އަލިފާނުގެ ޙާދިސާތަކާ ގުޅިގެން ޢަމަލުކުރާނެގެ ގޮތުގެ އުސޫލު "ފަޔަރ ކޯޑް"ގެ މަސައްކަތް ނިންމައި އެއަށް ބޭނުންވާ ޤާނޫނީ ލަފާ ހޯދުމަށް އެޓާނީ ޖެނެރަލްގެ އޮފީހަށް ފޮނުވާފައިވާކަމަށް ޑިފެންސް މިނިސްޓަރ އާދަމް ޝަރީފް ޢުމަރު ވިދާޅުވެއްޖެއެވެ.
ޕީއެސްއެމްއަށް ދެއްވި އިންޓަވިއުއެއްގައި ޑިފެންސް މިނިސްޓަރ އާދަމް ޝަރީފް ޢުމަރު ވިދާޅުވީ އަލިފާން ނިއްވާ އާލާތްތައް ގޭބީސީތަކާއި އެހެނިހެން ތަންތަނުގައި ހަމަޖެހިފައި ހުންނަންޖެހޭނެ ގޮތްތައް އެ ފަޔަރ ކޯޑްގައި ވާރަށް ތަފުސީލްކޮށް ބަޔާންކޮށްފައިވާނެ ކަމަށެވެ. އެގޮތުން ގަރާޖް، ގުދަން ފަދަ ތަންތަނުގައި އަލިފާން ނިއްވުމުގެ އިންތިޒާމް ހަމަޖެހިފައި ހުންނަން ޖެހޭނެ ގޮތްތަކަށް މި ކޯޑްގައި ޚާއްސަ އިސްކަމެއް ދެއްވިކަމަށާ އެޖީގެ ލަފާ ލިބުނުހާ އަވަހަކަށް ކަމާގުޅޭ އިދާރާތަކާއެކު މިކޯޑް ތަންފީޒް ކުރުމުގެ މަސައްކަތް ކުރައްވާނެކަމަށްވެސް މިނިސްޓަރ ވިދާޅުވިއެވެ.
އަލިފާނުގެ ޙާދިސާތަކުން ލިބޭ ގެއްލުން ކުޑަކުރުމުގެ ގޮތުން، އަލިފާން ނިއްވުމުގެ ނިޒާމު ހަރުދަނާކުރައްވައި، ސަލާމަތީ ބާރުތަކުގެ ކިބައިގައި ހުރި އަލިފާން ނިއްވުމުގެ ޤާބިލްކަން އިތުރު ކުރުމަށް ސަރުކާރުން ގެންދަވަނީ ވަރުގަދަ ގިނަ މަސައްކަތްތަކެއް ކުރައްވަމުންނެވެ. ޑިފެންސް މިނިސްޓަރ ވިދާޅުވީ އަލިފާނުގެ ގިނަ ޙާދިސާތަކަށް ބަލާއިރު އެ ޙާދިސާތައް ހިނގާފައިވަނީ އަލިފާން ނިއްވާނެ ރަނގަޅު ނިޒާމެއް އެ ތަނެއްގައި ނެތުމުގެ ސަބަބުންނާއި، ނޭނގި ނަމަވެސް އަޅުގަނޑުމެންނަށް ހެދޭ ބައެއް ގޯސްތަކުން ކަމަށެވެ.
img:http://s2.psmnews.mv/images/660x400/14803216941652.jpg|ކަފިދޫގޭގައި ހުރި ގުދަނެއްގައި އަލިފާން ރޯވި ހާދިސާގެ ތެރެއިން - ފައިލް ފޮޓޯ: ޕީއެސްއެމް
އެހެންކަމުން އެކަންކަން ރަނގަޅު ކުރެއްވުމަށާ އަލިފާން ނިއްވުމުގެ ކަންކަން ހަރުދަނާ ކުރެއްވުމަށް ގިނަ މަސައްކަތްތަކެއް ކުރައްވަމުން ގެންދަވާ ކަމަށް މިނިސްޓަރ ވިދާޅުވިއެވެ.
މޭލޭގައި ގާއިމްކުރާ އަލިފާން ނިއްވުމުގެ ނިޒާމް ނިމުމުން ހުޅުމާލޭގެ އަލިފާން ނިއްވުމުގެ ނިޒާމް ފަރުމާ ކުރުމުގެ މަސައްކަތް ފަށްޓަވާނެ ކަމަށް ދިފާއީ ވަޒީރު ވިދާޅުވިއެވެ. ނަމަވެސް ހުޅުމާލޭގައި ޤާއިމްކުރާ އަލިފާން ނިއްވުމުގެ ނިޒާމަކީ މާލޭގެ ނިޒާމަށްވުރެ މަސައްކަތުގެ ގޮތުން ފަސޭހަ ނިޒާމަކަށް ވާނެކަމަށާ، ހުޅުމާލޭގައި ހަދަމުންގެންދާ ގިނަ އިމާރާތްތަކަކީ އަލިފާން ނިއްވުމުގެ ނިޒާމަށް ވިސްނައިގެން ހަދަމުން ގެންދާ ޢިމާރާތްތަކެއްކަމަށް މިނިސްޓަރ ވިދާޅުވިއެވެ.
އެމް.އެން.ޑީ.އެފްގެ ފަޔަރ އެންޑް ރެސްކިއުގެ ކެޕޭސިޓީ އިތުރަށް ވަރުގަދަ ކުރައްވައި އެކަމަށް ބޭނުންވާ ޒަމާނީ އާލަތްތައް ހޯއްދެވުމުގެ މަސައްކަތް ސަރުކާރުން އިތުރު ހަލުވިކަމަކާއެކު ފެށްޓެވީ ހަލިފާނުގެ ޙާދިސާތައް ހިނގާ މިންވަރު އިތުރުވުމާއި ގުޅިގެނެވެ.