ޗައިނާގެ ޖައްވީ ދިރާސާއަށް އިންވެސްޓްކުރާނެކަމަށް ސަޢޫދީ ޢަރަބިއާއިން ބުނެފިއެވެ. މިކަން ސަޢޫދީ އަރަބިއްޔާއިން މިހާމަކުރީ ސަޢޫދީ ޢަރަބިއާގެ ރަސްގެފާނު ސަލްމާން ބިން ޢަބްދުލްޢަޒީޒް އާލް ސަޢޫދު ޗައިނާއާށް ކުރައްވާ ދަތުރުފުޅުގެ ތެރޭގައެވެ.
ރަސްގެފާނު އޭޝިއާގެ ޤައުމުތަކުގެ ތެރެއިން ޗައިނާއަށް ކުރައްވާ ދަތުރުފުޅާއެކު އެޤައުމުގެ އިޤްތިޞާދަށް ބޮޑެތި އިންވެސްޓްމެންޓްތަކެއް ކުރަން ސަޢޫދީގެ ކެބިނެޓުން ވަނީ ނިންމަވާފައެވެ. ސަޢޫދީ ރަސްގެފާނުގެ ދަތުރުފުޅުގައި ދެޤައުމުގެ ކަމާބެހޭ ވަޒީރުން މި އެއްބަސްވުންތަކުގައި ސޮއިކުރައްވާނެއެވެ. މީގެތެރޭގައި ޗައިނާއިން ކުރިއަށްގެންދާ ޖައްވީ ދިރާސާއަކަށް ސަޢޫދީ ޢަރަބިއާއިން ގިނަޢަދަދެއްގެ ފައިސާ އިންވެސްޓްކުރާނެއެވެ. ޗައިނާގެ މި ދިރާސާއަކީ ބައިނަލްއަޤުވާމީ ފެންވަރުގައި ވަރަށް ފުޅާދާއިރާއެއްގައި ކުރިއަށްގެންދާ ޖައްވީ ދިރާސާއެކެވެ.
ސަޢޫދީ ރަސްގެފާނުގެ އޭޝިއާގެ 6 ޤައުމަކަށް ކުރައްވަމުން ގެންދަވާ ދަތުރުފުޅުގައި މިހާތަނަށް 3 ޤައުމަކަށް ވަޑައިގެންފައިވެއެވެ. އެއީ މެލޭޝިއާ، އިންޑޮނޭޝިއާ އަދި ބުރޫނާއީއެވެ. މި ތިންޤައުމުގައިވެސް ސަޢޫދީން ވަނީ ބިޔަ އިންވެސްޓްމެންޓްތަކެއް ކުރުމަށް ނިންމާފައެވެ. އެގޮތުން މިހާތަނަށް ސޮއިކުރެވުނު އެއްބަސްވުންތަކުގެ ޖުމްލަ އަގު 20 ބިލިއަން އެމެރިކާ ޑޮލަރަށްވުރެ މައްޗަށް އަރާނެކަމަށް ބައިނަލްއަޤްވާމީ މީޑިއާތަކުން ރިޕޯޓް ކޮށްފައިވެއެވެ.
ސަޢޫދީ ޢަރަބިއާގެ ރަސްގެފާނަކު މިހާ ދިގުދަތުރެއް ކުރެއްވުމަކީ ވަރަށް މަދުން ނޫނީ ނުކުރައްވާކަމެކެވެ. ރަސްގެފާނު ސަލްމާން އޭޝިއާގެ ބައެއް ޤައުމުތަކަށް ކުރައްވާ މިދަތުރުފުޅުގެ މައިގަނޑު މަޤްޞަދަކީ ސަޢޫދީގެ އިޤްތިޞާދު ތެލަށް ބަރޯސާވެފައި އޮންނަ މިންވަރު ކުޑަކޮށް، ބޭރުގެ ދައުލަތްތަކުގައި ސަޢޫދީގެ އިންވެސްޓްމެންޓްތައް އިތުރުކުރުންކަމަށް ދުނިޔޭގެ މީޑިއާ ރިޕޯޓްތައް ބުނެއެވެ. އެމަނިކުފާނުގެ އޭޝިއާ ދަތުރުފުޅު ނިންމަވާލައްވާނީ ދިވެހިރާއްޖެއަށް ވަޑައިގަތުމަށްފަހުގައެވެ. ރަސްގެފާނު ދިވެހިރާއްޖެއަށް ވަޑައިގަތުމުގެ ކުރިންވެސް ރާއްޖެއާއި ސަޢޫދީ ޢަރަބިއާއާ ދެމެދުގައި ވިޔަފާރީގެ މަޝްވަރާތަކެއް ކުރިއަށްދާކަމަށް ދިވެހި ސަރުކާރުން ވަނީ ހާމަކުރައްވާފައެވެ. އަދި ދިވެހިރާއްޖޭގައި މިހާތަނަށް ހިންގަވާ އެންމެ ބޮޑު އިޤްތިޞާދީ މަޝްރޫޢުވެސް ކުރިއަށް ގެންދާނީ ސަޢޫދީ ޢަރަބިއާއިންކަމަށް ސަރުކާރުން ވަނީ ހާމަކުރައްވާފައެވެ.
ރަސްގެފާނު ދިވެހިރާއްޖެއަށް ކުރައްވާ ދަތުރުފުޅުގެ ރަސްމީބައި ފުރިހަމަކުރެއްވުމަށްފަހު ރާއްޖޭގައި ޗުއްޓީ ހޭދަކުރެއްވުމަށް ވަނީ ހަމަޖެހިފައެވެ.