ޑިޕްރެޝަން ނުވަތަ ނަފްސާނީ ބަލިތަކުން ރައްކާތެރިވުމަށްޓަކައި އަޅާ އެންމެ ފުރަތަމަ ފިޔަވަޅެއްގެ ގޮތުން، ތިމާ އަށް ދިމާވާ މައްސަލަތަކާ ބެހޭގޮތުން އިތުބާރުކުރެވޭ މީހަކާ ޚިޔާލު ބަދަލުކޮށް ވާހަކަދެއްކުމަކީ މުހިއްމުކަމެއް ކަމަށް ރައީސުލްޖުމްހޫރިއްޔާގެ ނައިބު ޢަބްދުﷲ ޖިހާދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ދުނިޔޭގެ ސިއްހަތު ދުވަސް ފާހަގަކުރުމަށް ރާއްޖޭގައި ހުންނަ ޑަބްލިއު.އެޗް.އޯގެ އޮފީހުން ބޭއްވި ހާއްސަ ހަފްލާގައި ބަހައްޓާފައި ހުރި މިއުރަލްގައި އެމަނިކުފާނު ލިޔުއްވި މެސެޖުގައެވެ. ރޭ ދަރުބާރު ގޭގައި ބޭއްވި މި ހަފްލާ ޚާއްސަ ކޮށްފައިވަނީ މިއަހަރުގެ ސިއްޚަތު ދުވަހުގެ ޝިޢާރުކަމުގައިވާ، "ޑިޕްރެޝަން؛ ލެޓްސް ޓޯކް" ނުވަތަ "ޑިޕްރެޝަން: ވާހަކަދައްކަމާ" މިޝިޢާރުގެ މުހިންމުކަމާއި ގުޅޭގޮތުންނެވެ.
މިޙަފްލާފައި ވާހަކަފުޅުދައްކަވަމުން ހެލްތް މިނިސްޓަރ ޢަބްދު ﷲ ނާޡިމް އިބްރާހީމް ވިދާޅުވީ، ޑިޕްރެޝަނަކީ ވަރަށް ނުރައްކާތެރި ނަފްސާނީ ބައްޔެއްކަމަށާއި، މިއަހަރުގެ ސިއްޙަތު ދުވަހުގެ ޝިއާރުގައިވާ ގޮތަށް އަމަލުކޮށް ޑިޕްރެޝަނަށް ސަމާލުވާން ޖެހިފައިވާކަމަށެވެ. އަދި ޑިޕްރެޝަންގެ ސަބަބުން ގެއްލުންވާ މީހުން އިތުރުވަމުންދާއިރު، އެކަމަށް ހޭލުންތެރިކަން އިތުރުކުރުމަށް ގިނަ ހަރަކާތްތަކެއް ހިންގަންޖެހިފައިވާކަން މިނިސްޓަރ ފާހަގަކުރެއްވިއެވެ.
img:http://s1.psmnews.mv/images/660x400/14915416462371.jpg|ރޭގެ ރަސްމިއްޔާތުގައި ރައީސުލްޖުމްހޫރިއްޔާގެ ނައިބު އަބްދުﷲ ޖިހާދު / ފޮޓޯ: ޕީއެސްއެމް
މިޙަފްލާގައި ވާހަކަފުޅު ދައްކަވަމުން ދުނިޔޭގެ ސިއްޙަތު ޖަމްޢިއްޔާއިން ދިވެހިރާއްޖެއަށް ކަނޑައަޅުއްވާފައިވާ ޚާއްޞަ މަންދޫބު ޑޮކްޓަރ އަރްވިންދް މާތުރު ވިދާޅުވީ ނަފްސާނީ ބައްޔަކީ އެކަމުން އެއްކޮށް ޝިފާ ލިބޭ ބައްޔެއްކަމުގެ ޔަގީންކަން އެބައޮތްކަމަށެވެ. އަދި ޑިޕްރެޝަންގެ ބަލީގެ މީހުންނާއި ވާހަކަދައްކައިގެން އެމީހުންނަށް އެހީތެރިކަން ދިނުމުގައި ދެމިތިބުމަށް މާތުރު ގޮވާލެއްވިއެވެ.
މިޙަފްލާގައި ޑިޕްރެޝަނުން މީހުން ސަލާމަތްކުރުމަށް ވާހަކަދައްކާނެ ގޮތްތަކާއި، އެހެން މީހުންގެ އަމަލުތައް ބަހައްޓަންވީގޮތުގެ އިތުރުން، ޚިދު އެކަމުގެ ޝިކާރައިގައި ޖެހިފައިވާ މީހަކަށް ކުރެވިދާނެ ކަންކަމާއި، އެފަދަ ކަންކަމަށް ހައްލު ލިބިދޭގޮތް ދައްކުވައިދޭ ތަފާތު ހަރަކާތްތަކެއް ބައެއް ސްކޫލް ދަރިވަރުންގެ ފަރާތުންވަނީ ހުށައަޅައިދީފައެވެ. އަދި ތަފާތު މެސެޖްތަކާއި، މުހިއްމު ލިޔުންތައްވަނީ ބައިވެރިންނާއި ހިއްސާކޮށްފައެވެ.
ދުނިޔޭގެ ސިއްޚަތު ޖަމިއްޔާ ޑަބްލިއު.އެޗް.އޯގެ ތަފާސް ހިސާބުތައް ދައްކާގޮތުން، ޑިޕްރެޝަން ތަހައްމަލްކުރާ 322 މިލިއަނަށްވުރެ ގިނަ މީހުން މިހާރުވެސް ދުނިޔޭގައި ދިރިއުޅެއެވެ. އަދި ޑިޕްރެޝަންގެ ސަބަބުން ދުނިޔޭގެ އިގްތިސާދަށް އަހަރަކު މަދުވެގެން އެއް ޓްރިލިއަން ޑޮލަރުގެ ގެއްލުންވެއެވެ.