ކުރިއަށް އޮތް ލޯކަލް ކައުންސިލް އިންތިޚާބުގައި ވޯޓްލުމުގެ ޙައްޤު ލިބިގެންވާ މީހުންގެ ލިސްޓް ޢާންމުކުރައްވައި ޝަކުވާ ހުށައެޅުމުގެ ފުރުޞަތު ހުޅުއްވާލައްވައިފިއެވެ.
ވޯޓްލުމުގެ ޙައްޤު ލިބިގެންވާ މީހުންގެ ލިސްޓް ބަދަލުތަކަކާއެކު އަނެއްކާވެސް ޢާންމުކުރައްވާފައި މިވަނީ އިންތިޚާބު ބާއްވާ ތާރީޚް މެއި މަހުގެ 6 ވަނަ ދުވަހަށް ފަސްކުރެއްވުމުން އެ މުއްދަތުގައި 18 އަހަރުފުރޭ މީހުންގެ ނަންތައް އެ ލިސްޓްގައި ހިމެނުމާ ގުޅިގެންނެވެ.
އިލެކްޝަންސް ކޮމިޝަނުން ވިދާޅުވީ އައު ލިސްޓަށް ޝަކުވާ ހުށައެޅުމުގެ ފުރުސަތު މިއަދުން ފެށިގެން މި މަހުގެ 25 ވަނަ ދުވަހުގެ ނިޔަލަށް ހުޅުއްވާލައްވާފައިވާ ކަމަށެވެ. އަދި އެ މުއްދަތުގެ ތެރޭގައި ހުށައަޅާ ޝަކުވާތައް އެ ކޮމިޝަނުންނާއި ރަށްރަށުގެ ކައުންސިލް އިދާރާތަކާއި ސީޓީ ކައުންސިލްތަކުން ބަލައިގަންނަމުން ގެންދަވާނެ ކަމަށެވެ.
އޭޕްރިލް 15 ގައި ބޭއްވުމަށް ހަމަޖައްސަވާފައި އޮތް ލޯކަލް ކައުންސިލް އިންތިޚާބު މެއިމަހުގެ 6 ވަނަ ދުވަހަށް ފަސްކުރައްވާފައި ވަނީ ރާއްޖޭގައި މިހާރު ފެތުރެމުންދާ ރޯގާއާއި ގުޅިގެންނެވެ.
އިންތިޚާބުގެ ތާރީޚް ބަދަލުވުމާ ގުޅިގެން ރައްވެހިވެފައިވާ ރަށްނޫން އެހެންތަނެއްގައި ވޯޓް ލުމަށް ބޭނުންވާ ފަރާތްތަކަށް ރީރަޖިސްޓްރީ ކުރުމުގެ ފުރުޞަތުވެސް އަލުން ހުޅުއްވާލައްވާނެ ކަމަށް އިލެކްޝަންސް ކޮމިޝަނުން ވިދާޅުވެއެވެ. މި ފަހަރުގެ އިންތިޚާބުގައި ޖުމްލަ 1،487 ކެނޑިޑޭޓުން ވާދަކުރާނެއެވެ.