ރާއްޖޭގެ ރަށްރަށުގައި ސައުވީސް ގަޑިއިރު ކަރަންޓް ޔަޤީންކުރުމަށް ސަރުކާރުން ހިންގާ މަޝްރޫޢުގެ ދަށުން ހަތްދިހަ އަށް އިންޖީނު ގަތުމަށް ތިންކުންފުންޏަކާއެކު ފެނަކަ ކޯޕަރޭޝަނުން އެއްބަސްވުމެއްގައި ސޮއިކޮށްފިއެވެ.
މިއެއްބަސްވުމުގައި ސޮއިކުރެއްވީ މިކަމަށްޓަކައި ސްޓެލްކޯގެ ޖަލްސާކުރާ މާލަމުގައި ބޭއްވި ޚާއްސަ ރަސްމިއްޔާތުގައެވެ.
ރާއްޖޭގައި މީހުން ދިރިއުޅޭ ހުރިހާ ރަށެއްގައި ސައްވީސް ގަޑިއިރު ކަރަންޓު ޔަޤީންކުރުމަށް ސަރުކާރުން ފައްޓަވާފައިވާ މަޝްރޫއުގެ ދަށުން އިންޖީނުތަށް ގަތުމުގެ އެއްބަސް ވުމުގައި ސޮއިކުރެއްވުމަށްފަހު ފެނަކަ ކޯޕަރޭޝަނަށް ސަރުކާރުން ކަނޑައަޅުއްވާފައި ހުންނަވާ މިނިސްޓަރ ކާނަލް ރިޓަޔާޑް މުޙައްމަދު ނާޒިމް ވިދާޅުވީ ސަރުކާރުގެ އަމާޒަކީ ހަމަހަމަ ކަމާއިއެކު މާލެއެކޭ އެއްގޮތަށް އަތޮޅުތެރޭގެ ރައްޔިތުންނަށްވެސް ކަރަންޓުގެ ޚިދުމަތް ފޯރުކޮށް ދިނުންކަމަށެވެ. އެގޮތުން މީ ރާއްޖޭގެ ރަށްރަށުގައި ހިންގާ ކަރަންޓުގެ އެންމެ ބޮޑު މަޝްރޫޢުކަމަށް މިނިސްޓަރ ވިދާޅުވިއެވެ.
މި މަޝްރޫއަށް ސަތޭކަ ފަންސާހާއި، ދުއިސައްތަ މިލިއަން ރުފިޔާއާއި ދެމެދުގެ އަދަދަށް ފައިސާ ޚަރަދުވާނެކަމަށާއި، އެފައިސާ އަކީ ބަޖެޓްގައި ހިމަނައިގެން ހޯދާފައިވާ ފައިސާއެއް ނޫންކަމަށް މިނިސްޓަރ ވިދާޅުވިއެވެ. އެފައިސާ ހޯދާފައިވަނީ ރައީސުލްޖުމްހޫރިއްޔާގެ އިރުޝާދުގެ ދަށުން ކަމަށާއި،ނަމަވެސް އެފައިސާ ހޯދި ގޮތުގެ ތަފްސީލެއް މިނިސްޓަރ ނުދެއްވައެވެ.
އިންޖީނާއި ކަރަންޓް ސާމާނު ފޯރުކޮށްދިނުމަށް މިއަދު އެއްބަސްވެ ސޮއިކުރެވުނު ކުންފުނިތަކަށް، ދެތިން ދުވަހުގެތެރޭގައި ފައިސާ ހަވާލުކުރާނެކަމަށް މިނިސްޓަރ ނާޒިމް ވިދާޅުވިއެވެ. މިނިސްޓަރގެ ވާހަކަފުޅުގައި ކުރިއަށް އޮތް އަށްޑިހަ ދުވަސް ތެރޭގައި ސަޕްލަޔަރުން ފެނަކަ ކޯޕަރޭޝަނަށް އެތަކެތި ފޯރުކޮށްދިނުމަށް އަންގާފައިވާކަން ފާހަގަކުރެއްވިއެވެ.
