ރޮހިންޔާ މުސްލިމުންނާ ދެކޮޅަށް މިޔަންމާގައި ހިންގަމުންދާ ޖަރީމާތަކުން ސަލާމަތްވެގެން މިޔަންމާ ދޫކޮށް ހިޖުރަކުރާ ފަރާތްތަކަށް މެލޭޝިޔާގެ ކޯސްޓްގާޑުން އެހީވެ ހިމާޔަތްދޭނެކަމަށް އެފަރާތުން ހާމަކޮށްފިއެވެ.
މެލޭޝިޔާގެ ކަނޑުގެ ސަލާމަތާބެހޭ އިދާރާގެ ޑިރެކްޓަރ ޖެނެރަލް ޒުލްކިފްލީ އަބޫބަކުރު ވިދާޅުވީ، މިޔަންމާގެ ރަކާން ސްޓޭޓްގައި މިހާރު ހިނގަމުންދާ ހަމަނުޖެހުންތަކުގެ ސަބަބުން ކަނޑުމަގުން އެގައުމު ދޫކޮށް އެހެން ގައުމުތަކަށް ހިޖުރަކުރާ މީހުން ގޮވައިގެން ދަތުރުކުރާ ބޯޓުތައް ދާދިއަވަހަށް މެލޭޝިޔާގެ ކަނޑުގެ ސަރަޙައްދުންވެސް ފެންނާނެ ކަމަށާއި، މިފަދަ ބޯޓުތަކަށް މެލޭޝިޔާގެ ކޯސްޓްގާޑުން ހިމާޔަތްކަން ދޭނެކަމަށެވެ. އަދި މިފަދަ ބޯޓުތަކުގައި އަންނަ ފަރާތްތަކަށް ވަގުތީ ހިޔާވަހިކަން ދޭނެކަމަށްވެސް އަބޫބަކުރު ވިދާޅުވިއެވެ.
އެހެންނަމަވެސް މިހާތަނަށް އަދި މިފަދަ ބޯޓަކާ މެލެޝިޔާގެ އުޅަނދަކާ ދިމާވެފައި ނުވާކަމަށްވެސް އޭނާ ވިދާޅުވިއެވެ. މިހާރުވެސް މެލޭޝިޔާގައި ރޮހިންޔާ މުސްލިމުންގެ އެއް ސަތޭކަ ހާސް ރެފިއުޖީން އުޅެމުންދެއެވެ.
އަވަށްޓެރި ތައިލެންޑުން ވެސް ވަނީ މިޔަންމާގެ ސަރުކާރާއި އަސްކަރިއްޔާއިން ހިންގަމުންދާ ޖަރީމާތަކުން ސަލާމަތްވާ ފަރާތްތަކަށް ހިޔާވަހިކަން ދޭނެކަން ހާމަކޮށްފައެވެ. އޯގަސްޓް މަހުގެ 25 ވަނަ ދުވަހުން ފެށިގެން މިޔަންމާގެ ރަކާން ސްޓޭޓްގައި ހިންގަމުންދާ ހަމަނުޖެހުންތަކުގެ ސަބަބުން، ސަތޭކަ ފަސްދޮޅަސް ހަތަރު ހާސް މީހުން މިޔަންމާ ދޫކޮށް އަވަށްޓެރި ބަންގްލަދޭޝްއަށް ވަނީ ހިޖުރަކޮށްފައެވެ.