ދިވެހި ރައްޔިތުންގެ ޞިއްޙީ އިންޝުއަރެންސް ނިޒާމު، އާސަންދައިގެ ހިންގުން މުރާޖާ ކުރަމުންދާތީއާއި، ސިއްޙީ ޚިދުމަތްދޭ ދައުލަތުގެ މަރުކަޒުތަކުން އެއްވެސް އަގަކާނުލައި ޚިދުމަތް ދެމުންގެންދާތީ، ސިއްޙީ ޚިދުމަތްދޭ އަމިއްލަ ހޮސްޕިޓާތަކާއި، ކްލިނިކްތަކުން އާސަންދައިގެ ޚިދުމަތްދިނުން ވަގުތީގޮތުން މެދުކަނޑާލުމަށް ނިންމައިފިއެވެ.
އާސަންދަ ކުންފުނިން ރޭ ނެރުނު އިޢުލާނެއްގައިވަނީ، ދައުލަތުން ސިއްޙީ ޚިދުމަތްދޭ މަރުކަޒުތަކުގައި އިންޕޭޝަންޓް، އައުޓް ޕޭޝަންޓް، ލެބޯޓަރީ އިންވެސްޓިގޭޝަން، އަދި ސްކޭންކުރުމުގެ ޚިދުމަތް އެކަށީގެންވާ މިންވަރަށް އެއްވެސް އަގަކާ ނުލައި ލިބެމުންދާތީ، އަމިއްލަ ކްލިނިކްތަކާއި ހޮސްޕިޓަލްތަކުން ހޯދާ މިފަދަ ޚިދުމަތްތަކަށް އާސަންދައިން ކުރަމުންދިޔަ ޚަރަދު އުނިކުރުމަށް ނިންމާފައިވާކަމަށެވެ. އަދި އަމިއްލަ ސިއްޙީ ޚިދުމަތްދޭ ތަންތަނުން އާސަންދައިގެ ޚިދުމަތް ދިނުމާމެދު އިޖްތިމާއީ ސިއްޙީ އިންޝުއަރެންސްގެ ޤައުމީ ނިޒާމުގެ ސްކިލް މެނޭޖްމެންޓް ބޯޑުން ވަކި ގޮތެއް ނިންމަންދެން އެ ޚިދުމަތް ދިނުން ވަގުތީ ގޮތުން މެދުކަނޑާލުމަށް ނިންމާފައިވާކަމަށެވެ. އެހެންނަމަވެސް އާސަންދަ މެދުވެރިކޮށް ފަރުވާ ފަށާފައިވާ ފަރާތްތަކަށް ފަރުވާ ނިމެންދެން ޚިދުމަތް ދިނުމަށް ނިންމާފައިވާކަމަށް އާސަންދަ ކުންފުނިން މައުލޫމާތުދެއެވެ.
އިޖްތިމާއީ ސިއްޙީ އިންޝުއަރެންސްގެ ޤައުމީ ނިޒާމުގެ ސްކިލް މެނޭޖްމެންޓް ބޯޑުގެ މި ނިންމުމާ ގުޅިގެން ދިވެހިރާއްޖޭގެ އެންމެ ބޮޑު ޕްރައިވެޓް ހޮސްޕިޓަލް، އޭޑީކޭއިން ވަނީ އާސަންދަ ސްކީމްގެ ދަށުން އެއްވެސް ފަރާތަކަށް ސިއްޙީ ޚިދުމަތް ދިނުން ހުއްޓާލާފައިވާކަން އިޢުލާންކޮށްފައެވެ.