސް ދުވަހުގެ ތެރޭގައި ނިންމެވުންކަމަށެވެ.
"އަޅުގަނޑުމެން މިހާރު ކުރިއަށްގެންދާ މަޝްރޫޢުތަކުގެ ތެރޭގައި ކުޑަހުވަދޫ، ވިލުފުށި، ތިނަދޫ، ވިލިގިނލި، ކުޅުދުއްފުށި، ދިއްދޫ މި ރަށްރަށުގެ މަގު ހެދުމުގެ މަސައްކަތް އަޅުގަނޑުމެން ވަރަށް އަވަހަށް ނިންމާނަން. ހަމައެގޮތަށް އދ. މަހިބަދޫ، ރ. މީދޫ، ރ. އުނގޫފާރު، ބ. އޭދަފުށި މި 4 ރަށުގެ މަސައްކަތްވެސް މިއަހަރުގެ ފުރަތަމަ 6 މަސް ދުވަހުގެ ތެރޭގައި ނިންމާލާނަން. އަދި 67 ފުޓްސެލް ދަނޑު އެޅުމުގެ މަސައްކަތްވެސް ހަމަ މި މުއްދަތުގެ ތެރޭގައި މި ކުންފުނިން ނިންމާނަން" އިބްރާހީމް ޢަބްދުއްރައްޒާޤް ވިދާޅުވިއެވެ.
އެމް.އާރު.ޑީ.ސީގެ އޮފީސްތައް މާލޭގެ އިތުރުން ރާއްޖޭގެ 4 ސަރަޙައްދެއްގައި ވަނީ ޤާއިމުކޮށްފައެވެ. އެއީ ހދ. ކުޅުދުއްފުށި، ގދ. ތިނަދޫ، ފުވައްމުލައް ސިޓީ އަދި އައްޑޫ ސިޓީގައެވެ. އެހެންނަމަވެސް އެކުންފުނީގެ ޕްރޮޑަކްޝަން ޔުނިޓްތަކަށް ބޭނުންވާ މަސައްކަތް ކުރަމުންދަނީ މާލޭގެ އިތުރުން، ތިލަފުށީގައެވެ. މި އަހަރުގެ ތެރޭގައި އެކުންފުނިން އަތޮޅުތަކުގައި ހަރަކާތްތެރިވާ މިންވަރު އިތުރުކުރުމަށްޓަކާ ޚާއްސަ މަސައްކަތްތަކެއް ކުރުމަށް ހަމަޖެހިފައިވާކަމަށް އެމް.އާރު.ޑީ.ސީން ބުނެއެވެ.