މޯލްޑިވިއަން އައިޑަލް ސީޒަން ދޭއްގެ އެއް ޖަޖު ކަމުގައިވާ އިސްމާޢިލް އައްފާން، ދެން މި ޝޯވއިން ފެނިދާނެކަމާމެދު ގިނަ ބަޔަކު ސުވާލު އުފައްދާފައިވާއިރު، މިރޭގެ އެލިމިނޭޝަން ނައިޓުގައިވެސް ބެއްލުންތެރިން "ސަޕްރައިޒް" ވާފަދަ ކަންތައްތަކެއް ވަނީ ފެނިގެންގޮސްފައެވެ.
މިރޭގެ ޝޯވގައި ޖަޖުންގެ ޕެނަލުން އައްފާން ނުފެނުނަސް، ސީޒަން އެކެއްގެ އެންމެންގެ "ފޭވަރިޓް" ޖަޖުގެގޮތުގައި ބެލުންތެރިންގެ މަޤުބޫލުކަން ހޯދި އަޙްމަދު އިބްރާހީމް (އައްމަޑޭ) ވަނީ ހަމަ ރަނގަޅަށްވެސް އައިޑަލްގެ ސްޓޭޖް ފަޅާލާފައެވެ. ޖަޖުންގެ ޕެނަލުން އައްމަޑޭ މިރޭ ފެނުމަކީ އޭނާގެ ފޭނުންނަށާއި، އައިޑަލްގެ ޝޯވތަކަށް ލޯބިކުރާ ފަރާތްތަކަށް ލިބިގެންދިޔަ ވަރަށްވެސް ބޮޑު ހިތްހަމަޖެހުމަކަށް ވެގެންދާނެއެވެ.
މިރޭގެ ޝޯވގައި އައްމަޑޭ ބުނެފައިވަނީ މިފަހަރުގެ ސީޒަނުން އޭނާ ނުފެނުނަސް، އައިޑަލްއާއި ދުވަހަކުވެސް ވަކިނުވާކަމަށެވެ. އަދި އައިޑަލްގެ މި ޕްލެޓްފޯމަކީ އޭނާއަށް އަބަދުވެސް ޚާއްސަވާނެ ތަނެއްކަމަށް އައްމަޑޭ ބުނެފައިވެއެވެ. އައްމަޑޭވަނީ އޭނާގެ މިއުޒިކީ ތަޖުރިބާއާއެކު ގަދަ 6 ގައި ވާދަކުރި ބައިވެރިންނަށް ކޮމެންޓްކޮށް، ބައިވެރިން އިތުރަށް ރަނގަޅުކުރަންޖެހޭ ކަންކަންވެސް މިރޭގެ ޝޯވގައި ފާހަގަކޮށްފައެވެ. އަދި މޯލްޑިވިއަން އައިޑަލްއަކީ ރާއްޖޭގެ މިއުޒިކް އިންޑަސްޓްރީއަށް އިންޤިލާބީ ބަދަލެއް ގެނުވާ، މި ދާއިރާއިން ޒުވާނުންނަށް ކުރިއަށްދާން ލިބުނު އިތުރު ހިތްވަރެއްގެގޮތުގައި ފާހަގަކޮށް، އައްމަޑޭ ވަނީ ޕީ.އެސް.އެމްގެ މެނޭޖްމަންޓަށް ޝުކުރު އަދާކޮށްފައެވެ.
img:http://s2.psmnews.mv/images/660x400/14922838598388.jpg|
އައްމަޑޭއަކީ މިހާރު ކުރިއަރަމުން އަންނަ ވަރަށްވެސް ހުނަރުވެރި ޒުވާން އާރޓިސްޓެކެވެ. ޓީވީއެމުން ގެނެސްދިން އެހަނދާނުގާގެ ޝޯވތަކުން އާއްމުންނަށް އައްމަޑޭ ތަޢާރަފުވެގެންދިޔަ ނަމަވެސް، އޭނާއަކީ މިއުޒިކީ ދާއިރާއަށް އާ މޫނެއް ނޫނެވެ. އަދި އާ އަޑެއްވެސް ނޫންނެވެ. އޭނާ މިދާއިރާގައި މަސައްކަތް ކުރާތާ މިހާރު މިވަނީ 14 އަހަރަށް ވުރެ ގިނަ އަހަރު ވެފައެވެ.
އައްމަޑޭ ބޮޑަށް ޝަޢުގުވެރިވަނީ ރިޒޯޓް މިއުޒިކަށްކަމުން، އޭނާއަށް ބޮޑަށް އިސްކަމެއް ދެވެނީވެސް އެދާއިރާއިން ކަމަށް އޭނާ ބުނެއެވެ. މަޑު މައިތިރި ލަވަތަކާއި، ރޮކް އަދި ހިޕްހޮޕް ލަވަތައްވެސް ކުޅަދާނަކަމާއެކު ހުށަހަޅައިދޭ އައްމަޑޭ، ވަނީ އެހަނދާނުގާގެ އިތުރުންވެސް، ތަރިންގެ ރޭ އަދި ވާހަނދަނާކުންގެ ޝޯވތަކުގައިވެސް ހިތްގައިމު ލަވަތަކެއް ހުށަހަޅައިދީ، ގިނަ ބައެއްގެ ލޯތްބާއި، ތަރުޙީބު ހޯދާފައެވެ. މީގެ އިތުރުން ބޮޑުބެރު ލަވަތަކުންވެސް އައްމަޑޭގެ ހުނަރުވެރިކަން އާއްމުންނަށް ވަނީ ފެނިގެންގޮސްފައެވެ.
ފްރެންޗައިޒް އުސޫލުން ރާއްޖޭގައި ބާއްވާ އެންމެ އަގުބޮޑު އަދި އެންމެ ކާމިޔާބު ޝޯވ "މޯލްޑިވިއަން އައިޑަލް"ގެ ފުރަތަމަ ސީޒަންގެ ޖަޖުންގެ ޕެނަލްގައި އައްމަޑޭގެ ނަން ހިމެނިގެން ދިޔުމަކީ އޭނާގެ ޒުވާން ކެރިއަރުގައިވެސް ހާސިލުކުރެވުނު އެންމެ ބޮޑު އެއް ކާމިޔާބީގެ ގޮތުގައި އައްމަޑޭ ސިފަކުރެއެވެ.
ކޮންމެއަކަސް ޖަޖުންގެ ޕެނަލުގައި އައްފާން ނެތް ތަންކޮޅު އައްމަޑޭ މިވަނީ އޭނާގެ ހެއްވާ މަޖާ މިޒާޖާއެކު ވަރަށްވެސް ފުރިހަމައަށް ފޫބައްދައިދީފައެވެ. އެކަން ޝޯވ ދެއްކި ވަގުތު ސޯޝަލް މީޑިއާގެ އެކި ޕްލެޓްފޯމްތަކުގައި އާއްމުންކޮށްފައިވާ ކޮމެންޓްތަކަށް ބަލާލުމުން ހާމަވެގެންދެއެވެ.