ލޯކަލް ކައުންސިލް އިންތިޚާބުގައި މެމްބަރުން އިންތިޚާބުކުރުމަށް ހަމަޖެހިފައިވާ 21 ދާއިރާއެއް ފިޔަވައި އެހެން ހުރިހާ ދާއިރާއެއްގެ ޖުމްލަ ވަގުތީ ނަތީޖާ އިލެކްޝަންސް ކޮމިޝަނުން އިޢުލާނުކުރައްވައިފިއެވެ.
އިލެކްޝަންސް ކޮމިޝަނުން މިހާތަނަށްވަނީ ޖުމްލަ 243 ދާއިރާއެއްގެ ވަގުތީ ނަތީޖާ އިޢުލާނުކުރައްވާފައެވެ.
ރެއާހަމައަށް އެ ކޮމިޝަނުންވަނީ ސިޓީ، އަތޮޅު، ރަށު ކައުންސިލްތައް ހިމެނޭގޮތުން 196 ދާއިރާއެއްގެ ޖުމްލަ ވަގުތީ ނަތީޖާ އިޢުލާނުކުރައްވާފައެވެ. އަދި މިއަދު ހެނދުނާއި މެންދުރުވަނީ 47 ދާއިރާއެއްގެ ވަގުތީ ނަތީޖާ އިޢުލާނުކުރައްވާފައެވެ.
މިއިންތިޚާބުގައި ޖުމްލަ 3 ސިޓީ ކައުންސިލަކާއި، 18 އަތޮޅު ކައުންސިލް އަދި 181 ރަށު ކައުންސިލަކަށް 664 މެމްބަރުން އިންތިޚާބު ކުރައްވާފައިވެއެވެ. މި އިންތިޚާބުގައި މެމްބަރުން އިންތިޚާބުކުރުމަށް ހަމަޖެހިފައިވަނީ ޖުމްލަ 264 ދާއިރާއަކަށެވެ. 5 ދާއިރާއަކަށް އިންތިޚާބަކާ ނުލައި މެމްބަރުން ވަނީ އިންތިޚާބުވެފައެވެ.