ޓްރާންސްޕޯޓް އޮތޯރިޓީން ދެމުންދާ ހުރިހާ ޚިދުމަތެއް ދ.އަތޮޅުން ލިބޭނެ އިންތިޒާމް ހަމަޖައްސަވައިފިއެވެ. މިކަމަށްޓަކައި ދ.ކުޑަހުވަދޫގައި ބޭއްވެވި ރަސްމިއްޔާތެއްގައި މި ޚިދުމަތް ފަށްޓަވައިދެއްވީ ކުޑަހުވަދޫ ދާއިރާގެ މެމްބަރު އަޙުމަދު އާމިރެވެ.
ލާމަރުކަޒީ އުސޫލުން ޓްރާންސްޕޯޓް އޮތޯރިޓީން ދެއްވަމުންދާ މައިގަނޑު ހުރިހާ ޚިދުމަތެއް އަތޮޅު ތެރެއަށް ފުޅާކުރެއްވުމަށް ކުރަމުންގެންދާ މަސައްކަތުގެ ދަށުން ދ.އަތޮޅުށް މި ޚިދުމަތް ތަޢާރަފްވެގެން ދިޔުމާއިއެކު ރާއްޖޭ ފަސްބައިކުޅަ ހަތަރުބަޔަށް މި ޚިދުމަތް ތާރަފްވެގެންދާނެއެވެ. ޚިދުމަތް ތައާރަފް ކޮށްދިނުމުގެ އެއްބަސްވުމުގައި އަތޮޅު ކައުންސިލާއި ޓްރާންސްޕޯޓް މިނިސްޓްރީއައި ދެމެދު އެއްބަސްވުމުގެ ސޮއިކުރެވިގެންދިޔައިރު މި ޚިދުމަތް ތައާރަފް ކޮށްދެއްވާ އެންމެ ފުރަތަމަ ހެދުނު ޑްރައިވިން ލައިސަންސް ކާޑް ދ.އަތޮޅު ކައުންސިލަރ ހަމްދީ އަބްދު ﷲ އާއި ޙަވާލުކޮށްދެއްވީ ކުޑަހުވަދޫ ދާއިރާގެ މެންބަރ އަހުމަދު އާމިރުއެވެ. ޙިދުމަތް ތާރަފްކޮށްދެއްވާ ވާހަކަފުޅު ދައްކަވަމުން ކުޑަހުވަދޫ ދާއިރާގެ މެންބަރު އަޙުމަދު އާމިރު ވިދާޅުވީ ގާނުނު އަސާސީގެ 8 ވަނަ ބާބުގައި ވާ ގޮތުގެ މަތިން ލާމަރުކަޒީ އުސޫލުން މި ޚިދުމަތް މިއަދު ރައްޔިތުންނަށް ލިބިގެން ދިޔުމަކީ އެ ގާނުނުގެ މުހިންމު މަފްޙޫމްތައް ޙާސިލުވުމަށް ލިބިގެންދާ ވަރަށްބޮޑު ބާރެއް ކަމަށެވެ. މިފަދަ ޚިދުމަތްތައް ރައްޔިތުންނާއި ގާތުން ލިބެން ފެށުމުން އެ ޚިދުމަތްތައް ބަލައިގަނެ، އެ ކަންކަމަށް ރައްޔިތުންގެ އެއްބާރުލުން ދިނުން މުހިންމު ކަމަށް އާމިރު ވިދާޅުވިއެވެ.
"ބައެއް ޙާލަތުގައި އަޅުގަނޑުމެންނަށް ބައެއް ކަންތައްތައް އަމިއްލައަށް ކުރަންޖެހޭ ކަމަށް އިނގިލި އެހެން މީހަކާ ދިމާލަށް ދިގުކުރިއެއް ކަމަކު އެ އިނގިލި އެންމެ ފުރަތަމަ އަމާޒުވަނީ އަޅުގަނޑުމެންގެ ސޮސައިޓީއަށްކަން މިއަދު އަޅުގަނޑުމެން ހަނދުމަފުޅު ބަހައްޓަވަން ޖެހޭ. ފުލުހުންނަށް ފުލުހުންގެ ވާޖިބުވެސް ރަނގަޅަކަށް އަދައެއް ނުކުރެވޭނެ އާންމުންގެ ފަރާތުން އެކަމަށް ފުރިހަމަ އެއްބާރުލުން ނުލިބިއެއް، ކައުންސިލަރުންނަށް ރަށުގެ ތަރައްޤީއާ ކުރިއެރުވުމަށްވެސް މަސައްކަތެއް ނުކުރެވޭނެ އާންމު ރައްޔިތުންގެ ފަރާތުން އެކަމަށް އެއްބާރުލުން ނުލިބިއެއް. ދަޢުލަތުގެ މުވައްސަސާތަކުން އެމުވައްސަސާތަކުން ފޯރުކޮށްދޭ ޚިދުމަތްވެސް ފޯރުކޮށެއް ނުދެވޭނެ ހަމަ ގައިމުވެސް އެއްބާލުލުން ނުލިބިއެއް. އެހެންވީމަ އެ ޚިދުމަތްތައް ފުރިހަމައަށް ދިނުމަށްޓަކާ، މިއަދު އަޅުގަނޑު ދަންނަވާނީ މި ކުޑަހުވަދޫއިން ފމި ފެންނަ މަންޒަރުތަކަކީ ކޮންމެ ބޭފުޅަކުވެސް ވަރަށް ރަނގަޅަށް ބައްލަވައި އެކަން ކަން ރަނގަޅަށް އިންސާފް ކުރައްވައި އޭގެ ރަނގަޅުގޮތް އަޅުގަނޑުމެންގެ ސިކުޑީގައި ބަހައްޓަން ޖެހޭ ކަންކަން" ކުޑަހުވަދޫ ދާއިރާގެ މެންބަރު އަޙުމަދު އާމިރު ވިދާޅުވިއެވެ.