އަލަށް ގަންނަ 78 އިންޖީނު ބެހެއްޓުމަށް ހަމަޖެހިފާ ރަށްރަށް ކަނޑައަޅާ ނިމިފައިވާކަމަށާއި، އެ އިންޖީނުތަށް ރަށްރަށް ފޮނުވާ މިންވަރަކުން އެރަށްތަށް ހާމަކުރަމުންދާނެކަމަށް މިނިސްޓަރ ނާޒިމް ވިދާޅުވިއެވެ.
މިރަސްމިއްޔާރުގައި ވާހަކަފުޅު ދައްކަވަމުން ފެނަކަ ކޯޕަރޭޝަންގެ މެނޭޖިންގ ޑިރެކްޓަރ މުޙައްމަދު ނިމާލް ވިދާޅުވީ އިންޖީނުތަށް ފޯރުކޮށްދޭނެ ރަށްތަށް އެކުންފުނިން ކަނޑައެޅީ ދޮޅު އަހަރު ތެރޭގައި އެރަށްރަށް ގޮސް ސާރވޭ ކުރުމަށްފަހުގައިކަމަށެވެ. އެގޮތުން މިވަގުތު ކަރަންޓުގެ ފެންވަރު އެންމެ ދަށް ރަށްރަށް އިސްކަންދީފައިވާނެކަމަށް ވިދާޅުވިއެވެ. ނިމާލް ވިދާޅުވީ ސަރުކާރުން ފަށާފައިވާ މި މަޝްރޫއުގެ ދަށުން އެރަށްރަށުގެ ރައްޔިތުންނަށް 24 ގަޑިއިރު ކަރަންޓުގެ ޚިދުމަތް ލިބޭނެކަމުގެ ޔަޤީންކަން ލިބިގެންދާނެކަމަށެވެ.
ނިމާލް ވިދާޅުވީ ކަރަންޓު ސާމާނު ހެޔޮ އަގުގައި ރައްޔިތުންނަށް ފޯރުކޮށްދިނުމަށްޓަކައި ރާއްޖޭގެ އުތުރާއި ދެކުނުގައި ސޭލްސް ސެންޓަރުތަކެއް ގާއިމްކުރާނެކަމަށެވެ. އެގޮތުން އައްޑޫ ސިޓީގައި ދޮޅުމަސް ދުވަހުގެ ތެރޭގައި ސޭލްސް ސެންޓަރު ހުޅުވާނެކަމަށާއި އުތުރުގައި ވެސް މިއަހަރުގެ ތެރޭގައި ސޭލްސް ސެންޓަރެއް ހުޅުވިގެން ދާނެކަމަށް ނިމާލް ވިދާޅުވިއެވެ.
78 އިންޖީނު ގަތުމުށް ބޭރުގެ ދެ ކުންފުންޏެއްގެ އިތުރުން ރާއްޖޭގެ އެއް ކުންފުންޏަކުން ބިޑް ކާމިޔާބުކޮށްފައިވެއެވެ. އެއީ އިންޖީނުތައް ގަންނަ ކުންފުނި ފިޖިޔާ ޔަނާން ޕަވަރ ލިމިޓެޑާއި، ޑިސްޓްރިބިއުޝަން ފޮށިތަށް ސަޕްލައިކޮށްދޭ ކެލާނީ ކޭބަލްސް ލިމިޓެޑްގެ އިތުރުން ކޭބަލްތަށް ސަޕްލައިކޮށްދޭ ކުންފުނި ޕަވަރ އިންޖިނިއަރިން ޕްރައިވެޓް ލިމިޓެޑްއެވެ. ފެނަކަ ކޯޕަރޭޝަނުން ރާއްޖޭގައި ސަތޭކަ ސާޅީސް އަށް އިންޖީނުގެ މިވަގުތު ހިންގަމުންދެއެވެ. އަދި އެކޯޕަރޭޝަންގެ އަމާޒަކީ ކުރިއަށް އޮތް ތަނުގައި ރާއްޖޭގެ ހުރިހާ ރަށެއްގެ އިންޖީނުގެތަށް ހިންގުމާއި ހަވާލުވުންކަމަށް އެކޯޕަރޭޝަނުން މަޢުލޫމާތުދެއެވެ.