ލޯކަލް ލައިންސިލް އިންތިޚާބުގައި 2 ރަށުކައުންސިލަކަށް ވާދަކުރި ކެނޑިޑޭޓުންނަށް ލިބިފައިވާ ވޯޓްގެ ޢަދަދު އެއްވަރުވެ، ދެވަނަ ބުރަކަށް ދާންޖެހިއްޖެއެވެ.
އިލެކްޝަންސް ކޮމިޝަނުން މިހާތަނަށް އިޢުލާނުކުރައްވާފައިވާ ވަގުތީ ނަތީޖާތައް ދައްކާގޮތުން، ކެނޑިޑޭޓުންނަށް ލިބިފައިވާ ވޯޓްގެ ޢަދަދު އެއްވަރުވެފައިވަނީ ށ.ކޮމަންޑޫ ކައުންސިލަށް ވާދަކުރި ކެނޑިޑޭޓުންގެ ތެރެއިން 3 ވަނައަށް އެންމެ ގިނަ ވޯޓް ލިބިފައިވާ ދެ ކެނޑިޑޭޓުންގެ މެދުގައާއި، ހދ. ކުރިނބީ ކައުންސިލަށް ވާދަކުރި ކެނޑިޑޭޓުންގެ ތެރެއިން 3 ވަނައަށް އެންމެ ގިނަ ވޯޓް ލިބުނު 3 ކެނޑިޑޭޓުންގެ މެދުގައެވެ.
އެގޮތުން ކޮމަންޑޫ ކައުންސިލަށް އެމް.ޑީ.ޕީގެ ފަރާތުން ވާދަކުރި އަޙްމަދު ރިފްޢަތާއި، މުޙައްމަދު އާރިފް އަޙްމަދަށް ވަނީ 518 ވޯޓް ލިބިގެން ނަތީޖާ އެއްވަރުވެފައެވެ. އަދި ހދ.ކުރިނބީ ކައުންސިލަށް އެމްޑީޕީގެ ފަރާތުން ވާދަކުރި 2 ކެނޑިޑޭޓުން ކަމުގައިވާ މުޙައްމަދު ޝާފީއާއި، އަޙްމަދު މުޖުތަބާ، އަދި ޕީޕީއެމްގެ ފަރާތުން ވާދަކުރި ކެނޑިޑޭޓް އިސްމާއީލް އާސިފަށް 218 ވޯޓް ވަނީ ލިބިފައެވެ.
ލޯކަލް ކައުންސިލް އިންތިޚާބުގެ ޤާނޫނުގެ 22 ވަނަ މާއްދާގައި ބަޔާންކޮށްފައިވާގޮތުން ލޯކަލް ކައުންސިލް އިންތިޚާބުގައި އެއްވެސް އިންތިޚާބީ ދާއިރާއަކުން އެކައުންސިލަށް އިންތިޚާބުކުރަންޖެހޭ ޢަދަދަށްވުރެ ގިނަ ކެނޑިޑޭޓުންނަށް ލިބުނު ވޯޓް އެއްވަރު ވެފައިވާނަމަ އެ އިންތިޚާބުގެ ރަސްމީ ނަތީޖާ އިޢުލާނުކުރާ ތާރީޚުން ފެށިގެން ގިނަވެގެން 30 ދުވަހުގެތެރޭގައި އެއިންތިޚާބުގައި އެންމެ ގިނަ ވޯޓް ލިބިގެން އެއްވަރުވި ކެނޑިޑޭޓުންގެ މެދުގައި އިންތިޚާބުގެ އިތުރު ބުރެއް ބާއްވަންޖެހެއެވެ.