ސިފައިންގެ އެންމެ މަތީވެރިޔާގެ ވާދައިގެ ތައްޓަށް ބާއްވާ ހެވިކަމުގެ 12 ވަނަ މުބާރާތް ނިންމުމުގެ ރަސްމިއްޔާތު ބާއްވަވައިފިއެވެ.
މިކަމަށްޓަކައި މިރޭ ކަޅުތުއްކަލާ ކޮށީގައި ބޭއްވެވި ރަސްމިއްޔާތު ޝަރަފްވެރިކޮށްދެއްވީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމެވެ. މިރަސްމިއްޔާތުގައި ހެވިކަމުގެ މުބާރާތުގައި ބައިވެރިވި އެކި ދާއިރާތަކުން ވަނަވަނައަށްއައި ގެމަތަކަށް ތައްޓާއި ހަނދާނީ ލިޔުން ދެއްވާފައިވެއެވެ.
މި މުބާރާތުން އެއްވަނަ ހޯދާފައިވަނީ މެރިންކޯ ގެމައެވެ. އެއްވަނަ ގެމައަށް ތައްޓާއި ލިޔުން ޙަވާލުކޮށްދެއްވީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމެވެ. މެރިންކޯގެ ގެމަވަނީ މުޅި މުބާރާތުގައި ބަލާފާސްކުރުމުގެ ބައިންނާއި، ހެވިކަމުގެ ބައިންނާއި، ސިންކްރޮނައިޒްޑް ޑްރިލްއިން އެއްވަނަ ހޯދާފައެވެ. މުބާރާތުގައި ބައިވެރި އޭރިޔާތަކުން ހެވިކަމަށް އެންމެ މޮޅު އޭރިޔާއަކީ ސަދަން އޭރިޔާއެވެ. މުޅި މުބާރާތުގައި ހެވިކަމުގެ ބައިން އެންމެ މޮޅު އަންހެން ސިފައިންގެ މީހަކަށް ހޮވިފައިވަނީ ފްރައިވެޓް ފާޠިމަތު ނަޒްރާއެވެ. މުޅި މުބާރާތުގައި ހުރިހާގޮތަކުން ހެވިކަމަށް އެންމެ މޮޅު ސިފައިންގެ މީހަކަށް ހޮވުނީ ކޯފްރަލް ޙަސަން ޝިފާޢުއެވެ. އަދި މުޅި މުބާރާތުގެ އެންމެ ބޮޑު މެހެތަރަކަށް ހޮވުނީ ކޯޕްރަލް ޢަބްދުﷲ އަމީންއެވެ.
ސިފައިންގެ އެންމެ މަތީ ވެރިޔާގެ ވާދައިގެތައްޓަށް ބާއްވާ ހެވިކަމުގެ މުބާރާތް މިއަހަރު ބާއްވާފައި މިވަނީ 8 އަހަރުގެ މެދުކެނޑުމަކަށް ފަހުގައެވެ. މިރަސްމިއްޔާތުގައި ސިފައިން، ހެވިކަމުގެ އެކި ޙަރަކާތްތައް ދައްކާލާފައިވެއެވެ.