ސިފައިންގެ ޢާއިލާތަކަށް ޚާއްޞަކުރައްވައިގެން ހުޅުމާލޭގައި ޢިމާރާތްކުރައްވަމުން ގެންދަވާ ސިފްކޯ ހިޔާ ފްލެޓް ޢިމާރާތްތަކުގެ ތެރެއިން އެއް ޢިމާރާތުގެ މަސައްކަތް މިއަހަރުގެ ނިޔަލަށް ނިންމާލެވޭނެ ކަމަށް މި މަސައްކަތުގެ ކޮންޓްރެކްޓަރ ބުނެފިއެވެ. ސިފްކޯ ހިޔާގެ މަސައްކަތް ކުރިއަށް ގެންދަވަނީ އައިލެންޑް އެކްސްޕާރޓް ޕްރައިވެޓް ލިމިޓެޑާ ޙަވާލުކުރައްވައިގެންނެވެ.
ދިވެހި ސިފައިނާއި، ސިފައިންގެ ޢާއިލާތަކަށް ޚާއްޞަކުރައްވައިގެން ހުޅުމާލޭގައި ޢިމާރާތްކުރައްވާ ސިފްކޯ ހިޔާ ފްލެޓްތަކަކީ އެންމެ ޒަމާނީ ފެންވަރަށް ތަރައްޤީކުރައްވާ އެޕާޓްމެންޓް ބިލްޑިންގތަކެކެވެ. ސިފްކޯ ހިޔާގެ ތިން ޢިމާރާތް ބިނާކުރެއްވުމުގެ މަސައްކަތް ކުރައްވަމުން ގެންދަނީ ސިފައިންގެ ކޯޕަރޭޓިވް ސޮސައިޓީގެ ބެލުމުގެ ދަށުން އައިލެންޑް އެކްޕާރޓް ޕްރައިވެޓް ލިމިޓެޑާ ޙަވާލުކުރައްވައިގެންނެވެ.
ސިފްކޯ ހިޔާ ފްލެޓުތަކުގެ ފައުންޑޭޝަން މަސައްކަތް ފަށްޓަވާފައިވަނީ 2013 ވަނަ އަހަރުގެ ތެރޭގައެވެ. ނަމަވެސް މި މަސައްކަތް ކުރިން ޙަވާލުކުރެއްވި ފަރާތުން އެއްބަސްވުމާ އެއްގޮތަށް މަސައްކަތް ކުރިއަށް ނުގެންގޮސް ދިގު މުއްދަތަކަށް ހުއްޓިފައިވަނިކޮށް، އަލުން މި މަސައްކަތް ފަށްޓަވާފައިވަނީ ރައީސުލްޖުމްހޫރިއްޔާ ޢަބްދު ﷲ ޔާމީން އަބްދުލްޤައްޔޫމްގެ ލަފާފުޅުގެ މަތިން ޑިފެންސް މިނިސްޓަރުގެ ބެއްލެވުމުގެ ދަށުންނެވެ. ޢިމާރާތްކުރުމުގެ މަސައްކަތް ހުއްޓިފައި އޮތުމަށްފަހު އަލުން މި މަސައްކަތް ފަށްޓަވާފައިވަނީ 2016 ވަނަ އަހަރުގެ ފެބްރުއަރީމަހުގެ ތެރޭގައެވެ. ސިފައިންގެ ވެލްފެއަރ ކަންކަމަށް ސަރުކާރުން ދެއްވާ ޚާއްޞަ އިސްކަމުގެ ދަށުން ޑިފެންސް މިނިސްޓަރ ގެންދަވަނީ މި މަސައްކަތް ވަރަށް ގާތުން ބައްލަވަމުންނެވެ.
މަސައްކަތް ކުރިއަށްގެންދާ ކުންފުނި އައިލެންޑް އެކްސްޕާރޓް މޯލްޑިވްސްގެ އެޑްމިނިސްޓްރޭޓިވް މެނޭޖަރ ޔޫސުފް ސިރާޖް ޕަބްލިކް ސަރވިސް މީޑިއާއަށް މަޢުލޫމާތު ދެއްވަމުން ވިދާޅުވީ، ސިފްކޯ ހިޔާ ފްލެޓްތަކުގެ މަސައްކަތް ތާވަލާ އެއްގޮތަށް ކުރިއަށްދާ ކަމަށެވެ. އަދި 3 ޢިމާރާތް ހިމެނޭ މި ފްލެޓްތަކުގެ ތެރެއިން 1 ޢިމާރާތުގެ މަސައްކަތް މިއަހަރުގެ ނިޔަލަށް ނިންމާލެވޭނެ ކަމަށް އޭނާ ވިދާޅުވިއެވެ.
ސިފްކޯ ހިޔާގެ މަސައްކަތް އަންނަ އަހަރުގެ މެއިމަހުގެ 4 ވަނަ ދުވަހުގެ ކުރިން ނިންމެވުމަށް ވަނީ ހަމަޖެހިފައެވެ. މިހާރު 3 ޢިމާރާތުގެ 4 ވަނަ ފަންގިފިލާއާ ހަމައަށް ކޮންކްރީޓްގެ މަސައްކަތް ނިންމިފައިވާ ކަމަށް ކޮންޓްރެކްޓަރ މައުލޫމާތުދިނެވެ. ސިފްކޯ ހިޔާ ޢިމާރާތުން ފްލެޓްތައް ލިބޭ ފަރާތްތައް ކުރިން ވަނީ ކަނޑައަޅުއްވާފައެވެ. މި ޢިމާރާތްތަކުގެ އެންމެ ތިރީ 4 ފަންގިފިލާ ޚާއްޞަ ކުރައްވާފައިވަނީ އެއްގަމު އުޅަނދު ޕާރކް ކުރުމާއި، ވިޔަފާރީގެ ބޭނުންތަކަށެވެ. އަނެއް 11 ފަންގިފިލާއަކީ މީހުން ދިރިއުޅޭ ސަރަޙައްދު ކަމަށް އެމް.އެން.ޑީ.އެފުން ވިދާޅުވިއެވެ. ސިފްކޯ ހިޔާ ފްލެޓްތަކަކީ 3 ކޮޓަރީގެ އެޕާޓެމެންޓްތަކެކެވެ. މިއިން ކޮންމެ އެޕާޓްމެންޓެއްގައި 900 އަކަފޫޓު ހުންނާނެކަމަށް އެމް.އެން.ޑީ.އެފުން މައުލޫމާތު ދެއްވައެވެ. ސިފްކޯ ހިޔާ ޢިމާރާތް ކުރައްވަމުން ގެންދަވަނީ ޗައިނާ ފްލެޓްތަކުގެ ހުޅަނގުން 52500 އަކަފޫޓްގެ ބިމެއްގައެވެ.