ކުޑަހުވަދޫއަށް އަންނަމުންދާ ތަރައްޤީއަށް އަލިއަޅުއްވާލައްވާ ވާހަކަފުޅު ދައްކަވަމުން އާމިރު ވިދާޅުވީ ތަރައްޤީއާއިއެކު ޚިދުމަތްތައްވެސް ފުޅާވެގެންދާންޖޭހޭ ކަމަށެވެ. ލާމަރުކަޒީ އުސޫލުން ދެވެންފެށުނު މި ޙިދުމަތާއި ގުޅޭގޮތުން ވާހަކަފުޅު ދައްކަވަމުން ޓްރާސްޕޯޓް އޮތޯރިޓީގެ ޑެޕިއުޓީ ޑިރެކްޓަރ ޖެނެރަލް މުޙައްމަދު ރަފީއު ވިދާޅުވީ ކުޑަހުވަދޫއާޢި މި ސަރަހައްދަކީވެސް އިޤްތިސާދީ ގޮތުންނާއި އުމުރާނީގޮތުން ވެސް ކުރިއަރަމުން އަންނަ ސަރަޙައްދަކަށްވީއިރު ޓްރާންސްޕޯޓްގެ އަމާޒަކަށްވީ މި ޚިދުމަތްތައް އެންމެ ފުރިހަމައަށް ދެއްވުން ކަމަށެވެ. އެހެންކަމުން މި ޚިދުމަތް ހޯއްދަވާ ފަރާތްތަކުން ހެދިފައިވާ ޤާނޫނުތަކަށާއި ގަވައިދުތަކަށް ހުރިހާ ފަރާތްތަކުންވެސް ސަމާލުކަން ދިނުމަކީ މުހިންމުކަމެއް ކަމަށް ރަފީއު ވިދާޅުވިއެވެ.
"ޓްރާސްޕޯޓް އޮތޯރިޓީން މިޙިދުމަތް މި ފަށަނީކީ އެހެން ތަންތާގައި މިކަން ކުރާ އުސޫލަކުން ނޫން. އަޅުގަނޑު މިތާގައި ލާމަރުކަޒީ އުސޫލުން މި ފަށާނީ ހުރިހާ ޙިދުމަތެއް އަތޮޅު ކައުންސިލް ތެރެއިން ލިބޭ ގޮތަށް. ބައިކުޅަބައެއް ނޫން ލިބޭނީކީ. އެއްވެސް ކަމެއްގަ އިތުރު ދިމާއަށް ދާން ނުޖެހޭހާ ފުރިހަމަކޮށް ހުންނާނީ" ޓްރާސްޕޯޓް އޮތޯރިޓީގެ ޑެޕިއުޓީ ޑިރެކްޓަރ ޖެނެރަލް މުޙައްމަދު ރަފީއު ވިދާޅުވިއެވެ.
ރަފީއު ވިދާޅުވީ ފަސޭހަ ނިޒާމެއްގެ ތެރެއިން މިއަދާ ހަމަޔަށް ދޫކޮށްފައިވާ ލައިސަންސްފޮތް އޭ ގްރޭޑަށް އެއްވެސް އިތުރު ޓެސްޓަކައިނުލާ އަޕްގްރޭޑް ކޮށްދެއްވާނެ ކަމަށެވެ. ޓްރާންސްޕޯޓް ޙިދުމަތް ދ.އަތޮޅުގައި ތައާރަފްވެގެން ގޮސްފައިވަނީ ޒަމާނީ ފެންވަރުގެ ޑްރައިވިންގް ޓްރެކަކާއި އެކުގައެވެ. މި ޓެރެކަކީ ޖާގައިގެ ގޮތުން ތަނަވަސް އަތޮޅު ތެރޭގައި ހެދިފައިވާ މިފަދަ ޓްރެކްތަކުގެ ތެރެއިން އެންމެ ފެންވަރު ރަނގަޅު އެއް ޓްރެކް ކަމަށް ދ.އަތޮޅު ކައުންސިލްގެ ރައީސް ހަމްދީ ޢަބްދު ﷲ ވިދާޅުވިއެވެ.
ޑްރައިވިންގް ޓެރެކްގެ މަސައްކަތް ކުރިއަށް ގެންގޮސަފައިވަނީ އެމްއާރުޑީސީން ކަމަށާއި މި މަސައްކަތް ވަރަށް ފުރިހަމައަށް ރައްޔިތުންނަށް ފޯރުކޮށްދިނުމަށް ދ.އެއަރޕޯޓާއި ކުޑަހުވަދޫ ކައުންސިލުންވެސް ވަރަށްބޮޑު އެއްބާރުލުމެއް ފޯރުކޮށްދެއްވާފައިވާ ކަމަށް އަތޮޅު ކައުންސިލުން މައުލާމާތު ދެއްވައެވެ.